07 ޖޫން 2016 - 14:25
ގާހިރާ (ޖޫން 7) - މިސްރުގެ މަތިންދާ ބޯޓެއް ހައިޖެކްކޮށްގެން މި އަހަރު ކުރީކޮޅު ސައިޕްރަސް އަށް ގެންދިޔައީ މިސްރުގައި އަދުލް އިންސާފު ނެތްކަން ސަމާލު ކަމަށް ގެނައުމަށް ކަމަށް ބޯޓު ހައިޖެކުރި މީހާގެ ވަކީލް ބުނެފި އެވެ.
ސައިޕްރަސްގެ ކޯޓަކުން ވަނީ ބޯޓު ހައިޖެކް ކުރި ސައިފުއްދީން މުހައްމަދު މުސްތަފާ، 58، މިސްރަށް ފޮނުވާލަން އެއްބަސްވެފަ އެވެ. މިސްރުން ވެސް ވަނީ މުސްތަފާގެ ޝަރީއަތް ކުރުމަށް އޭނާ ފޮނުވައި ދިނުމަށް ސައިޕްރަސްގައި އެދިފަ އެވެ.
އިސްކަންދަރިއްޔާ އިން ގާހިރާ އަށް ދަތުރުކުރި ބޯޓު މުސްތަފާ ހައިޖެކްކޮށްގެން ސައިޕްރަސް އަށް ގެންދިޔައީ މާޗް 29 ގަ އެވެ. އޭނާ ބޯޓު ހައިޖެކް ކުރީ ގޮވާތަކެތީގެ ފޭކް ބެލްޓެއް ބޭނުންކޮށްގެންނެވެ. ބޯޓު ހައިޖެކްކުރި ނަމަވެސް އޭނާ ވަނީ ބޯޓުގައި ތިބި 55 ޕަސިންޖަރުން މިނިވަންކޮށްފަ އެވެ.
މުސްތާފާގެ ވަކީލް ބުނީ ދެ ގައުމުގެ މެދުގައި ކުށްވެރިން ބަދަލު ކުރުމުގެ އެއްބަސްވުމެއް ގާއިމްކޮށްފައި އޮތް ނަމަވެސް ސިޔާސީ ބޭނުމަކަށް އެއްވެސް މީހަކު ނުގެންދެވޭނެ ކަމަށެވެ. އަދި މުސްތަފާ އެކަން ކުރީ މިސްރުގައި އަދުލު އިންސާފު ނެތްކަން ދެއްކުމަށް ކަމަށެވެ. ވަކީލް ބުނީ މުސްތަފާ މިސްރަށް ފޮނުވައިފި ނަމަ އޭނާ އަށް އަނިޔާކޮށްފާނެ ކަމަށާ އަދި މަރުގެ އަދަބު ދިނުން ވެސް އެކަށީގެންވާ ކަމަށެވެ.
ބޯޓުގެ ޕައިލެޓާއި ކޯ-ޕައިލެޓް ދިން ބަޔާނުގައި ބުނެފައި ވަނީ އެ ބޯޓު ހައިޖެކްކޮށްފައި ވަނީ ސިޔާސީ މަގްސަދެއްގައި ކަމަށެވެ.
ސިޔާސީ ހިމާޔަތް ހޯދުމަށް މުސްތަފާ އެދިފައިވީ ނަމަވެސް ސައިޕްރަސް އިން އެކަން ގަބޫލްކޮށްފައެއް ނުވެ އެވެ. ސައިޕްރަސް އިން ބުނެފައި ވަނީ މުސްތަފާއާ މެދު އިންސާފުން ޝަރީއަތް ކުރާނެ ކަމުގެ ޔަގީންކަން މިސްރުން ދީފައިވާ ކަމަށެވެ. --އޭއެފްޕީ