02 ޖުލައި 2022 - 20:40
ރާއްޖޭގެ ބައެއް ރަށްރަށަށް އުދަ އަރައި، ލިބެމުންދާ ގެއްލުންތަކާ ގުޅިގެން އަވަހަށް އެހީ ފޯރުކޮށްދޭނެ ކަމުގެ ޔަގީންކަން އެބައޮތް ކަމަށާއި މިއީ އެންމެން އެއްބައިވާންވީ ވަގުތު ކަމަށް ޖުމްހޫރީ ޕާޓީން ބުނެފި އެވެ.
މިދުވަސްވަރު ރާއްޖޭގެ ރަށްރަށަށް މޫސުން ގޯސްވެ، ބައެއް ރަށްރަށަށް އުދަ އަރައި، ބޮޑެތި ގެއްލުންތައް ދަނީ ލިބެމުންނެވެ. ބައެއް ގެތަކުގައި މީހުން ދިރިނޫޅެވޭ ވަރަށް އުދައިގެ އަސަރު ވަނީ ކޮށްފަ އެވެ.
އެކަމާ ގުޅިގެން ޖުމްހޫރީ ޕާޓީން މިރޭ ނެރުނު ބަޔާނެއްގައި ބުނީ އުދައިގެ ސަބަބުން ގެއްލުން ލިބުނު ފަރާތްތަކަށް ކުރިމަތިވެފައިވާ ހިތާމައިގައި އެ ޕާޓީން ބައިވެރިވާ ކަމަށެވެ. އަދި މިވަގުތަކީ އެންމެން އެއްބައިވަންތަކަމާ އެކު މަސައްކަތް ކުރަންވީ ވަގުތު ކަމަށާއި އަދި ގެއްލުން ލިބުނު ފަރާތްތަކަށް ކަމާބެހޭ ފަރާތްތަކުން އަވަހަށް އެހީ ފޯރުކޮށްދޭނެ ކަމަށް އެ ޕާޓީން ޔަގީންކުރާ ކަމަށް އެ ބަޔާނުގައިވެ އެވެ.
"ގެއްލުން ލިބުނު ފަރާތްތަކަށް އަވަސް ގޮތެއްގައި ކަމާބެހޭ ފަރާތްތަކުން އެހީތެރިކަން ފޯރުކޮށްދެއްވަމުން ގެންދަވާނެ ކަމަށް މި ޕާޓީން ޔަގީން ކުރަމެވެ." އެ ބަޔާނުގައިވެ އެވެ
މިދުވަސްވަރަކީ ސްކޫލް ބަންދު ދުވަސްވަރަކަށް ވާތީ ގިނަ ބަޔަކު ދަތުރު ކުރިޔަސް، ކަމާބެހޭ ފަރާތްތަކުން ދޭ ލަފައަށް އަމަލުކުރަން އެ ބަޔާނުގައިވަނީ އިލްތިމާސް ކޮށްފަ އެވެ.
މެދު ރާއްޖ އާއި ދެކުނުގެ އަތޮޅުތަކަށް މޫސުން ގޯސްވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް) އޮފީހުން ވަނީ ބުނެފަ އެވެ.