01 ޖުލައި 2022 - 20:05
އދ. ފެންފުށީގައި މޫދަށް އެރި އުޅުނު ދެ ޒުވާނަކު މިއަދު ހާލު ސީރިއަސްވެ، ފަރުވާ ދޭން ފަށައިފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ މޫދަށް އެރި އުޅުނު ދެ ފިރިހެނަކު ގެއްލިގެން ހަވީރު 6:00 ގައި ރިޕޯޓުކޮށްފައިވާ ކަމަށެވެ. އެ ދެ މީހުން ހޯދައި މިހާރު ފަރުވާ ދެމުން އަންނަ ކަމަށް އޭނާ ވިދާޅުވި އެވެ.
ގެއްލިގެން ހޯދަމުން ދަނިކޮށް އެންމެ ފުރަތަމަ ފެނުނީ ފެންފުއްޓަށް އުފަން 19 އަހަރުގެ ފިރިހެނެކެވެ. އޭގެ ފަހުން ފެނުނު 23 އަހަރުގެ ޒުވާނަކީ ތ. ދިޔަމިގިއްޔަށް ނިސްބަތްވާ ފިރިހެނެކެވެ.
ފެންފުށީ ކައުންސިލްގެ މެމްބަރަކު ވިދާޅުވީ ރަށު ސިއްހީ މަރުކަޒުން ފަރުވާ ދިނުމަށް ފަހު އެ އަތޮޅު މަހިބަދުއަށް ފޮނުވާލައި އިތުރު ފަރުވާ ދެމުން އަންނަ ކަމަށެވެ.
"ބެލެވެނީ ބާނީގައި ބޭރަށް ގެންދިޔައީ ކަމަށް. ހަތަރު ކުދިން މޫދަށް އެރި އުޅުނީ. ސަލާމަތުން ތިބި ދެ ކުދިން، އެކަން އާއްމުންގެ ސަމާލުކަމަށް ގެނެސް އެ ސަލާމަތްކުރީ،" މެމްބަރު ވިދާޅުވި އެވެ.
އެ ދެ ޒުވާނުންގެ ހާލު ވެސް ސީރިއަސްއިރު، އެ ތަނުން އެކެއްގެ ހާލު ވަރަށް ސީރިއަސް ކަމަށް ކައުންސިލުން ބުނެ އެވެ.