30 ޑިސެމްބަރ 2016 - 12:34
މާލޭގެ ގެއެއްގެ ބެލްކަންޏެއްގެ ބައެއް ވެއްޓުމުން، ކޮޓަރިއެއްގެ ތެރޭގައި ތާށިވި މާބަނޑު މީހަކު އެމްއެންޑީއެފް އިން މިއަދު ސަލާމަތްކޮށްދީފި އެވެ.
ސިފައިންގެ މީޑިއާ އޮފިޝަލަކު ވިދާޅުވީ ހެނދުނު 10 ޖަހާކަންހާއިރު، ހިނގި ހާދިސާގައި އަންހެންމީހާ ތާށިވީ، އޭނާ ދިރިއުޅޭ ހ. ސީ ސްޕީޑްގެ ތިންވަނަ ބުރީގެ ކޮންކްރީޓް ބެލްކަނީގެ ބައެއް ވެއްޓުމުން ކަމަށެވެ. އަދި އެ މީހާއަށް އެތަނުން ނުކުމެވޭނެ ގޮތެއް ނެތުމުން ފަޔާ އެންޑް ރެސްކިއުގެ ވެހިކަލެއް ބޭނުންކޮށްގެން އެ މީހާ ރައްކާތެރިކަމާއެކު އެތަނުން ބާލާފައިވާ ކަމަށް ވެސް އެމްއެންޑީއެފުން ބުންޏެވެ.
"އެ މީހާ ވަނީ ފަޔާ ވެހިކަލެއްގެ އެހީގައި ސަލާމަތްތެރިކަމާއެކު ބާލާފައި. އަދި އެ ބެލްކަނި ވެސް ވަނީ ހަދައިދީފައި،" އެމްއެންޑީއެފް އިން ބުންޏެވެ.
މި ބެލްކަންޏަކީ އަންހެންމީހާ ދިރިއުޅޭ ކޮޓަރި އަށް ވަދެ ނިކުތުމަށް ބޭނުން ކުރާ ތަނެވެ. އަދި ބެލްކަނި ވެއްޓިފައި ވަނީ ކޮޓަރީގެ ދޮރުމަތިން ފެށިގެންނެވެ.