20 ޖޫން 2022 - 12:46
މައްސަލަ ބޮޑުވެފައިވާ ބާ އިމްތިހާނުގެ ތާވަލަށް އެއްވެސް ބަދަލެއް ގެންނަން ޖެހޭ ސަބަބެއް ނެތް ބާ ކައުންސިލުން ނިންމައިފި އެވެ.
އެ ކައުންސިލުން ރޭ ނެރުނު ބަޔާނުގައި ބުނީ ގާނޫނީ ފަންނުގެ ގާނޫނުގެ ދަށުން ހަދަން ޖެހޭ ބާ އިމްތިހާނު ފަރުމާކުރުމަށް ފާއިތުވި ތިން އަހަރުގެ ތެރޭގައި މާލީ އަދި އިދާރީ ގޮތުން އެތައް މަސައްކަތްތަކެއް ކޮށްފައިވާ ކަމަށެވެ. އެއީ ކުއްލިއަކަށް އައި އިމްތިހާނެއް ކަމަށް ބައެއް މީހުން ބުނަމުންދިޔަ ނަމަވެސް އެ އިމްތިހާނާ ގުޅޭ ގޮތުން މިހާތަނަށް ދިޔައީ މައުލޫމާތު ފޯރުކޮށްދެމުން ކަމަށް ވެސް ބުންޏެވެ.
އެ ސަބަބުތަކާ ގުޅިގެން، އަންނަ ހޮނިހިރު ދުވަހު ބާއްވާ އިމްތިހާނު ފަސްކުރެވެން ނެތް ކަމަށް ވަނީ ކަނޑައަޅައިފަ އެވެ.
ބާ އިމްތިހާނު ފަސްކުރެވެން ނެތް ކަމަށް ކަނޑައެޅިއިރު، ބާ ކައުންސިލްގެ ފުރަތަމަ އިމްތިހާނަށް ޝަރުތުހަމަވާ ގިނަ ބަޔަކު ރަޖިސްޓްރީ ނުކުރާތީ، އެ އިމްތިހާނު ފަސްކޮށްދިނުމަށް އިންތިހާބީ އެކްސްކޯއިން ވަނީ އެދިފަ އެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިދިޔަ އަންގާރަ ދުވަހު ބޭއްވި ބައްދަލުވުމުގައި އިންތިހާބީ ނައިބު ރައީސް މިޒްނާ އަހުމަދު ވިދާޅުވީ އެހާ ބޮޑު ހަރަދެއް ކޮށްގެން ބާއްވާ އިމްތިހާނަށް 1،000 އަށްވުރެ ގިނަ މީހުން ޝަރުތު ހަމަވިއަސް ރަޖިސްޓްރީވީ އެންމެ 200 އެއްހާ މީހުން ކަމަށެވެ.
އެ އިމްތިހާނަށް ރަޖިސްޓްރީވީ ފީ ބޮޑުވެގެން ކަމަށްވާ ނަމަ އެ އެކްސްކޯއަށް ކުރެވޭނެ ކަންތައްތައް އެބަހުރި ކަމަށް އޭނާ ވިދާޅުވި އެވެ.
ބާ ކައުންސިލާ ގުޅޭގޮތުން އެންމެ ގިނަ ބައެއްގެ ކަންބޮޑުވުމަކީ ފީ ބޮޑުވުމެވެ. އެ ޓެސްޓަށް ނަގަން ނިންމާފައިވަނީ 10،000ރ. ގެ ފީއެކެވެ.
އިމްތިހާނާ ގުޅޭ ގޮތުން އަނެއް ބައެއްގެ ކަންބޮޑުވުމަކީ ސިލަބަސް ސާފުނުވުމެވެ. އެކަމަކު، އަންނަ މަހުގެ 11 ގައި ދައުރު ހަމަވާ ކައުންސިލުން ބުނީ އިމްތިހާނުގެ ތަފްސީލީ ސިލަބަސް، މައިކްރޮސޮފްޓް ޓީމްސް ޕްލެޓްފޯމްގެ "އެސްޕަޔަރިން ލޯޔާސް ފޯރަމް" ގައި މިދިޔަ ޖެނުއަރީ 8 ގައި ހިއްސާކޮށްފައިވާނެ ކަމަށެވެ. އަދި އެ ސިލަބަސް މިދިޔަ ފެބްރުއަރީ 3ގައި ސަރުކާރުގެ ގެޒެޓުގައި ޝާއިއުކޮށްފައިވާ ކަމަށް ބުންޏެވެ.
ގާނޫނީ ފަންނުގެ ގާނޫނަށް ގެނައި އެއްވަނަ އިސްލާހުން އެއް މަސް ދުވަހުގެ ތަމްރީން ޕްރޮގްރާމެއް ނިންމައި 281 މީހަކަށް ވަނީ ގާނޫނީ ވަކީލުކަމުގެ ހުއްދަ ވަނީ ދީފަ އެވެ.
"މި ތަމްރީން ޕްރޮގްރާމަކީ އާއްމު އުސޫލުން ފުރިހަމަކުރަންޖެހޭ އެއް އަހަރު ދުވަހުގެ ތަމްރީންގެ ބަދަލުގައި ހިންގަން ހަމަޖެހިފައިވާ ހާއްސަ ޕްރޮގްރާމެއް ކަމުގައި ދަންނަވަމެވެ. އަދި މިއީ އެ ފަރާތްތަކަށް ލިބިދީފައިވާ ނުހަނު ބޮޑު ލުޔަކަށްވާއިރު، މި ލުއި ލިބިދީފައިވަނީ ބާ ކައުންސިލުން އެންމެ ފުރަތަމަ ބާއްވާ ބާ އިމްތިހާނުގައި ބައިވެރިވުން ރާއްޖޭގެ ގާނޫނީ ފަންނުގެ ގާނޫނުން ޝަރުތުކޮށްގެން ކަން ފާހަގަކުރަމެވެ،" ބަޔާނުގައި ބުންޏެވެ.
"ބާ އިމްތިހާނުގައި ބައިވެރިވުމަށް ގާނޫނުން އުފައްދާފައިވާ ބަރީއަވުމެއް ނެތް ވާޖިބެއް ނުވަތަ އިލްތިޒާމެއް އަދާނުކުރުމުގެ އެއްވެސް ނަތީޖާއެއް ނެތުމަކީ ގާނޫނު އެގޮތަކަށް އޮތުމުގެ މާނަ ގެއްލިގެންދާނެ ކަމެކެވެ. މިކަން މިހެން ހުރުމާއެކު، ގާނޫނީ ފަންނުގެ ގާނޫނަށް ގެނެވުނު ފުރަތަމަ އިސްލާހުގެ ދަށުން ހުއްދަ ލިބިފައިވާ އެއްވެސް ފަރާތަކުން ބާ ކައުންސިލުން އިންތިޒާމްކުރާ އެންމެ ފުރަތަމަ ބާ އިމްތިހާނުގައި ބައިވެރިނުވެއްޖެނަމަ ނުވަތަ ފެއިލްވެއްޖެނަމަ ގާނޫނުން ލާޒިމްކުރާ އެއް ޝަރުތު އެ ފަރާތުގެ ކިބައިން އުނިވާނެ އެވެ،"
ވަގުތީ ލައިސަންސްގައި މަސައްކަތްކުރާ ވަކީލުން ބާ އިމްތިހާނުގައި ބައިވެރިނުވެއްޖެނަމަ ވަގުތީގޮތުން ހުއްދަ ހިފެހެއްޓޭނެ ކަމަށާއި އަދި ފެއިލްވެއްޖެނަމަ ވެސް ވަގުތީގޮތުން ލައިސެންސް ހިފަހައްޓާނެ އެވެ. އެހެންވެ، ބާ އިމްތިހާނުގެ ނަތީޖާ ލިބެންދެން ހުއްދަ އޮންނާނެ ކަމަށް ވެސް ބުންޏެވެ.
އެއާއެކު، ފުރަތަމަ ބާ އިމްތިހާނުގައި ބައިވެރިވާން ރަޖިސްޓްރީނުކުރާ މީހުންނާއި ރަޖިސްޓްރީކުރުމަށްފަހު ނަން އަނބުރާ ގެންގޮސްފައިވާ މީހުންނަށް ދޫކޮށްފައިވާ ގާނޫނީ ވަކީލުކަމުގެ ހުއްދަ، ބާ އިމްތިހާނު ބާއްވާ ދުވަހުން ފެށިގެން ދެން އެންމެ އަވަހަށް ބާއްވާ އިމްތިހާނުން ފާސްވުމާ ހަމައަށް ލައިސެންސް ބާތިލްވާނެ އެވެ.
"ހޮނިހިރު ދުވަހު ބާއްވާ އިމްތިހާނުގައި ބައިވެރިވާ އެންމެހާ ފަރާތްތަކުން އިމްތިހާނަށް ތައްޔާރުވަމުން ގެންދިއުމަށާއި އިމްތިހާނުގެ މުއްދަތު ކައިރިވެފައިވާ މި ދަނޑިވަޅުގައި އިމްތިހާނުގައި ބައިވެރިވާ ފަރާތްތައް މާޔޫސްވެދާނެ އެއްވެސް ކަމެއް ނުކުރުމަށް އެންމެހާ ފަރާތްތަކަށް އިލްތިމާސްކުރަމެވެ،" ބަޔާނުގައި ބުންޏެވެ.