29 ޑިސެމްބަރ 2016 - 10:02
ބީނޯސް އޭރީސް (ޑިސެމްބަރު 29) – މީގެ ދެ އަހަރު ކުރިން ކުޅުން ހުއްޓާލި މެންޗެސްޓާ ޔުނައިޓެޑުގެ ކުރީގެ މިޑްފީލްޑަރު ހުއާން ސެބަސްޓިއަން ވެރޮން އުމުރުން 41 އަހަރުގައި، އާޖެންޓީނާގެ ފުރަތަމަ ޑިވިޝަނުގެ އެސްޓުޑިއަންޓެސް އަށް ކުޅެން ފަށަން ނިންމައިފި އެވެ.
މީގެ ކުރިން ތިން ފަހަރެއްގެ މަތިން އެސްޓުޑިއަންޓެސް އަށް ކުޅެފައިވާ ވެރޮން މި ފަހަރު އެ ޓީމަށް ކުޅެނީ މުސާރައެއް ނުނަގަ އެވެ. އޭނާ އެ ކްލަބަށް ކުޅެދޭ ފުރަތަމަ މެޗަކީ ފްލޮރިޑާ ކަޕުގައި އަންނަ މަހުގެ 8 ވަނަ ދުވަހު ބެޔާ ލެވަކޫސަންއާ ދެކޮޅަށް ކުޅޭ މެޗެވެ.
އޭނާ އެ ކްލަބުގެ ޖާޒީގަައި އާޖެންޓީނާ ލީގު އަދި ދެކުނު އެމެރިކާގެ ކްލަބް މުބާރާތް ކަމަށްވާ ކޮޕަ ލިބެޓެޑޯރެސްގައި ވެސް ކުޅޭނެ އެވެ.
އެސްޓުޑިއަންޓެސް އިން 1994 ވަނަ އަހަރު ކެރިއަރު ފެށި ވެރޮން ވަނީ 1999-2001 އަށް އިޓަލީގެ ލާޒިއޯ އަށް ކުޅެ އެ ކްލަބާ އެކު އިޓާލިއަން ލީގާއި އިޓާލިއަން ކަޕާއި ޔުއެފާ ސުޕަ ކަޕް ކާމިޔާބުކޮށްފަ އެވެ. އޭގެ ފަހުން 2001 ވަނަ އަހަރު މެންޗެސްޓާ ޔުނައިޓެޑަށް ބަދަލުވެ އެ ކްލަބާ އެކު ޕްރިމިއާ ލީގު އުފުލާލި އެވެ.
ޗެލްސީ އަށް 2003 ވަނަ އަހަރު 15 މިލިއަން ޕައުންޑަށް ބަދަލުވި ނަމަވެސް އެ ކްލަބާ އެކު ކާމިޔާބެއް ނުހޯދުނެވެ. އަދި އެ މުއްދަތުގައި ލޯނެއްގެ ދަށުން އިންޓަ މިލާނާއި އެސްޓުޑިއަންޓެސް އަށް ލޯން އުސޫލުން ކުޅެ މޮޅު ކުޅުމެއް ދެއްކި އެވެ. އޭނާ ވަނީ އާޖެންޓީނާ ގައުމީ ޓީމަށް 1996-2010 އަށް 73 މެޗު ކުޅެދީފަ އެވެ.