11 ޖޫން 2022 - 08:10
އެމެޒަންގެ އޮންލައިން ވިޔަފާރި އެޕް ބޭނުންކޮށްގެން ވާޗުއަލްކޮށް ބޫޓުތަކަށް އެރެވޭގޮތް ހަދައިފި އެވެ.
އެމެޒަންގެ ބްލޮގް ޕޯސްޓެއްގައި ބުނީ މިވަގުތު އެ ހިދުމަތް ލިބޭނީ އައިއޯއެސް ނުވަތަ އައިފޯން ބޭނުންކުރާ ކަސްޓަމަރުންނަށް އެކަނި ކަމަށެވެ. އެމެރިކާ އާއި ކެނެޑާގައި ތިބި އެ ކުންފުނީގެ ކަސްޓަމަރުންނަށް މަޝްހޫރު، ނިއު ބެލެންސް އާއި އެޑިޑަސް އަދި ރީބުކް ފަދަ ބްރޭންޑްތަކުގެ ބޫޓުތައް އެމީހެއްގެ ފަޔާ ގުޅޭތޯ ޓެސްޓުކޮށްލެވޭނެ އެވެ.
ފަޔާއި، ބޫޓު ގުޅޭތޯ ބަލަން ހަދަން ޖެހޭ ގޮތަކީ އެ މީހަކަށް ކަމުދާ ބޫޓެއް ހިޔާރުކުރުމަށް ފަހު، ކެމެރާ އަށް ދެފައި ފެންނާނެ ގޮތަށް ބެހެއްޓުމެވެ. އެ މީހަކު އެ ބޫޓަކަށް އެރުމުން ހުންނާނެ ގޮތް، އެކި އެންގަލްތަކުން ބެލޭނެ އެވެ. އެކަމަކު، ބޫޓުގެ ސައިޒު ހެޔޮވަރުތޯ އޭގެން ޗެކެއް ނުކުރެވޭނެ އެވެ.
އެމެޒަން އިން ބުނީ އޯގިއުމެންޓެޑް ރިއަލިޓީ ބޭނުންކުރާ އެ ހިދުމަތް ވަރަށް އަވަހަށް އެންޑްރޮއިޑް ކަސްޓަމަރުންނަށް ވެސް ލިބޭނެ ކަމަށެވެ.
އޯގިއުމެންޓެޑް ރިއަލިޓީ ބޭނުންކޮށްގެން 2017 ވަނަ އަހަރު ވެސް އެމެޒަން އިން ވަނީ ކަސްޓަމަރުންނަށް އެމީހުން ބޭނުންވާ ތަނެއްގައި ބަހައްޓަން ގަންނަ ފަރުނީޗަރު ހުންނާނެ ގޮތް ކުރީ ބައިގައި ބަލައިލެވޭނެ ގޮތް ހަދައިފަ އެވެ. އަދި ފަހުން ބައެއް އަންނައުނާއި މޭކަޕް ސާމާނުތަކަށް ވެސް އެ ހިދުމަތް ދިނެވެ.