09 ޖޫން 2022 - 12:36
އަންނަ މަހު ރާއްޖޭގައި ބާއްވާ، އޭޝިއާގެ ބޮޑީ ބިލްޑިން ފިޒިކް ސްޕޯޓްސް ޗެމްޕިއަންޝިޕްގައި ވާދަކުރާ ދިވެހި ޓީމުގައި ހިމެނޭ އެތުލީޓުން ރަން މެޑަލް ހޯދާނެ ކަމުގެ އުންމީދު ބޮޑު ކަމަށް ގައުމީ ޓީމުގެ ކޯޗު މެލޭޝިއާގެ ވޮން ހޮން ބުނެފި އެވެ.
ބޮޑީ ބިލްޑިން އެސޯސިއޭޝަނުން، ވޮން ކޯޗަކަށް ހަމަޖެއްސީ އެ މުބާރާތަށް ހާއްސަކޮށެވެ. ބޮޑީ ބިލްޑިންގައި އޭޝިއާގެ އެންމެ ޝަރަފުވެރި މަގާމު، މިސްޓަ އޭޝިއާގެ ޓައިޓަލް ކުރިން ހޯދި ވޮން ބުނީ ދިވެހި އެތުލީޓުންގެ ކޮންޑިޝަނާއެކު އޭނާ އަށް އުންމީދު ކުރެވެނީ ރަން މެޑަލް އަށް ކަމަަށެވެ.
މިސްޓަ އޭޝިއޭ ޓައިޓަލް 1999 ގައި ހޯދި ވޮން ބުނީ ދިވެހި އެތުލީޓުންގެ ފެންވަރު ފެނުމުން ރަން މެޑަލް އަށް އޭނާ އެންމެ ފުރަތަމަ ދުވަހު ވެސް އުންމީދު ކުރެވުނު ކަމަށެވެ. އޭނާގެ ބެލުމުގެ ދަށުން، ގައުމީ ސްކޮޑަށް ނެގި 20 އެތުލީޓުން ވަނީ ދެ ޓީމަކަށް ބަހައިލައިފަ އެވެ. ޓީމު އޭ ގެ ޓްރޭނިންތައް ގެންދަނީ ސީދާ ވޮންގެ ބެލުމުގެ ދަށުންނެވެ.
"އަހަރެން ރާއްޖެ އައިސް މި އެތުލީޓުން ފެނުނު ފުރަތަމަ ދުވަހު ވެސް އަހަންނަށް އުންމީދު ކުރެވުނު ރަން މެޑަލް އަށް، ސަބަބަކީ މި އެތުލީޓުންގެ ކޮންޑިޝަން ވަރަށް ރަނގަޅު،" ހިއުމަން ނިއުޓްރިޝަންގެ ދާއިރާއިން މާސްޓާސް ޑިގްރީ ވެސް ހާސިލުކޮށްފައިވާ ތަޖުރިބާކާރު ބުންޏެވެ.
"ޓްރޭނިންގައި އިތުރަށް ކުރިއަށް ދިޔަ ވަރަކަށް އަހަންނަށް ހިތްހަމަޖެހުން ލިބުނު މި އެތުލީޓުންނާ މެދު. އަހަރެން ބޭނުންވާ ގޮތަށް ޓްރޭނިން ގެންދިއުމުގައި މި އެތުލީޓުން ވަރުބައެއްޔެއް ނުވޭ. އެއީ އެންމެ ބޮޑު ހިތްހަމަ ޖެހުމަކީ."
އޭނާ ބުނީ ކޮންޑިޝަން ދަށް ވެފައިވާ އެތުލީޓުން ރަނގަޅު ފެންވަރަކަށް އަނބުރާ ގެންދިއުމަށް ވެސް މަސައްކަތް ކުރާ ކަމަށެވެ. އޭނާ ބުނި ގޮތުގައި ޓީމެއްގައި ނަމަ އެކި ފެންވަރުގެ އެތުލީޓުން ތިބޭނެ އެވެ. ކޮންޑިޝަން ދަށް އެތުލީޓުންނަށް ރަނގަޅު ފެންވަރަކަށް ދެވުނަސް އެއީ ވެސް މަސައްކަތުގައި ހާސިލު ވާނެ މުހިންމު ކަންތައްތަކެއް ކަމަށް ކުރިން އެމެރިކާގެ މުބާރާތްތަކުގައި ވެސް ކާމިޔާބު ހޯދި ކުރީގެ ބޮޑީ ބިލްޑާ ބުންޏެވެ.
"ޗެމްޕިއަންޝިޕެއްގައި ބައިވެރިވާ ހުރިހާ އެތުލީޓުންނަށް ރަން މެޑަލް ނުލިބިދާނެ. އެއީ އެއް ވެސް ޓީމެއްގައި ވާނެ ކަމެއް ނޫން. ބައެއް އެތުލީޓުން ހޯދާނެ ރަން މެޑަލް. އެކަމަކު ރިހި އަދި ލޯ މެޑައްޔަކީ ވެސް ކާމިޔާބު. އެކަން ވެސް ހާސިލު ކުރެވޭނީ ވަރަށް ބުރަ މަސައްކަތުން،" ވޮން ބުންޏެވެ.
އަންނަ މަހު 15-21 ށް ބާއްވާ މުބާރާތުގައި އޭޝިއާގެ 30 ގައުމުން އެތުލީޓުން ވާދަކުރާނެ އެވެ. މުބާރާތުގައި ކޮންޓިންޖެންޓްގެ ގޮތުގައި ގާތްގަނޑަކަށް 500 އަށް ވުރެ ގިނަ މީހުން ބައިވެރިވާނެ ކަމަށް ބޮޑީ ބިލްޑިން އެސޯސިއޭޝަނުން ލަފާ ކުރެ އެވެ. މި މުބާރާތް ވާނީ މިހާތަނަށް ރާއްޖޭގައި ބާއްވާ އިންޓަނޭޝަންލް އެންމެ ބޮޑު ކުޅިވަރު މުބާރާތަށެވެ. މުބާރާތް ހޯސްޓް ކުރާނީ މާފުށީގަ އެވެ.
މުބާރާތުގައި ރާއްޖެއިން 20 އެތުލީޓުން ވާދަކުރާނެ އެވެ. ރާއްޖޭގެ ޓާގެޓަކީ މަދުވެގެން 10 މެޑަލް ހޯދުމެވެ. ބޮޑީ ބިލްޑިންގައި ރާއްޖޭގެ އެތުލީޓުން މީގެ ކުރިން ވެސް ވަނީ ދުނިޔޭގެ ލެވަލްގައި ވެސް ކާމިޔާބީތަކެއް ހާސިލުކޮށްފަ އެވެ.
މިދިޔަ އަހަރު އުޒްބެކިސްތާންގައި ބޭއްވި ވޯލްޑް ބޮޑީ ބިލްޑިން އަދި ފިޒިކްސް ޗެމްޕިއަންޝިޕްގައި ރާއްޖޭގެ ދެ އެތުލީޓުން ކަމަށްވާ، މުހައްމަދު ރަޝީދު (ރަޗޭ) އާއި މުހައްމަދު މޫސާ (މޯޑް) ވަނީ ރިހި މެޑަލް ހޯދައިފަ އެވެ. އަދި ހުސައިން ހިމްޔާން އާއި އަޒްނީން ރަޝީދު ލޯ މެޑަލް ވެސް ހޯދި އެވެ. ދެކުނު ކޮރެއާގައި 2019 ގައި ބޭއްވި ވޯލްޑް ޗެމްޕިއަންޝިޕްގައި މޯޑް ވަނީ ލޯ މެޑަލް ވެސް ހޯދާފަ އެވެ. ނޭޕާލްގައި 2019 ގައި ބޭއްވި ދެކުނު އޭޝިއާގެ ބޮޑީ ބިލްޑިން މުބާރާތުގައި މޯޑް ވަނީ ރަން މެޑަލް ވެސް ހޯދައިފަ އެވެ.