28 ޑިސެމްބަރ 2016 - 13:06
މެންޗެސްޓާ (ޑިސެމްބަރު 28) – ޕައުލް ޕޮގްބާ އަކީ ދުނިޔޭގެ އެންމެ މޮޅު މިޑްފީލްޑަރު ކަމަށާއި އަންނަ ސީޒަނުގައި އޭނާ އަދި މާ މޮޅުވާނެ ކަމަށް މެންޗެސްޓާ ޔުނައިޓެޑުގެ ކޯޗު ހޯސޭ މޮރީނިއޯ ބުނެފި އެވެ.
ދުނިޔޭގެ ރެކޯޑް އަގެއްގައި މެންޗެސްޓާ ޔުނައިޓެޑާ މި ސީޒަނުގައި ގުޅުނު ޕޮގްބާ އަށް ކުރީކޮޅު، ޔުވެންޓަސްގައި ދެއްކި ކުޅުން ދެއްކޭ ގޮތެއް ނުވި އެވެ. އެކަމަކު ފަހަކަށް އައިސް އޭނާ ވަނީ ކުޅުން ވަރަށް ބޮޑަށް ރަނގަޅުކޮށްފަ އެވެ.
"އަހަރެންގެ ނަޒަރުގައި ޕޮގްބާ އަކީ ދުނިޔޭގެ އެންމެ މޮޅު މިޑްފީލްޑަރު. އޭނާ އަކީ ޒުވާން ކުޅުންތެރިޔެއް އެހެންވީމާ ކުރިއެރުން ހޯދަން ޖެހޭ އަދި ކުރިއެރުން ލިބޭނެ. އޭނާ ވެސް ބޭނުންވޭ ކުރިއެރުން ހޯދަން،" ޕޮގްބާ ބުންޏެވެ.
މޮރީނިއޯ ބުނީ ފޯވާޑަކަށް ނޫނީ ބެލޮންޑިއޯ އެވޯޑް މިހާރު ނުލިބޭނެ ކަމަށާއި އެކަން ބަދަލުވެއްޖެ ހާލަތެއްގައި ޕޮގްބާ އަށް އެ އެވޯޑް ވެސް ހާސިލްކުރެވޭނެ ކަމަށެވެ.
"މިވަގުތަށް ބަލާއިރު ލަނޑު ނުޖަހާ ކުޅުންތެރިޔަކަކަށް ބެލޮންޑިއޯ ލިބުމުގެ ފުުރުސަތެއް ނެތް. ޑިފެންޑަރުން ކަމަށްވާ ފްރެންޒް ބެކެންބާ އާއި ފަބިއޯ ކަނަވާރޯ އަދި މިޑްފީލްޑަރު ލުއިސް ފީގޯ އަށް އެ އެވޯޑް ލިބުމަކީ ވެސް ބޮޑު އަޖާއިބެއް. އެކަން ބަދަލުވެއްޖެ ހާލަތެއްގައި ޕޮގްބާ ބެލޮންޑިއޯ ހޯދާނެ،" މޮރީނިއޯ ބުންޏެވެ.
މޮރީނިއޯ ބުނީ އިޓާލިއަން ލީގާ އަޅާބަލާއިރު ޕްރިމިއާ ލީގު ވަރަށް ތަފާތު ކަމަށާއި އެހެންވެ ޕޮގްބާ އަށް ހޭނެން އަދިވެސް ވަގުތު ނަގާނެ ކަމަށެވެ. އަދި މިވަގުތަށް ބަލާއިރު ވެސް ޕޮގްބާ ތަފާތު ކަމަށް މޮރީނިއޯ ބުންޏެވެ.
ޕްރިމިއާ ލީގުގައި ޖެހިޖެހިގެން ހަތަރު މެޗުން ޔުނައިޓެޑް މޮޅުވެފައިވާއިރު ޕޮގްބާ ވަނީ 24 މެޗުން ފަސް ގޯލް ޖަހައިފަ އެވެ.