28 ޑިސެމްބަރ 2016 - 15:38
ހަޑިހުތުރު އިބާރާތްތަކަކާއި މަންޒަރުތަކެއް ޖަހާފައި ހުރި ބެކްޕެކް ދަބަސްތަކެއް ވިއްކަން މާލޭގެ ފިހާރައެއްގައި ބަހައްޓާފައި ހުއްޓައި ފުލުހުން އިއްޔެ އެ ތަކެތި ނަގައިފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ މަޖީދީ މަގުގެ ފިހާރައެއްގައި ހުރި އެ ދަބަސްތައް ނެގީ ފުލުހުންނަށް ލިބުނު ރިޕޯޓަކާ ގުޅިގެން ކަމަށެވެ. އަދި އެ މައްސަލަ އިތުރަށް ތަހުގީގު ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ތަރުޖަމާނު ވިދާޅުވީ ހަޑިހުތުރު މަންޒަރު ކުރަހައި ހުތުރު އިބާރާތްތައް ލިޔެފައި ހުރި ގާތްގަނޑަކަށް ހަތަރު ވަަރަކަށް ދަބަސް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ގާނޫނުލް އުގޫބާތު ބުނާ ގޮތުން އެނގި ހުރެ ނުވަތަ އޭގައިވާ އެއްޗަކީ ހަޑިހުތުރު އެއްޗެއްކަންް އެނގި ހުރެ، އެ އެއްޗެއް ވިއްކުމަކީ ކުށެކެވެ.
ދިރާސީ އާ އަހަރުގެ ކިޔެވުން ފެށެން ހަފުތާއަކަށް ވެފައިވާ އިރު، މިއީ ސްކޫލަށް ބޭނުންވާ ދަބަސް ފަދަ ތަކެތި ގިނަ މީހުން ގަންނަ ދުވަސްްވަރެވެ.