30 މެއި 2022 - 12:02
ވ. ރަކީދު އަށް ހައި ސްޕީޑް އިންޓަނެޓާއި ދިރާގު ޓީވީގެ ހިދުމަތް ތައާރަފްކޮށްފި އެވެ.
އެ ދެ ހިދުމަތާ އެކު، ރަކީދޫ ރައްޔިތުންނަށް ހާއްސަ އޮފާތަކެއް ލިބޭނެ ކަމަށް ދިރާގުން މިއަދު ނެރުނު ނޫސް ބަޔާާނެއްގައި ބުންޏެވެ.
އެ އޮފާތަކުގެ ތެރޭގައި، ބްރޯޑްބޭންޑްގެ ހިދުމަތަށް އެޕްލައި ކުރާ މީހުންނަށް ފައިބާ ކޭބަލް ގުޅައިދިނުމާ އެކު އެއަށް ބޭނުންވާ ރައުޓާ ވެސް ހިލޭ ލިބޭނެ އެވެ.
ދިރާގުން ބުނިގޮތުގައި، މި ހިދުމަތާ އެކު އެ ރަށަށް ހަލުވި ސްޕީޑެއްގައި އިންޓަނެޓް ލިބޭނެ އެވެ. އަދި ބޮޑެތި ޑާޓާ އެލަވެންސްތައް ލިބޭ ތަފާތު ޕެކޭޖުތައް ވެސް ލިބޭނެ ކަމަށް ދިރާގުން ބުނެ އެވެ.
ދިރާގު ޓީވީ އަށް އެޕްލައި ކުރާ މީހުންނަށް ވެސް، ހިލޭ ޑިކޯޑަރު ލިބޭނެ ކަމަށް ދިރާގުން ބުނެ އެވެ. މުނިފޫހިފިލުވުމުގެ އެކި ކޮންޓެންޓާ އެކު ދިރާގު ޓީވީން 100 އަށް ވުރެ ގިނަ ޗެނަލް ފޯރުކޮށްދެ އެވެ.
ދިރާގު ފައިބާ ބްރޯޑް ބޭންޑް ހިދުމަތް ރާއްޖޭގެ ގޭބީސީތަކުގެ 83 ޕަސެންޓަށް މިހާރު ވެސް އަންނަނީ ފޯރުކޮށްދެމުންނެވެ. އޭގެ ތެރޭގައި 84 ރަށެއް ހިމެނެއެވެ. އަދި ރާއްޖޭގައި މީހުން ދިރިއުޅޭ 84 ޕަސެންޓް ރަށަށް ދިރާގު ޓީވީގެ ހިދުމަތް ވަނީ ފޯރުކޮށްދީފަ އެވެ.