12 މެއި 2022 - 18:01
"ދަ ނިއޯން ރަން 2022" ގެ ނަމުގައި ތަފާތު ގޮތަކަށް ބާއްވާ ދުވުމެއް އޯގަސްޓް މަހު ބާއްވަން، ރަން ފޯ ލޯލްޑިވްސް އިން އިއުލާންކޮށްފި އެވެ.
މިދުވުމުގައި ބައިވެރިވުމުގެ ފުރުސަތު ވަނީ ހުޅުވާލެވިފަ އެވެ. ރަން ފޯ މޯލްޑިވްސްގެ ވެބްޒައިޓް މެދުވެރިކޮށް މި ދުވުމުގައި ބައިވެރިވާން ރަޖިސްޓްރީ ވެވޭނެ އެވެ. ކުރިން ޖޫން 24 އަށް ޝެޑިއުލް ކުރެވުނު ދުވުން މިހާރު ބޭއްވުމަށް ހަމަޖެހިފައިވަނީ އޯގަސްޓް 26 ވަނަ ދުވަހުގެ ރޭ ގަ އެވެ.
އެރޭ ހުޅުމާލޭ ސެންޓްރަލް ޕާކުގައި ބާއްވާ ދުވުން ހާއްސަކޮށްފައި ވަނީ ނިއޯން ތީމް އަށް ކުރިޔަށް ގެންދާ މި ދުވުމުގައި ޕާރޓީ ތީމް ވެސް ހިމެނޭނެ އެވެ. މަޖާ މާހައުލެއްގައި ފަން ރަން އެއްގޮތަށް ކުރިއަށްގެންދާ ދުވުން އޮންނާނީ ހުޅުމާލޭ ސެންޓްރަލް ޕާކުގަ އެވެ.
ދަ ނިއޯން ރަން ވަނީ ހަތަރު ކެޓަގަރީއަކަށް ހާއްސަ ކޮށްފައި ވެއެވެ. އެއީ ފަސް ކިލޯމީޓަރ، 10 ކިލޯމީޓަރ ،21 ކިލޯމީޓަރ އަދި މުޅިން ތަފާތު ކެޓަގަރީއެއް ކަމަށްވާ އިންޓަރ ރިސޯޓް ރަންއެވެ. ހަތަރު ކެޓަގަރީއަށްވެސް ވާޗުއަލްކޮށް ދުވަން ވެސް ބައިވެރި ވެވޭނެ ކަމަށް ރަން ފޯ މޯލްޑިވްސްއިން ބުންޏެވެ.
"ވާޗުއަލްކޮށް ދުވަން ހަމަޖެއްސުމުގެ ސަބަބުން ދިވެހިރާއްޖޭގެ އެކި ކަންކޮޅުތަކުގައި ތިއްބެވި ފަރާތްތަކަށްވެސް ބައިވެރިވުމުގެ ފުރުސަތު ހުޅުވިގެންދާނެ،" ރަން ފޯ މޯލްޑިވްސް އިން ނެރެފައިވާ ނިއުސް ލެޓާގައި ބުނެފައި ވެއެވެ.
އިންޓަ ރިސޯޓް ރަން އަކީ ގްރޫޕެއް ގޮތަށް ބައިވެރިވުމަށް ހަމަޖެހިފައިވާ ކެޓަގަރީއެކެވެ. ކޮންމެ ރިސޯޓްއަކުން ވެސް ފަސް މީހުން ހިމެނޭ ޓީމެއް ބައިވެރިވެ، އެހެން ރިސޯޓްތަކުގެ ޓީމްތަކާއި ވާދަކޮށް 50 ކިލޯމީޓަރު ފުރިހަމަކޮށްގެން މިކެޓަގަރީއިން ވަނަ ހޯދުމުގެ ފުރުސަތު ވަނީ ހުޅުވާލައިފަ އެވެ.
މި ދުވުމުގައި ބައިވެރިވާ ފަރާތްތަކަށް ފުލްކިޓް އަދި ހަމަ އެކަނި ޓީޝާޓާއި މެޑަލް ހޯދުމުގެ ފުރުސަތު ވެސް ވަނީ ހަމަޖެހިފަ އެވެ. ފުލްކިޓްގައި ހިމެނެނީ ޓީޝާޓް، ދުވުން ނިންމާ ފަރާތްތަކަށް ދޭ މެޑަލް، ގްލޯ ސްޓިކްސް، ގްލޯ ގްލާސަސް، ހެޑްބޭންޑް ނުވަތަ ނިއޯން ކަލަރ ޕެކްސް، ޓައިމިން ޗިޕް ހަރުކޮށްފައިވާ ބިވް އަދި ރިޔޫސަބަލް ފެންފުޅިއެކެވެ. ފުލް ކިޓްގެ އަގަކީ 600 ރުފިޔާއެވެ. އަދި ހަމަ އެކަނި ޓީޝާޓް އަދި މެޑަލް ނަމަ އަގަކީ 300 ރުފިޔާއެވެ.
މި އިވެންޓަށް ހާއްސަ އެކްސްޕޯ ބޭއްވުމަށް ވެސް ވަނީ ހަމަޖެހިފަ އެވެ. އެކްސްޕޯ އޮންނާނީ އޯގަސްޓް 19-21 އަށް ހުޅުމާލޭ ގަ އެވެ. . މި އިވެންޓްގައި ބައިވެރިވާ ފަރާތްތަކުގެ މެދުގައި އަގުބޮޑު އިނާމު ތަކާއިއެކުގައި ލަކީ ޑްރޯ އެއްވެސް ބޭއްވުމަށް ހަމަޖެހިފައިވާކަމަށް ރަން ފޯ މޯލްޑިވްސްއިން ބުންޏެވެ. މިގޮތުން ނަސީބުވެރި 3 ފަރާތެއްގެ މެދުގައި "ބެނެއްލީ" ސައިކަލެއް "ޖީއެން ސައިކަލެއް" އަދި "ސްކޫޓާ ސައިކަލެއް" ހަދިޔާކުރުމަށް ހަމަޖެހިފައިވެ އެވެ.