09 މެއި 2022 - 07:27
މެޑްރިޑް (މެއި 9) - މެޑްރިޑް އޯޕަން މާސްޓާސް ޓެނިސް މުބާރާތުގެ ފިރިހެން ސިންގަލްސް އިވެންޓުގެ ޗެމްޕިއަންކަން ދިފާއުކުރަން ފައިނަލުގައި ނުކުތް ޖަރުމަންގެ އެލެކްޒެންޑާ ޒްވެރޭވް ސީދާ ދެ ސެޓުން ބަލިކޮށް އުމުރުން 19 އަހަރުގެ ކާލޯސް އަލްވަރޭޒް މުބާރާތް ކާމިޔާބު ކޮށްފި އެވެ.
ދުނިޔޭގެ ރޭންކިން ތިންވަނައިގައި އޮތް ޒްވެރޭވް، 25، އާ ދެކޮޅަށް ރޭ ކުޅުނު ފައިނަލް މެޗުގެ ސެޓްތައް އަލްވަރޭޒް ގެންދިޔައީ 6-3 އަދި 6-1 އިންނެވެ. މިއީ އޭނާ މާސްޓާސް ކެޓެގަރީގެ ޓެނިސް މުބާރާތެއް ކާމިޔާބު ކުރި ދެވަނަ ފަހަރެވެ. އޭނާ ވަނީ މިދިޔަ މަހު މަޔާމީ އޯޕަން މާސްޓާސް މުބާރާތް ކާމިޔާބު ކޮށްފަ އެވެ.
މުބާރާތް ކާމިޔާބު ކުރުމަށް ފަހު އަލްވަރޭޒް ބުނީ، މިއީ އޭނާއަށް ވަރަށް މުހިއްމު މުބާރާތެއް ކަމަށެވެ. އަދި އޭނާ ވަރަށް ޅައިރު މުބާރާތް ބަލަން އަންނަ ހަނދާން ވާކަމަށް އޭނާ ބުންޏެވެ.
"މި މުބާރާތް އަހަރެންނަށް ވަރަށް މުހިއްމު، އެއީ އުމުރުން 7 ނޫނީ އަށް އަހަރުގައި އަހަރެން މުބާރާތް ބަލަން އަންނަ ހަނދާންވޭ،" އަލްވަރޭޒް ބުންޏެވެ.
ފައިނަލުގައި އަލްވަރޭޒް އަތުން ބަލިވި ޒްވެރޭވް ވަނީ އަލްވަރޭޒް އަށް ވަރަށް ބޮޑަށް ތައުރީފް ކޮށްފަ އެވެ. ޒްވަރޭވް ދެކޭ ގޮތުގައި އަލްވަރޭޒް އަކީ މިވަގުތު ދުނިޔޭގައި ހުރި އެންމެ މޮޅު ޓެނިސް ކުޅުންތެރިޔާ އެވެ.
މިއީ އަލްވަރޭޒް މިއަހަރު ކާމިޔާބުކުރި ހަތަރުވަނަ މުބާރާތެވެ. ބާސެލޯނާ އޯޕަން ޓެނިސް މުބާރާތުގެ އިތުރުން އޭނާ ވަނީ ބްރެޒިލްގައި ބޭއްވި ރިއޯ އޯޕަން މުބާރާތް ވެސް ކާމިޔާބު ކޮށްފަ އެވެ.
އަލްވަރޭޒް މެޑްރިޑް އޯޕަންގެ ފައިނަލަށް ދަތުރުކުރީ ދުނިޔޭގެ އެއްވަނަ ކުޅުންތެރިޔާ ސާބިއާގެ ނޯވަކް ޖޮކޮވިޗާ ވާދަކޮށް ތިން ސެޓް އެއް ސެޓުން ސެމީ ފައިނަލް މެޗު ކާމިޔާބު ކޮށްގެންނެވެ. އޭގެ ކުރިން ކުއާޓާ ފައިނަލުގައި ވަނީ ދުނިޔޭގެ ހަތަރުވަނައިގައި އޮތް ރަފައެލް ނަޑާލް ބަލި ކޮށްފަ އެވެ.
މިއާ އެކު އަލްވަރޭޒް ވެފައިވަނީ 1990 ވަނަ އަހަރު އޭޓީޕީ ޓުއާ ފެށުނު ފަހުން، ދުނިޔޭގެ ރޭންކިންގެ ގަދަ ފަހެއްގައި ހިމެނޭ ތިން ކުޅުންތެރިން އެއް މުބާރާތެއްގައި ބަލިކުރި އެންމެ ހަގު ކުޅުންތެރިޔާގެ ޝަރަފް ހޯދައިފަ އެވެ.
މި ކާމިޔާބީއާ އެކު، އަންނަ ހަފްތާ ފަށާ ފްރެންޗް އޯޕަން ގްރޭންޑް ސްލޭމް މުބާރާތުގެ ކުރިން އަލްވަރޭޒް ދުނިޔޭގެ ރޭންކިންގެ ހަވަނައަށް ޖެހިލާނެ އެވެ.