15 އެޕްރީލް 2022 - 07:44
ގއ. ގެމަނަފުއްޓަށް ދަތުރުވަރެއްގައި ނުވަތަ ރަސްމީ ކަމެއްގައި އެރި މީހަކު ވެސް ދަތުރު ނިންމައިލަނީ ކައިރީގައި އޮންނަ އެ "ޕިކްނިކް އައިލެންޑް" އިންނެވެ. މީހުން ދަތުރު ދާން ހަމަޖައްސާފައި އޮންނަ ރެހާ ބީޗަށް ނުގޮސް ގެމަނަފުށީގެ ދަތުރު ފުރިހަމަވީ ކަމަކަށް ނުވާނެ އެވެ. އެހެންވެ، އަހަރެމެން މި ގެނެސްދެނީ އެ ރަށް މި ހިސާބަށް ގެނެސްދިން އެންމެ އިސްމީހާގެ ވާހަކަ އެވެ. އެއީ ގެމަނަފުށީގެ އިޖުތިމާއީ ހުރިހާ ކަމެއްގެ އެންމެ އިސް އެކެކެވެ. ކޮންމެ ކަމެއްގައި އޭނާގެ ބައިވެރިވުން ނެތިއެއް ނުދާނެ އެވެ.
އުމުރުން 12 އަހަރުގައި ގެމަނަފުށި ރަށު އޮފީހުގެ މަސައްކަތު މީހަކަށް ވަން މުހައްމަދު އިބްރާހިމަކީ މިއަދު މި ރަށުގައި އެންމެ ނަން ހިނގާ އެކަކެވެ. އެކަމަކު، މި ފަހަރު އޭނާގެ މަސައްކަތުގެ ތެރެއިން މި ފަހަރު ބަލާލާނީ ގެމަނަފުށީގެ މީހުންނާއި ރަށުން ބޭރުން ދާ އެތައް ބަޔަކު ޗުއްޓީ ހޭދަކުރަންދާ "ރެހާ ބީޗް" ތަރައްގީ ކުރުމުގައި އޭނާގެ ދައުރަށެވެ. އެއީ ސީދާ އޭނާގެ އިސްނެގުމަކަށް ވާތީ އެވެ.
ގެމަނަފުށިން ފުރައިގެން ފަސްވަރަކަށް މިނިޓުން ދެވޭ ރެހާ ބީޗަކީ ހުވަދުއަތޮޅުގެ އިތުރުން އައްޑު އާއި ފުވައްމުލަކަށް ވެސް މަޝްހޫރު ތަނެކެވެ. ގެމަނަފުއްޓަށް ދާ ބައެއް ނަމަ އެ "ޕިކްނިކް އައިލެންޑް" އަށް ނާރާ ނުދާނެ އެވެ. އެއިން ކޮންމެ މީހަކަށް އެ ފުރުސަތު ލިބުނީ އުމުރުން މިހާރު 45 އަހަރުގެ މުހައްމަދު އިބްރާހިމްގެ އިސްނެގުމާ ހެދި އެވެ.
"މި ރަށުގައި ކޮށްފައި ހުރި ކޮންމެ މަސައްކަތެއް ވެސް މިއީ އަޅުގަނޑުގެ އިސްނެގުމުގެ މަތިން އަޅުގަނޑުގެ އެކުވެރި ހަތަރުވަރަކަށް މީހަކު ބައިވެރިވެގެން ކޮށްފައި ހުރި މަސައްކަތް. ރަށުގެ އެކި ފަރާތްތަކަށް ފަންޑް ހޯދަން އެދިގެން އެ ބޭފުޅުންނަށް ދެވުނު ވަރަކަށް ފަންޑް ދީގެން ހަދާފައި މި ހުރީ،" ގެމަނަފުށި ކައުންސިލް އިދާރާގެ ކައުންސިލް އޮފިސަރެއްގެ މަގާމުގައި ހުރި މުހައްމަދު އިބްރާހިމް ރެހާ ބީޗްގައި "މިހާރު" ގެ ނޫސްވެރިންނާ ވާހަކަ ދައްކަމުން ބުންޏެވެ.
އޭނާގެ އިސްނެގުމަށް ރެހާ ބީޗް ވަނީ ދަތުރުދާ މީހުންނަށް ހިތްފަސޭހަ ކުޑަކުޑަ ރަށަކަށް ހަދައިދީފަ އެވެ. ކާން ތިބޭނެ ތަނެއް، ކުޑަކުޑަ ރީތި މިސްކިތެއް، ފެންވަރާނެ ތަނެއް، ބާބެކިއު ހެދޭނެ ގޮތް، ބެޑްމިންޓަން އާއި ވޮލީބޯޅަ ފަދަ ކުޅިވަރު ކުޅެވޭނެ ގޮތް ފަހިކޮށްދިނެވެ. އަދި ދަތުރުދާ މީހުން މަޑުކޮށްލާނެ ކުޑަވަރެއްގެ އުނދޯލިގެއެއް ވެސް ވަނީ ހަދައި ޖޯލިފަތިތައް ވަނީ ބަހައްޓައިފަ އެވެ. ރާވާފައި ވަނީ ފުޓްސަލް ޕްރެކްޓިސް ކުރެވޭނެ ދަނޑެއް ވެސް ހަދާށެވެ. އޭރުން ފުޓްސަލް ޕްރެކްޓިސް އަށް ހާއްސަ ކޮށްގެން ވެސް ރެހާ ބީޗަށް ދެވޭނެ އެވެ.
"އަޅުގަނޑުމެން މި ރަށަށް ފޭބި ސަރަހައްދު އެއީ [ކުރިން] އެއްކޮށް ޖަންގައްޔެއްގެ ގޮތުގައި އޮތް ތަނެއް. އެ ސަރަހައްދު ކޮށައި، ސާފުކޮށް ރީތިކޮށްފައި ތި އޮތީ. ކުރިން ވަރަށް ހަޑިކޮށް އޮތް ތަނެއް،" މުހައްމަދު އިބްރާހިމް ބުންޏެވެ.
ރެހާ ބީޗަކީ ވަރަށް ރީތި ބީޗަކާއި މޫދެއް އޮތް ޗާލު ރަށެކެވެ. ދަތުރުދާ މީހުންނަށް އެންމެ ފައްކާކޮށް މިހާރު އެ ވަނީ ހަދައިފަ އެވެ. ގެމަނަފުށީގައި ވެސް ދަތުރުދާ މީހުންނަށް ހާއްސަ ތަންތަން ހުއްޓަސް ކަނޑެއް ހުރަސް ނުކުރާ ނަމަ އެ ރަށުގެ މީހުންނަށް ދަތުރު ދެވުނު ކަމަކަށް ނުވެ އެވެ. އެހެންވެ، ގެމަނަފުށީގެ ކޮންމެ އާއިލާއަކާ ވެސް އެންމެ ގާތް އެއް ތަނަކީ ރެހާ ބީޗެވެ.
މިއަދު ރެހާ ބީޗަށް ސްކޫލް ކުދިންނާއި އެކިއެކި އޮފީސްތަކުގެ މީހުން ދަތުރުދެ އެވެ. އެއީ ބައެއް އޮފީސްތަކުގެ ކުދިކުދި ބައްދަލުވުންތަކަށް ވެސް ހިތްފަސޭހަ ރަށަކަށް ވެއްޖެ އެވެ. ގއ. އަތޮޅުގައި ވެސް މި ގޮތަށް، މިހާ ގަޔާވާ ގޮތަކަށް ހަދާފައި އޮތް ދެވަނަ "ޕިކްނިކް އައިލެންޑް" އެއް އޮތް ހެނެއް ހިއެއް ނުވެ އެވެ.
ގެމަނަފުއްޓަށް ދާ ބަޔަކު ރެހާ ބީޗަށް ނުދެވިގެން ތިބޭކަށް ނުޖެހެ އެވެ. މުހައްމަދު އިބްރާހިމްގެ ލޯންޗުގައި ހިލޭ ގެންގޮސްދީ، އަނބުރާ ގެމަނަފުއްޓަށް ގެނެސްދެ އެވެ. އެ ކަމަށް ވަކި ދުވަހެއް، ވަގުތެއް ނޯވެ އެވެ.
"އަޅުގަނޑަކީ އިޖުތިމާއީ ކަންކަމަށް ވަރަށް ލޯބިކުރާ މީހެއް. އަޅުގަނޑުމެންގެ ރަށް ޕްރޮމޯޓް ކުރުމަށްޓަކައި އަޅުގަނޑު ފަދައިން ކޮންމެ މީހަކީ ވެސް ވަރަށް މަސައްކަތް ކުރާ މީހެއް. އެގޮތުން އަޅުގަނޑުގެ ޝައުގުވެރިކަން ވެސް ހުރީމާ މި ކަމަށް އިސްނެގީ،" ތިން ކުދިންގެ ބައްޕަ ބުންޏެވެ.
"އަޅުގަނޑުމެންގެ ރަށަކީ މީހުންނަށް މެހުމާންދާރީ އަދާކުރުމާއި މީހުންނާ ގުޅުން ބަދަހިކުރުމުގައި ވަރަށް ނަމޫނާ ރައްޔިތެއް އުޅޭ ރަށެއް. އެ ރައްޔިތުންނަށް އެ ލިބިފައިވާ ރީތި ނަން ދިރުވުމަށްޓަކައި ކޮންމެވެސް ބަޔަކު ތިބެން ޖެހޭތީ އަޅުގަނޑުމެން އިސްނަގައިގެން ރަށަށް އަންނަ މެހުމާނުންނަށް އަދި ރަށުގެ ރައްޔިތުންނަށް ތަފާތު މުނާސަބަތުތަކުގައި، ޗުއްޓީތަކުގައި، ވީކެންޑްތަކުގައި ފަސޭހައިން މި ރަށް ބޭނުންކުރެވޭ ގޮތަކަށް ތައްޔާރުކުރީ."
ދަތުރުދާ މީހުންނަށް ހާއްސަކޮށްގެން ރެހާ ބީޗް ހެދީ އެ ތަނަށް ކުރާ އިންވެސްޓްމަންޓުން ލިބިދާނެ ގެއްލުމަކަށް ވިސްނައިފައެއް ނޫނެވެ. އެއީ އޭރު އެއްވެސް ބަޔަކަށް ދޫކޮށްފައި ނެތް ރީތި ބީޗަކާއި މޫދެއް ވެސް އޮތް ރަށަކަށް ވުމުން ބަޔަކަށް ފަސޭހަވާނެ ކަމެއް ކޮށްލަން މުހައްމަދު އިބްރާހިމް ބޭނުންވީ އެވެ.
"މި ރަށުގެ ފައިދާ ކުޑަދުވަސްކޮޅަކަށް ނަމަވެސް އަޅުގަނޑުމެންގެ ރަށުގެ މީހުންނާއި ރަށަށް ޒިޔާރަތްކުރާ އެހެން ރަށްރަށުގެ ބޭފުޅުންނަށް ލިބޭނެ ގޮތެއް ހަދަން ބޭނުންވީ."
ރެހާ ބީޗަށް މިހާތަނަށް އެއްފަހަރެއްގައި ދަތުރު ދިޔަ މީހުންގެ އަދަދަކީ 350 އެވެ. އެއީ ގެމަނަފުށި ކައުންސިލް އިދާރާގެ އިވެންޓެކެވެ. ފުލުހުންގެ އިދާރާ އާއި ގެމަނަފުށީގެ އެކި މުއައްސަސާތަކުން ވަނީ ތަފާތު އިވެންޓްތައް ބާއްވައިފަ އެވެ. އެއިން ކޮންމެ ބަަޔަކަށް ވެސް ގއ. އަތޮޅުން އެންމެ ހިތްފަސޭހަ "ޕިކްނިކް އައިލެންޑް" އަކަށް ވަނީ ރެހާ ބީޗެވެ.
އެ ރަށަށް ދާން އެއްވެސް ހުއްދައެއް ނަގާކަށް ނުޖެހެ އެވެ. ބޭނުން ބަޔަކު ބޭނުން ދުވަހަކު، ބޭނުން ވަގުތަކަށް ރެހާ ބީޗަށް އަރައި ޗުއްޓީ ނިންމާފައި ދާންވީ އެވެ. މުހައްމަދު އިބްރާހިމްގެ ޓީމުން ވަނީ ރަށުން ގިނަ ފަސޭހަތަކެއް ފަހިކޮށްދީފަ އެވެ.
"މި އަތޮޅުގައި ވެސް ކަނޑުހުޅުދޫ، ދާންދޫ އަދި ގދ. ގައްދޫން ވެސް އެކި ބޭފުޅުން ވީކެންޑްތަކުގައި މި ތަން އެބަ ބޭނުންކުރޭ،" މުހައްމަދު އިބްރާހިމް ބުންޏެވެ.
ރެހާ ބީޗާ ގުޅޭ ކަންކަމަށް މިހާތަނަށް މިލިއަނަކަށް ވުރެ ގިނަ ރުފިޔާ ހަރަދު ކޮށްފި އެވެ. ރަށުގެ ތަންތަން ހަދާފައި ވަނީ ގިނަ ދުވަހަށް ބޭނުންކުރެވޭނެ ގޮތަށެވެ.
"އާންމުކޮށް ވަކިވަކި މީސްމީހުން، ވިޔަފާރިވެރިން ކައުންސިލުން އަޅުގަނޑުމެންނަށް އެހީވޭ. މިސާލަކަށް އަޅުގަނޑުމެން މި އެދުނީ އުނދޯލީގެ ވަަލައް ބޭނުންވާ އެއްޗެއް ނޫނިއްޔާ ޖޯލަފަތި ގެތުމަށް ބޭނުންވާ ދާ ހޯދައިދޭށޭ. އެ ބޭފުޅުން އެ އެއްޗެހި ހޯދައިދޭ. މި މަސައްކަތް ހަގީގަތުގައި ކުރެވުނީ މުޅި ރަށުގެ ރައްޔިތުންގެ އެހީތެރިކަމާއެކު،" މުހައްމަދު އިބްރާހިމް ބުންޏެވެ.
ގެމަނަފުށި އޮފީސް ނުވަތަ މިހާރު ނަމަ ގެމަނަފުށި ކައުންސިލް އިދާރާގައި މެދުނުކެނޑި މުހައްމަދު އިބްރާހިމް މަސައްކަތް ކުރާތާ 34 އަހަރު ވެއްޖެ އެވެ. ސަރުކާރުގެ ރަސްމީ މަސައްކަތްތަކުގެ އިތުރުން ރެހާ ބީޗް ތަރައްގީ ކުރުމާ ގުޅޭ ކަންކަން އޭނާ ކުރަނީ ވިޔަފާރި އަށް ވެސް ވަގުތު ދެމުންނެވެ. ގެމަނަފުށީގައި އޭނާ ގެންދަނީ ރެސްޓޯރަންޓަކާއި ކޮސްމެޓިކް ފިހާރައެއް ހިންގަމުންނެވެ. އަދި ލޯންޗެއް ވެސް ގެންގުޅެ އެވެ.
"އެ ހުރިހާ ކަމަކަށް ވެސް ވަގުތު ދީފައި ރެހާ ބީޗް ކަންތައްތަކާ އުޅެނީ،" މުހައްމަދު އިބްރާހިމް ބުންޏެވެ.
އެއް ވަޒީފާއެއްގައި މެދުނުކެނޑި 34 އަހަރު ހޭދަކުރުމަކީ ވެސް މުހައްމަދު އިބްރާހިމްގެ ހާއްސަ ކަމެކެވެ. މަސައްކަތު މީހެއްގެ ވަޒީފާ އިން ފެށި ނަމަވެސް އޭނާ ފަހުން ވަނީ ކާތިބު ކަމުގެ ކޯސް ހަދައިފަ އެވެ. މިހާތަނަށް ވަނީ ޕްރޮޖެކްޓް އޮފިސަރުކަމާއި މުނިސިޕަލް އޮފިސަރުކަމާއި އިިކޮނޮމިކް އޮފިސަރުކަން ކޮށްފަ އެވެ. ވަޒީފާގެ އޮނިގަނޑަށް ގެނައި ބަދަލަކުން މިހާރު ބަދަލު ކޮށްފައި ވަނީ ކައުންސިލް އޮފިސަރަކަށެވެ.
"މިސާލަކަށް ގެމަނަފުށީގެ ފުޓުބޯޅަ ދަނޑުގެ ރޮސްޓްރަމާއި ބަނދަރު ސްޓޭޖް ވިޔަސް އަޅުގަނޑުގެ ބައިވެރިވުން އޮވެގެން ހަދާފައި އެ އޮތީ. ރޮސްޓްރަމް ހެދީ ސަރުކާރުން ވަރަށް ކުޑަ ބަޖެޓެއް ދީގެން. އެކަމަކު ތަނަށް ބޮޑަށް ހޭދަކުރީ އަޅުގަނޑުމެން ރަށުގެ މީހުން. އެހާވަރުގެ ރީތި ރޮސްޓްރަމެއް މި އަތޮޅުގައި ވެސް ހުންނާހެން އަޅުގަނޑަކަށް ހިއެއް ނުވޭ،" މުހައްމަދު އިބްރާހިމް ބުންޏެވެ.
"އަޅުގަނޑުގެ ބޭނުމަކީ އެހެން މީހުންނަށް ނަމޫނާ ދެއްކޭތޯ. އެ ހިތްވަރު ހޯދައިދޭން އަޅުގަނޑު ބޭނުންވަނީ."
މުހައްމަދު އިބްރާހިމްގެ އިސްނެގުމަށް ކޮށްފައި އެ ވަނީ ކުޑަކުޑަ ކަމަކަށް ވިޔަސް އޭގެ ފައިދާ ކުރަނީ ގެމަނަފުށީގެ މީހުންނަށް އެކަންޏެއް ނޫނެވެ. ރަށުން ބޭރުގެ މީހުންނާއި އައްޑު އާއި ފުވައްމުލަކު މީހުން ވެސް ހިމެނެ އެވެ. އެހެންވެ، އޭނާގެ މި ނަމޫނާ ބަލައިގަންނަން ޖެހެ އެވެ.