10 އެޕްރީލް 2022 - 12:28
އުމުރަށް ޖަލަށް ލާފައި ވަނިކޮށް ޕެރޯލްގެ ދަށުން ދޫކޮށްލާފައި ހުއްޓާ މަސްތުވާތަކެތީގެ ޓްރެފިކިންގެ މައްސަލައިގައި ހައްޔަރުކުރި އަބްދުﷲ ނަޝީދު ހިމެނެނީ ގެއެއްގެ ޓައިލްސް ދަށުގައި ވަޅުލާފައި ހުއްޓާ ހޯދި 42 ކިލޯ މަސްތުވާތަކެތީގެ މައްސަލައާކަން ކޯޓު އަމުރުން އެނގިއްޖެ އެވެ.
މއ. ނޫރުއް، އަބްދުﷲ ނަޝީދު، 46، މިދިޔަ މަހު ހައްޔަރުކޮށް ބަންދަށް ދިން 15 ދުވަސް ހަމަވާތީ އިއްޔެ އަލުން ބަންދަށް 15 ދުވަސް އިތުރުކޮށް ކްރިމިނަލް ކޯޓުން ނެރުނު އަމުރުގައި ބުނެފައިވަނީ ނަޝީދު އަތުން ގިނަ އަދަދެއްގެ ފައިސާ އަދި އޭނާ މަސައްކަތް ކުރާ އޮފީހުން މައްސަލައާ ގުޅުންހުރި ލިޔުންތައް ފެނިފައިވާ ކަމަށެވެ.
ސީން އަށް ދިޔަ ފުލުހުންނާއި ހެކިވެރިއެއްގެ ބަޔާނާއި އިންޓަލިޖެންސް ރިޕޯޓާއި ކޯލް ޗާޓާއި ފުލުހުން ފާސްކުރި ގެއިން 42 ކިލޯގެ މަސްތުވާތަކެތި ފެނިފައިވުމުގެ އިތުރުން ނަޝީދުގެ އެކައުންޓް ސްޓޭޓްމަންޓުތަކަށް ބަލާއިރު މައްސަލައާ ގުޅިގެން އޭނާގެ މައްޗަށް ތުހުމަތުކުރެވޭ މިންވަރަށް ހެކި ހުރިކަމަށް ބުރަވެވޭ ކަމަށް ފުލުހުން ކޯޓުގައި ބުންޏެވެ.
އެކަމަކު، ބަންދުގެ މަޖިލީހުގައި ނަޝީދުގެ ވަކީލުން ވަނީ އެ މަޖިލީހަށް ހުށަހަޅާފައިވާ ހެކި/ގަރީނާތަކަށް ބަލާއިރު ތުހުމަތުކުރެވޭ މިންވަރަށް އެކަށީގެންވާ ހެކި ހުށަހަޅާފައިނުވާ ކަމަށް ބުނެފަ އެވެ.
ޑްރަގްގެ މައްސަލައެއްގައި ނަޝީދު އުމުރަށް ޖަލަށް ލާން ހުކުމް ކުރީ 2006 ވަނަ އަހަރު އެވެ. އެކަމަކު، ވަކި ހިސާބަކުން ޕެރޯލްގެ ދަށުން އޭނާ ދޫކޮށްލީ އެވެ.
ނަޝީދު ހިމެނޭ ޑްރަގް މައްސަލާގައި ދެން ހައްޔަރުކޮށްފައިވަނީ އަހުމަދު ހުސައިން ކިޔާ މީހެކެވެ. އޭނާ ޕީއެންސީގެ ޓިކެޓުގައި އެންމެ ފަހުން ބޭއްވި މަޖިލިސް އިންތިހާބުގައި އަލިފުށީ ދާއިރާއަށް ވާދަކުރި އެވެ. ޑްރަގް ޓްރެފިކިން މައްސަލާގައި އޭނާ ހައްޔަރުކުރުމުން މިހާރު ވަނީ އޭނާ ޕީއެންސީގެ ކައުންސިލުން ވަކިކޮށްފަ އެވެ.
އަހްމަދަކީ މި މައްސަލާގައި އެންމެ ބޮޑަށް ތުހުމަތުކުރެވޭ މީހާ ކަމަށް ފުލުހުން ވަނީ ބުނެފަ އެވެ. ފުޅާދާއިރާއެއްގައި މަސްތުވާތަކެތީގެ މައްސަލަތަކުގައި އުޅޭ ބައަކާ ގުޅުން އޮތް ކަމަށް ބެލެވޭ އެ ތަކެތި ހުރީ ތަޅުންގަނޑުގެ އަޑީގައި ޖާގައެއް ހަދައި އެތަނުުގެ ތެރޭގައި ވަޅުލައިފަ އެވެ. އެ ތަކެތި ފެނުނީ އައިޖީއެމްއެޗް ކައިރީގައި ހުންނަ ފުލުހުންގެ ކުޑަކުދިންގެ މައްސަލަތައް ބަލާ ޔުނިޓުގެ އޮފީސް ކުރިމަތީގައި ހުރި ގެއަކުންނެވެ. ދެ ބުރިއަށް ހަދާފައިވާ އެ ތަނުގައި މީހުން ދިރިއެއް ނޫޅެ އެވެ.