07 އެޕްރީލް 2022 - 06:21
ޕާޓް 1: ޗެޕްޓާ: 5 - ގާތިލުންނާއި ގަތުލު
"އަހަރެން މިއޮތީ ނިދީގަ ހެއްޔެވެ؟ ގަދަ ނިންޖެއްގައި ބަނދެވި ހުވަފެނުގެ ދުނިޔެއެއްގައި ތާށިވެފައި ހެއްޔެވެ؟ ނުވަތަ މިއީ މަރުވެ ވެއްޔަށް ވެ ނެތި ދިއުމަށް ފަހު ދެން ބައްދަލުކުރާ މަރުހަލާ ހެއްޔެވެ؟ ކުރިމަތިވާ ހާލާތު ހެއްޔެވެ؟"
"ހޭލާ އިނދެ، ހޭނުލެވި ހިނގައިދާނެ ހެއްޔެވެ؟ ނުނިދި، ނިދީގައި އޮވެވިދާނެ ހެއްޔެވެ؟
"އަހަރެންގެ ހަޔާތުގައި މާޒީއެއް އޮތް ނަމަ އެ ދިރިއުޅުމުގެ އެއްވެސް ހަނދާނެއް، ހިޔާލެއް އަހަރެންގެ ސިކުނޑި އަށް ކުލަނުވަނީ ކީއްވެ ހެއްޔެވެ؟ އަހަރެންގެ މާޒީ އިން އައި ކަމަށް ބުނާ އެ މީހާ އަށް އަހަރެންގެ ދިރިއުޅުން އެވަރަށް އެނގޭއިރު އޭނާގެ އެއްވެސް ހިޔާލެއް، ހަނދާނެއް އަހަރެންގެ ބޮލުގައި ނެތީ ކީއްވެގެން ހެއްޔެވެ؟ އަދި އެ ބުނާ މީހަކަށް އަހަންނަށް ދެވުނީ ކޮން ދައުވަތެއް ހެއްޔެވެ؟ އަހަރެންގެ އިމަށް އޭނާ ހާޒިރުކުރެވުނީ އަހަރެންގެ ކޮން އާދޭހަކާއި އެދުމެއް ކޮން ގޮތަކަށް ފާޅުކުރެވިގެން ހެއްޔެވެ؟"
"ނުވަތަ އޭނާ ހާޒިރުކުރީ ކޮން ބާރަކުން ހެއްޔެވެ؟"
"އޭނާ އަކީ ހަގީގަތެއް ނަމަ، އޭނާ އެ ބުނި ގޮތަށް އަދި އޭނާ އެ ގެނެވުނު ގޮތަށް އަހަރެންނަށް އެހެން މީހުން ވެސް ގެނެވެން ޖެހޭނެއެވެ. އެކަމަކު އެގޮތަށް، އެ ބުނާ ދުއާއެއް އަހަރެން ކުރާނީ ކިހިނެތް ހެއްޔެވެ؟"
މި ހުރިހާ ސުވާލަކާއި ހިޔާލުތަކެއްގެ ތެރެއަށް ގެނބެމުން ދަނިކޮށް ނީޒާ ހޭލައްވާލީ ޖަމާލެވެ. ޖަމާލް ހިފައިގެން ގެނެސް ބެހެއްޓި ދަބަހުގެ އަޑަށެވެ. އޭގެ ތެރެއިން ދަގަނޑުތަކެއް ތެޅިލި އަޑަށެވެ. އޭނާ އެ އައީ މި ރެއަށް އޭނާ ރާވާފައިވާ ރޭވުން ތަންފީޒުކުރުމަށް ބޭނުންވާ ހަތިޔާރު ހިފައިގެންނެވެ.
އެ ދަބަސް، އަހަރެންގެ އަތަށް ދިނުމަށް ފަހު، ޖަމާލް އެ ދަބަސް ހުޅުވާލިއެވެ. އޭގައި ނެތް ތޫނުވެގެންވީ ހަތިޔާރެއް ނެތެވެ. ދަބަހުގެ ޒިބު ދަމައި ދޫކޮށް، އޭގެ އަނގަމަތީގައި ހިފައި ރަނގަޅަށް އެތެރެ ފެންނަ ވަރަށް ޖަމާލް އެ ދަބަސް ހުޅުވާލިއެވެ. ދެން ބަލައިލީ ޖެހިގެން އިން ނީޒާގެ މޫނަށެވެ. ނީޒާ ބަލަހައްޓައިގެން އިނީ ދަބަހުގައިވީ ހަތިޔާރަށެވެ.
އެކަމަކު ޖަމާލަށް މި ހުރިހާ ހަތިޔާރެއް ލިބުނީ ކިހިނެތް ހެއްޔެވެ؟ ނީޒާގެ ހިތަށް ވެސް އެރީ މިހެންނެވެ.
"ކޮން ތާކުން ހޯދިހާ ހަތިޔާރެއް؟"
ސުވާލު ނިމުނުއިރު ނީޒާ ހުރީ ޖަމާލްގެ މޫނަށް ބަލަހައްޓައިގެންނެވެ.
"ކަމުދޭތަ؟،" ނީޒާއާ ދިމާލަށް ބަލަހައްޓައިގެން ހުރެފައި ޖީބުން ނެގި ސިނގިރޭޓް ރޯކޮށް ޖަމާލް ގަދަ އަށް ދަމާލިއެވެ.
އަދި ނީޒާއާ ދިމާލަށް ހިނިތުންވެލިއެވެ.
"ނީޒާ އަށް އެނގެއެއްނުން. ނީޒާ ވަކި ކަމަކަށް އެދުނީމަ، ވަކި އެއްޗެއް ބޭނުންވީމަ، ވަކި މީހެއްގެ އެހީތެރިކަން ބޭނުންވީމަ އަދި އެކަމަށް އެދުނީމަ އެ ކަމެއް ވާނެ. އެ އެއްޗެއް، އެ މީހެއް ނީޒާ ބުނާ ތަނަކަށް، ބޭނުން ގޮތަކަށް ފޮނުވަދޭނެ،" ޖަމާލް ހީވީ ސީދާ ސާމިރުގެ ދުލުން އެ ހުރިހާ ވާހަކައެއް ކިޔައިދިންހެންނެވެ.
އުނގުގައި އޮތް އަތުގައި ނެގި ހީބިހިގަނޑާ ދިމާލަށް ބަލަހައްޓައިގެން އިނދެފައި އަނެއް އަތް ގެނެސް އެ އިހުސާސުގައި އަތް އަޅައި ފޮރުވުމަށް ފަހު ނީޒާ ހަމަޖެހިލިއެވެ. ނުވަތަ ހަމަޖެހިލަން މަސައްކަތްކުރިއެވެ.
ނަމަވެސް ކިޔާނެ އެއްޗެއް އޭނާގެ ބޮލަކަށް ދެން ނައެވެ.
"ކޮބާ ތައްޔާރުތަ؟،" ޖަމާލް ވެސް ވާހަކަ ދެއްކީ އިރުކޮޅެއް ފަހުންނެވެ. އަނެއްކާވެސް ދުންގަނޑެއް ދަމައިގަތުމަށް ފަހު އެވެ.
އެކަމަކު ނީޒާއަކަށް އަޑެއް ނީވުނެވެ.
"އޭއި..."
އިސްދަށަށް ޖަހައިގެން ހުއްޓުން އަރާފައި އިން ނީޒާއާ ދިމާލަށް ޖަމާލް އެއްލީ ކޮޅުފައެވެ. ޖަހާކަށް ނޫނެވެ. ނުވެސް ޖެހެއެވެ. ނަމަވެސް ނީޒާ ދިޔައީ ސިހިގެންނެވެ.
"ކޮބާ ކިހިނެތްވެފަ ތި ހުންނަނީ؟ ތައްޔާރު ހެއްޔޭ؟،" ސިނގިރޭޓް ބޮއެ ހުސްކޮށް އެއްލާލުމަށް ފަހު ޖަމާލް އައިސް އަނެއްކާވެސް ދަބަސް ކައިރީގައި ހުއްޓުނެވެ.
ދަބަސް ތެރޭގައި ހުރި ފާޑުފާޑުގެ ހަތިޔާރުތައް ހާވައި ބަލަން ފަށައިގަތެވެ.
"ކޯއްޗެއް ބޭނުންކުރިއްޔާހެން ހީވަނީ މިތަނުން އެންމެ ރަނގަޅުވާނީ؟،" ޖަމާލް އެންމެފަހުން ދެ ކަކޫ ޖަހައި ތިރިވެ އޭނާގެ ހަތިޔާރު ދަބަސް ކައިރީގައި ރަނގަޅަށް ހަމަޖެހިލިއެވެ.
އޭގެ ތެރޭގައި ގިނައީ މިޔަލީ ތޫނު ހަތިޔާރުގެ ފާޑުފާޑެވެ. ވަޅި އަކާއި ކަތި ވަޅިއެއް ވަކިކުރަން އެނގުނަސް ދެން ގިނައީ ނަމަކުން މީހަކަށް ކިޔައިދޭން ފަސޭހަ އަދި އެނގޭ ކަހަލަ ޒާތްޒާތުގެ ހަތިޔާރުތަކެއް ވެސް ނޫނެވެ. އަހަރެން މިހާތަނަށް ހީކޮށްގެން އިނީ މުޅި މި ވާހަކައިގައި ވެސް އެންމެ ޒަމާންވީ މުސްކުޅި ހަތިޔާރަކީ އަހަރެން ކަމަށެވެ. އެކަމަކު ޖަމާލް އެ އޮތްގެން ހާވަމުން ގެންދާ ދަބަސް ތެރޭގައި ހުރި ހަތިޔާރުތައް މަށާ މިހާރު ދިމާކުރާ ކަހަލައެވެ.
އޭނާ ނެގީ ދިވެހި ބޮޑު ކަތިވަޅި އަކާއި ކޮންކްރީޓް ފަލަ ދަގަނޑު ބުރިއެކެވެ. އެއީ ދޮންކޮށްފަ އޭނާގެ ގައިގެ އެތަން މިތަނުގައި އޭނާގެ އަމާ ޖެއްސި ކަހަލަ ދަގަނޑުބުރިއެކެވެ.
"ކޮންތާކުންހޭ ތިހުރިހާ ހަތިޔާރެއް އެއްކުރީ؟"
ނީޒާގެ އަޑު ކަންފަތުގައި ޖެހުމުން އަތުގައި އޮތް ހަތިޔާރު ދަބަސް ތެރެއަށް ދޫކޮށްލާފައި ޖަމާލް އަނެއްކާވެސް ނީޒާއާ ދިމާލަށް އެނބުރުނެވެ. ނީޒާ ބަލަހައްޓައިގެން ހުރި ގޮތުން މި ސުވާލަކަށް އޭނާ ހިތްހަމަޖެހޭ ޖަވާބެއް ނުލިބެނީސް ހުއްޓައެއް ނުލާނެއެވެ.
އެކަމަކު އެ ސުވާލަށް ދޭނެ އިތުރު ޖަވާބެއް ޖަމާލްގެ އަތަކު ނެތެވެ. ކިޔާނެ އެއްޗެއް ނޭނގި ކޮށިތުނބުޅީގެ ތެރެއިން އިނގިލިތައް ދުއްވަމުން ގޮސް ބޮލުގައި އޮތް އިސްތަށިގަނޑު ރީތިކޮށް އަނެއްކާވެސް ޖަމާލުގެ ނަޒަރު ގޮސް ހުއްޓުނީ އޭނާއާ ދިމާލަށް ބަލަހައްޓައިގެން އިން ނީޒާ އަށެވެ.
"ޖަމާލްގެ މަންމަ ވެސް ހޯދީ މިހެންތަ؟"
ނީޒާގެ މި ސުވާލުވީ ޖަމާލް އެހާ ހިތްހަމަޖެހޭ ސުވާލަކަށް ނޫނެވެ. ނަމަވެސް އޭނާ މަސައްކަތްކުރީ ދެން ވެސް ނީޒާ ހިތްހަމަޖެއްސޭގެ ޖަވާބެއް ބޮލަށް ގެންނާށެވެ.
"އާނ..."
"ހަމަ އެ މަރީނާ ވެސް ހޯދި ގޮތަށް. ބުނެފީމެއް ނުން ކަމެއް ބޭނުންވީމަ، އެއްޗެއް ބޭނުންވީމަ ނުވަތަ މީހަކު ބޭނުންވިޔަސް އެކަމަށް އެދުމުން އެ އެއްޗަކާ ހަމަ އަށް ނުވަތަ އެ މީހަކާ ހަމަ އަށް ގެންގޮސްދެއޭ،" ޖަމާލު އަނެއްކާވެސް ތަކުރާރުކޮށް އަދި ކުރިއަށް ވުރެ ސާފުކޮށް ނީޒާ އަށް ކިޔާލަ ދިނެވެ.
"އެކަމަކު ކިހިނެތް ހެއްޔޭ؟،" ދެން ވެސް ނީޒާގެ ހިތެއް ނުފުރުނެވެ.
"ކިހިނެތް ހެއްޔޭ ބޭނުން އިރަކު ބޭނުން މީހަކާ ބައްދަލުކޮށްފަ ބޭނުން އެއްޗެއް ހޯދާނީ. މަށަށް ބުނެދީބަލާށޭ އެކަން ކުރާނެ ގޮތް"
ކިޔާނެ އެއްޗެއް ނޭނގި ހުއްޓައި ނީޒާގެ ލޮލުން ކަރުނަ ހިލިގަތުމުން ޖަމާލް އަވަސްއަވަހަށް އޭނާއާ ގާތަށް ޖެހިލައި އޭނާގެ ލޮލުން ދެމިގަތް ކަރުނަ ފޮހެލަދިނެވެ. މިވީ ޖަމާލް އެއްގޮތަކަށް ވެސް ހީކޮށްގެން ހުރި ގޮތެއް ނޫނެވެ.
ޖަމާލްގެ އަތުގައި ޖަހައި ފޮޅާލާފައި ނީޒާ އަހަރެން ދޫކޮށް ތެދުވެ ދެ ލޮލުން ރަނގަޅަށް ކަރުނަތައް ފޮހެލައ ނޭވާ ރަނގަޅަށް ލައި ހަމަޖެހިލިއެވެ. އެކަމަކު އޭނާ އެއްކޮށް ހަމަޖެހުނީ އިރުކޮޅަކުންނެވެ.
"އަހަންނަކަށް ނޭނގޭ ނީޒާ އަށް ނޭނގޭ ކަމެއް،" ޖަމާލް ނީޒާއާ ދިމާލަށް އެނބުރުނެވެ.
ނަމަވެސް ނީޒާގެ މާ ބޮޑު ޝައުގުވެރިކަމެއް މިހާރު އެއްވެސް ކަމަކަށް ނެތް ކަހަލައެވެ.
"އަސްލު މަށަކަށް ވެސް ނޭނގޭ ކިހިނެތްކަމެއް އެހެން އެވަނީ. ކޮންމެވެސް މީހަކު ބުނީ އެގޮތަށް، މިސާލަކަށް އަހަރެން ކަމަކަށް ބޭނުންވީމަ ނުވަތަ އެއްޗެއް ބޭނުންވިޔަސް.....،"
"ކާކުތަ އެހެން ބުނީ؟،" ޝައުގުވެރިކަމުގެ ރޯޅިގަނޑަކާއެކު ނީޒާ ކުއްލިއަކަށް ޖަމާލްއާ ދިމާލަށް އެނބުރި އޭނާގެ ވާހަކަ މެދުކަނޑާލިއެވެ.
"ނޭނގޭ ކާކު ކަމެއް ވެސް. ހުދު ކުލައިގެ... "
"ހުދު ކުލައިގެ ގަމީހަކާއި ކަޅުކުލައިގެ ފަޓުލޫނެއް ލައިގެން ހުރި މީހެއް ތަ؟،" ނީޒާގެ ނޭވާ ހީވީ ކުއްލިއަކަށް ކުރުވިހެންނެވެ.
"އާނ،" ޖަމާލްގެ ޖަވާބު މިވަރަށް ކުރުވިޔަސް މިހާރު ނީޒާގެ ހިތް އެ ހެރީ ހިސާބަކަށް ފުރިފައެވެ.
އެކަމަކު ބާކީ ހުރި ސުވާލުތައް ފެށުމުގެ ކުރިން ޖަމާލް ހަނދާންކޮށްދިނީ އެމީހުންގެ އަތުގައި އެ ހުރިހާ ސުވާލަކަށް މިވަގުތު އެ ވަގުތެއް ނެތް ކަމެވެ.
"އަހަރެންގެ ބޮލުގައި ވެސް އެބަހުރި ވަރަށް ބައިވަރު ސުވާލު. މަށަކަށް ވެސް ނޭނގޭ މިތަނުގައި މި ވަނީ ކީއްކަމެއް. އެކަމަކު މަށަށް ހީވަނީ އަހަރެން އޭރު ވެސް އަދި މިހާރު ވެސް މި ކިޔާ ދޭ ވާހަކަތައް މިހާރު ނީޒާ ގަބޫލުކުރަންވެއްޖެހެން،" ޖަމާލް ކުރިއަށް ޖެހެމުން އައިސް ނީޒާގެ ދެ ކޮނޑުހުޅުގައި ދެ އަތުން ހިފައި ބާރުކޮށްލިއެވެ.
"މިއީކީ ވިލިނގިއްޔެއް ވެސް ނޫން. އަދި ރޭގަނޑެއްހެން ހީވިޔަސް، މިއީ ރޭގަނޑެއް ވެސް ނޫން."
ޖަމާލާ އެކު ނީޒާ ވެސް ހުއްޓުންއެރީއެވެ. ދެ މީހުން އެކަކު އަނެކެއްގެ މޫނަށް މިގޮތަށް ބަލަހައްޓައިގެން ތިބެފައި ނީޒާ ދޫކޮށް ޖަމާލް އެނބުރިގެން ގޮސް ނެގީ ކުރިން ވެސް ނެގި ކަތިވަޅި އާއި ކޮންކްރީޓް ދަގަނޑުބުރި އެވެ. ކަތިވަޅި ދަބަސް ތެރެއަށް ލައި ޒިބު އެޅުވުމަށް ފަހު ދަބަސް ނަގައިގެން ޖަމާލް ތެދުވީ ދަގަނޑުބުރި އަތަށް ހެޔޮވަރުކުރަމުންނެވެ.
"އަދިވެސް ގަބޫލުނުކުރެވޭނަމަ މަށާ އެކު ނަޔަސް މައްސަލައެއް ނެތް. އެކަމަކު އަހަންނަކަށް ނެތް މަޑުކުރެވޭކަށް. އަހަރެން ބޭނުން އޭނަ ހޯދަން. އަދި މިތަނުން ސަލާމަތްވާނެ ގޮތެއް ވެސް ހޯދަން،" ނީޒާ އާއި ބީޗު ހަޓު ދޫކޮށް ޖަމާލް ދުރަށް ހިނގައިގަތެވެ.
ފަސްއެނބުރިބެލުމެއް ނެތެވެ.
ދުރުގައި އޮތް އަނދިރިގަނޑަށް ވަދެ އޭނާ ގެއްލުމާއެކު ނީޒާ ވެސް އެ ދިމާލަށް ދުއްވައިގަތެވެ. ދުވާލެއްގެ އަލިކަމަށް ޝައުގު އުފެދުނު އެ ހިތުގައި މިހާރު އޭގެ ކަންފުޅެއް ވެސް ނެތް ފަދައެވެ.
އެންމެފަހުން ޖަމާލް އޭނާގެ މަޅީގައި ނީޒާ ހަމަ ރަނގަޅަށް ވެސް ޖެއްސީއެވެ. ޖަމާލަށް ވުރެ މި ވާހަކަ އަށް ހުރިހާ ގޮތަކުން ވެސް މުހިންމީ ނީޒާ ކަމާއި ޖަމާލް އެ ދައްކާ ވާހަކައިގައި އެއްވެސް ހަގީގަތެއް ނެތްކަން އަހަރެން ނީޒާ އަށް ވިސްނައިދޭނެ އިތުރު ގޮތެއް މިތަނުގައި މިހެން އޮވެ ކިޔައިދޭކަށް މަށަކަށް ނޭނގެއެވެ.
މެންދަމުގެ މި ވަގުތަކީ އަހަރެންގެ ބާރު ހިނގާ ވަގުތެއް ނޫނެވެ. މިއީ މުޅިން އެހެން ބާރުތަކެއްގެ އަމުރުމަޢުރޫފު ހިންގާ ވަގުތެކެވެ. އެންމެ ރަނގަޅު ގޮތަކީ އަހަރެންގެ މި ސަންގުމަރުމަރުގެ ދަރުބާރުގައި، އަހަރެންގެ މި އިމުގައި މަޑުކުރުމެވެ. އެތައް ސަތޭކަ އަހަރެއް ފާއިތުވެގެންދިޔައިރުވެސް ނީޒާ އާއި ޖަމާލްގެ އަސްލަށް ހިމާޔަތް ލިބުނު އިމުގައި މަޑުކުރުމެވެ. އެކަމަކު މިނިވަންކަން ލިބި އިހުތިޔާރުކުރުމުގެ އަމިއްލަ ބާރު ދެ އަތާއި ހިތާއި ބޮލާއި ސިކުނޑިއަށް ލިބުމުން އިންސާނާގެ ނަފުސު ތަޣައްޔަރުވެގެންދާ ގޮތް ބަލާށެވެ.
މިނިވަންކަން ހޯދަން ކަމަށް ބުނެ ގޮސް އަނެކާގެ މިނިވަންކަން ފޭރިގަތުމަކީ ކޮން ކަހަލަ ތަބީއަތަކާއި ތަރުތީބަކާއި ތަހުޒީބެއް ހެއްޔެވެ؟
** *** *** **
ނީޒާ އާއި ޖަމާލް ހިނގަމުން ދިޔައީ ހުދު ދޮންވެލީގެ ގޮނޑުދޮށުންނެވެ. ހަނދުވަރު ކަކުނިތައް ދެ މީހުންގެ ފިޔަވަޅުތަކާ އެކު އެސޮރުމެންގެ ހޮރުހޮރުތަކަށް ދުވެ، ކުއްލިކުއްލިއަށް ގެއްލެމުންދެއެވެ. ނަމަވެސް މިއީ ހަނދުވަރުފޮއެއް ނޫނެވެ. ސާދަވިލޭރެއެއްގެ ހަނދެއް ނެތެވެ. ނަމަވެސް އެ އަނދިރިގަނޑަށް ވަދެގެން ކުރިއަށްދާ ވަރަކަށް ހީވަނީ ހަނދުވަރީ އައްޔަކުން މުޅި ހިސާބުގަނޑު މަޑުމަޑުން ދިއްލެމުންދާހެނެވެ. ފިލަން ދުވަމުން ދާ އެ ކަކުނިތަކުގެ ލޯތައް ކުލަކުލައިން ނިވި ދިއްލެމުންދާއިރު ހީވަނީ ގުރަހައިގެ ތަރިތަކާ އެކު ފަޒާގެ ހިތްގައިމުކަން މުޅި ބިމަށް ވެސް ބަންޑުންވެ، ފެތުރިގެން އޮތްހެންނެވެ.
ނަމަވެސް ނީޒާ އާއި ޖަމާލް ކުރިއަށް ހިނގަމުން ދިޔައީ ހަނދުވަރުކުރަފިތަކެއްހެން އަތާއި އަތް ޖޯޑުކޮށް ސަކަރާތް ޖަހަމުން ހެމުން ހެމުންނެއް ނޫނެވެ. ފަހަތުން ހިނގަމުން އައިސް ނީޒާ ޖަމާލްއާ އަރައި ހަމަކުރިއިރު އޭނާގެ ހިތް ހީވަނީ މި ހަނދުރުވަރުގެ ފުސް އަލިކަމަށް ފުންމާލަފާނެހެންނެވެ.
ހިސާބަކަށް ދުރަށް ދެވުމުން ނީޒާ މަޑުކޮށް، ފަސްއެނބުރި ބަލައިލިއެވެ. އެމީހުން ދޫކޮށްލާފައި އައި ބީޗު ހަޓު މިހާރު ލޮލަކަށް ވެސް ނުފެނެއެވެ. އެ ދިމާލުގައިވީ ހުރިހާ އެއްޗެއް ކަނު އަނދިރިކަމެއްގެ ތެރެއަށް ވަދެ ގެއްލިފައެވެ.
ނީޒާ އަނެއްކާވެސް އެނބުރިގެން ގޮސް ޖަމާލްއާ އަރައި ހަމަކޮށްލިއެވެ. ބޭއިހުތިޔާރުގައި އޭނާގެ އަތުގައި ހިފުނެވެ. ޖަމާލް ހުއްޓި އެ އަތާ ދިމާލަށް ބަލައިލުމުން ނީޒާ ކުއްލިއަކަށް އަތް ދޫކޮށްލިއެވެ. އަދި އިސް ދަށަށް ޖެހިއެވެ.
"އާދޭ މަށާ އެއްވަރަކަށް. ވަގުތެއް ނެތް އިނގޭ"
ޖަމާލް ނީޒާގެ މޫނަށް ބަލަހައްޓައިގެން ހުރެފައި އެނބުރި އަނެއްކާވެސް ކުރިއަށް ހިނގައިގަތެވެ. ނީޒާ ވެސް ހިނގައިގަތެވެ.
އެއަށް ފަހު އިރުކޮޅެއް ނުވެއެވެ. ދުރުން ބީޗު ހަޓެއް ދައްކާލައިފިއެވެ. އެމީހުން ދޫކޮށްލާފައި އައި ކަހަލަ ހަޓެކެވެ. ތަފާތަކީ މިތަނުގައި ފާނޫޒެއް އެލުވާފައި އޮތް ކަމެވެ. ރަން ރީނދޫ ކުލަކުން އެތަން އޮތީ ދިއްލިފައެވެ. އަދި މި ހަޓުގައި ދެ ޖިންސުގެ ހައެއްކަ މީހުން މަޑުކޮށްލައިގެން ތިއްބެވެ. އެމީހުންނަށް ޖަމާލް އާއި ނީޒާ ދުރުން ފެނުމުން ކަޅިޖަހާނުލައި އެނބުރި ބަލަން ފެށި ގޮތަށް އެ ދެ މީހުން ގޮސް މި ހަޓާ އަރައި ހަމަކުރިއިރު ވެސް ތިބީ އެގޮތުގައި ހުއްޓުން އަރައިފައެވެ. ޖަމާލްގެ އަތުގައި އޮތް ދަގަނޑުބުރި އެމީހުންގެ ލޮލުގައި އަޅައިގަތީ ދެ މީހުން އައިސް ކައިރިއަށް މަޑުކޮށްލުމުންނެވެ. އެއާއެކު މި ހަޓު ތެރޭގައި ތިބި މީހުންގެ ތެރެއިން އެންމެ ބިޔަކޮށް ވަރުގަދަކޮށް ހެދިފައި ހުރި މީހާ ފުންމައިގެން އައިސް ޖެހުނީ ޖަމާލް އާއި ނީޒާގެ ކުރިމައްޗަށެވެ.
ނީޒާ ބިރުން ގޮސް ޖަމާލްއާ ގާތަށް ޖެހި އޭނާގެ ފަހަތުގައި މަޑުކޮށްލިއެވެ. ނަމަވެސް ހަމަޖެހިފައި ހުރި ޖަމާލް ބަލައިލިގޮތަކުން ނީޒާގެ އެ ހާސް ނޭވާ ދޫކޮށް ހަޓުގައި ތިބި މީހުންގެ ނަޒަރުން ސަލާމަތްވެ މަޑުކޮށްލިއެވެ.
ކުރިމަތީގައި ހުއްޓި ހުރި މީހާއާ ދިމާލަށް އެނބުރި ޖަމާލް އޭނާއާ ދިމާލަށް އެއްލައިލީ އަނެއް އަތުގައި އޮތް ހަތިޔާރު ދަބަހެވެ. ޖަމާލާ ދިމާލަށް އިރުކޮޅެއް ވަންދެން ބަލަހައްޓައިގެން ހުރެފައި އަނގައިން ނުބުނެ އެ ދަބަސް ނަގައިގެން ގޮސް އެމީހާ ވަނީ ހަޓަށެވެ. ހައިވެ ހާންތިވެފައި ތިބި ބަޔަކަށް ބަނޑުފުރާމުއްތިކުރެވޭނެ ގޮތެއް ކުއްލިއަކަށް ފެނުނު ކަހަލައެވެ. އެ ދަބަސްގަނޑު ހުޅުވައި ބަލައި އޭގެ ތެރޭގައި ހުރި ހަތިޔާރުތައް ހާވައި އޭގެ ތެރެއިން ފަހަރަކު މީހަކު ހަތިޔާރުގެ އާލާތްތައް ނަގައި އަތަށް ހެޔޮވަރުކުރަމުން ގެންދިޔައެވެ.
އިރުކޮޅެއް ނުވެ ހަޓް ތެރެއިން ދެން ނުކުމެގެން އައީ އަންހެނެކެވެ. ކުރު ހެދުމުގައި، މުޑުދާރުކަންމަތީގައި ހުރި އިސްކޮޅުން ދިގު ހިމަތޮޅި ސިފަހުތުރު އަންހެނެކެވެ. އޭނާ އައިސް މަޑުކޮށްލީ ޖަމާލްގެ ލޭގައިވީ ހޫނުކަން އިހުސާސުވާހާ ގާތުގައެވެ. އެ މުޑުދާރު ބަބުރުވަސްގަނޑާއެކު ޖަމާލް އޭނާގެ މޫނު އެހެން ދިމާލަކަށް އަނބުރާލިއެވެ. އެއާއެކު މި އަންހެން މީހާ އަނގަ ހުޅުވައި ދޫ ނެރެ، ޖަމާލްގެ ކަންފަތްދޮށަށް ގުދުވެގެން އައިއިރު ހީވަނީ ވިންދުޖަހަމުން ދިޔަ އޭނާގެ ކަރަށް ހަމަލާ ދީ ޝިކާރަކޮށްލަން ތައްޔާރުވަމުން ދިޔަ ސިންގާ ހަރުފައެއް ހެންނެވެ.
ޖަމާލްގެ ކަންފަތުގައި ދޫލައި ސޮނިގަނޑެއް ހާކާލުމަށް ފަހު އޭނާ ކީ އެއްޗެއް ކިޔައި ނިމުމުން ޖަމާލް އެތަނުން ފެއްސިގެން ކުރިއަށް ހިނގައިގަތެވެ. ނީޒާ އަށް ހުރެވުނީ އެ އަންހެން މީހާއާ ދިމާލަށް ބަލަހައްޓައިގެން ހުއްޓުން އަރައިފައެވެ. ޖަމާލް ފަހަތުން އަނެއްކާވެސް ދުއްވައިގަތުމަށް ހޭވެރިކަންވީ މި އަންހެން މީހާ އެނބުރި ބަލައި ދިން ހިނިތުންވުމާއެކު ހިތަށް ވެއްދި ބިރުވެރިކަމެވެ.
"އެއީ ކޮން ބައެއް؟ އަދި ކޮބާ މީގެ މާނައަކީ؟،" ޖަމާލްއާ އަރައި ހަމަކޮށް ނީޒާ ސުވާލުކުރަން ފެށިއެވެ.
"އެއީ ކޮން ބައެއްތޯ ބެލުން މުހިންމެއް ނޫން. އަހަރެމެންނަށް މުހިންމީ މަރީނާއާ ހަމަ އަށް އަހަރެމެން ގެންގޮސްދޭނެ އާރުކާޓީ މިތަނުން ހޯދުން. އެއީ ކުޑަ ފިރިހެން ކުއްޖެއް،" އެނބުރިގެން އައިސް ޖަމާލް ނީޒާ ހުއްޓުވާލިއެވެ.
ނީޒާ ހަމަޖެހިލުމުން ޖަމާލް އަނެއްކާވެސް ކުރިއަށް ހިނގައިގަތެވެ. ނީޒާ އަށް އެނބުރި ބަލައިލެވުނީ ފަސްދީފައި އައި ހަޓަށެވެ. އެތަނުގައި މިހާރު އެއްވެސް ބަޔަކު ނެތެވެ. ފާނޫޒެއްގެ އަލިކަމެއް ވެސް ނެތެވެ. އެއާއެކު ނީޒާ ކުރުފިޔަވަޅުތަކެއް ޖަހައި ކުރިއަށް ހިނގައިގަތެވެ.
އަނެއްކާވެސް ހަޓެއް ދުރުން ފާޅުވެއްޖެއެވެ. މި ހަޓުގައި ވެސް މީހުންތަކެއް ތިއްބެވެ. އެކަމަކު އަލިކަމެއް ނެތި ހިޔަނިތަކެއްގެ ސިފައިގައިވީ ބައެކެވެ. ލޯ ދިއްލެމުން ދިޔަ ދެވިތަކެއްގެ ސިފައިގައި ތިބި ބައެކެވެ. ޖަމާލް މިފަހަރު އެދިމާލަކަށް ނުވެސް ބަލައެވެ. ނީޒާ ހުއްޓި އެ ދިމާލަށް ބަލަން ހުރެފައި އަނެއްކާވެސް ޖަމާލް ފަހަތުން ދުއްވައިގަތެވެ. ޖަމާލް ހޯދަން އުޅޭ އާރުކާޓީ ފެނުނީ އެއަށް ފަހު ދެން އެމީހުންނާ ބައްދަލުވި ހަޓުންނެވެ. އެތަނުގައި އިނީ އާރުކާޓީ އެކަންޏެވެ. އެއީ 11 އަހަރުގެ ކުޑަ ފިރިހެން ކުއްޖެކެވެ.
ޖަމާލް އާއި ނީޒާ ފެނުމުން އެ ކުއްޖާ އިރުކޮޅެއް ވަންދެން އެމީހުންނާ ދިމާލަށް ބަލަހައްޓައިގެން އިނެވެ. އޭނާގެ ދެ އަތުގެ ބަނޑުފުށް ހީވަނީ އަނގުރުން ދިއްލިފައިވާހެންނެވެ. ޖަމާލް އާއި ނީޒާއާ ދިމާލަށް ބަލަހައްޓައިގެން އިނދެފައި ކުއްލިއަކަށް ތެދުވެ އޭނާ ދެން ދުއްވައިގަތީ ހޭޅިފަށުގައި ހެދިފައިވީ މަގޫގަސްތަކުގެ ތެރެއަށެވެ. ޖަމާލް އޭނާ ފަހަތުން ދުއްވައިގަތުމުން ނީޒާ ވެސް އެ ދެ މީހުންގެ ފަހަތުން ގޮސް ވަނީ މަގޫގަސްތަކުގެ ތެރެއަށެވެ.
ގަސްތަކާއި އެ އަނދިރިކަމުގެ ތެރެއަށް އިރުކޮޅަކަށް ގެއްލުނުހެން ހީވިއެވެ. ދެން ފެނުނީ އަނެއްކާވެސް ދުރުންނެވެ. ދުރުން ކުއްލިއަކަށް ފާޅުވި ފަން ބައު ޖިފުޓިގަނޑަކަށް ގޮސް އެ ކުއްޖާ ވަންނަނިކޮށެވެ.
ޖަމާލް ގޮސް ޖިފުޓިގަނޑަށް ވަނުމާއެކު މީހަކު އަލިފާންދަނޑިއެއް އަޅައި ފުޅިބައްތިއެއް ރޯކޮށްލިއެވެ. ނީޒާ ގޮސް ޖިފުޓިއަށް ބޯދިއްކޮށްލިއިރު އެ ފުޅިބައްތިއާއެކު ޖަމާލްއާ ދިމާލަށް އެނބުރި ހުރި އަންހެނަކީ މަރީނާއެވެ. ނީޒާ އަށް އެއީ ކާކުކަން ނޭނގުނަސް ޖަމާލަށް ހުރިހާ ކަމެއް ވެސް ޔަގީނެވެ. އަތުގައި އޮތް ދަގަނޑުބުރިގަނޑު އަތަށް ހެޔޮވަރުކުރަމުން ޖަމާލް އެތެރެއަށް ވަދެއްޖެއެވެ.
"ޖަމާލް ދޭ އިހަށް ބޭރަށް،" ޖަމާލްއާ ދިމާލަށް ބަލަހައްޓައިގެން ހުރި ފިރިހެން ކުއްޖާ ގާތު މަރީނާ ބުނެލިއެވެ.
އެއާއެކު ޖަމާލްއާ ދިމާލަށް ކަޅިއަޅަމުން ގޮސް އެ ފިރިހެން ކުއްޖާ ޖިފުޓިން ބޭރަށް ނުކުމެއްޖެއެވެ.
"މަށަށް އެނގޭ އަބަދުވެސް ކަލޭ އަންނާނެކަން. އެކަމަކު ޖަމާލަށް ހަމަ ރަނގަޅަށް އެނގޭނެ އަހަރެން މިތަނުގައި މިއަށް ވުރެ އިތުރަކަށް މަރެއް ނުވާނެކަން،" ތޮށަލީގެ ފުރާޅުގަނޑުގައި އެލުވާފައި އޮތް ބުޅިގަނޑެއްގައި ފުޅިބައްތި އެލުވުމަށް ފަހު މަރީނާ ގޮސް ފަތްޖެހިއެނދެއްގައި އިށީނެވެ.
ޖަމާލަށް ހުރެވުނީ ކިޔާނެ އެއްޗެއް ނޭނގިފައެވެ. އޭނާގެ ލޯ މައްޗަށް ސިފަވަމުން ދިޔައީ މި ޖިފުޓީގައި އެއް އިރެއްގައި އޭނާގެ އަމާ އޭނާ އަށް ދިން އަނިޔާތަކެވެ. ނުވަތަ މިއީ އެ ޖިފުޓިގަނޑެއްގެ ތެރޭގައި ޖަމާލް އޭނާގެ މި މަންމަ އަށް އަނިޔާކޮށް އޭނާ މަރާލި ތަނެވެ.
"މިއީ މަރާއި ލޭގެ ދަރުބާރު،" މަރީނާގެ އަޑަށް ޖަމާލް އަނެއްކާވެސް އޭނާއާ ދިމާލަށް އެނބުރުނެވެ. އަދި މަޑުމަޑުން މަރީނާއާ ދިމާލަށް ކުރިއަށް ޖެހެން ފެށިއެވެ. ނީޒާ އޭނާ ހިފަހައްޓަން މަސައްކަތްކުރުމުން އެ އަތް ފޮޅާލައިފައެވެ.
ޖަމާލް ގޮސް މަރީނާގެ ކުރިމަތީގައި ހުއްޓުނެވެ. އޭނާގެ އަތުގައި އޮތް ދަގަނޑުގަނޑު ދޮންވެ ދިއްލިއްޖެއެވެ.
"ކިތައް ފަހަރަށް މަގޭ ދުވަސް ދުއްވާލެވުނީމަތަ ޖަމާލްގެ ހިތް ފުރޭނީ؟ ކިތައް ސަތޭކަ އަހަރުވަންތަ ޖަމާލް އަހަރެން އެއްގޮތަކަށް ކަތިލަކަތިލަ ހުންނާނީ،" ދޮންވެފައި އޮތް ދަގަނޑުގަނޑުގައި މަރީނާ އެއް އަތުން ހިފިއެވެ. އަދި އެ ދަގަނޑު ގެންގޮސް އޭނާގެ މޭގައި ޖައްސާލިއެވެ.
މަރީނާ ދެން ބަލައިލީ ނީޒާއާ ދިމާލަށެވެ. ނީޒާ ސިހިގެން ގޮސް ޖިފުޓިން ބޭރަށް ނުކުމެއްޖެއެވެ. ފެންނަމުން ދިޔަ މަންޒަރުތަކާ އެކު ހިތަށް ވެއްދި ބިރުވެރިކަމުގައި އޭނާ އަށް ދުއްވައިގަނެވުނީ އެނބުރި އައި ދިމާލަށެވެ. މަގޫގަސްތަކުގެ ތެރެއިން ގޮސް އަނެއްކާވެސް ގޮނޑުދޮށަށް ނުކުމެވިއްޖެއެވެ.
ފަސްއެނބުރި ބަލައިލެވުނުއިރު ދުރުން ފެންނަން ހުރި ޖިފުޓީގައި އެވަނީ މިހާރު ސިންގާ ހުޅުގަނޑެއް ރޯވެފައެވެ. ހަދާނެ ގޮތް ހުސްވެ ދާނެ ދިމާލެއް ނޭނގި ނީޒާ ދެވުނު ދިމާލަކަށް ދުއްވައިގަތެވެ. ބީއްސަމުންދިޔަ ރާޅުތައް ބޮޑުވެ ރާޅުތައް ބިންދަން ފަށައިފިއެވެ. ލޭގެ ރާޅެވެ.
އިރުކޮޅެއް ނުވެ ދުރުން ގަދަ ހުދު އަލީގެ ވަށްބުރެއް ދައްކާލިއެވެ. އެއާއެކު ދެން ހީވީ އެ އަލިބުރު އެނބުރިގަތުމާއެކު ނީޒާ އޭގެ ތެރެއަށް ޖަހައިގެން ގެންދިޔަހެންނެވެ.
ނީޒާ އާއި އަލިބުރު ވެސް ކުއްލިއަކަށް ގެއްލި މުޅިތަން އެއްކޮށް އަނދިރިވެއްޖެއެވެ.