01 އެޕްރީލް 2022 - 19:23
ދިރާގުން މި އަހަރުގެ ރޯދައަށް ހާއްސަ އޮފާތަކެއް މިއަދު ތައާރަފުކޮށްފި އެވެ.
އެ އޮފާތަކުގެ ދަށުން ދިރާގު ފައިބަ ބްރޯޑްބޭންޑް ގެންގުޅޭ ކަސްޓަމަރުންނަށް 50 ޕަސެންޓް އިތުރު ޑޭޓާ އެއްވެސް އިތުރު ޗާޖަކާ ނުލައި ލިބޭނެ އެވެ. މިއީ ރޯދަ މަހު ގިނަވަގުތު ގޭގައި ހޭދަކުރަން ޖެހޭތީ އިންޓަނެޓް ބޭނުން ކުރުން ފަސޭހަ ކުރުމަށް ތައާރަފުކުރި ޕްލޭނެއް ކަމަށް ދިރާގުން ބުންޏެވެ.
ފައިބަ ބްރޯޑްބޭންޑް ކަސްޓަމަރުންގެ އިތުރުން ދިރާގުގެ މޮބައިލް ކަސްޓަމަރުންނަށް ހާއްސަ ޕްލޭންތަކެއް ވެސް ވަނީ ތައާރަފުކޮށްފަ އެވެ.
- މޯބައިލް އެޕުން ޑޭޓާ ހަދުޔާ ކުރުމުން 100 ޕަސެންޓް އިތުރު ޑޭޓާ ހިލޭ.
- ސަޅި ޕްރިޕެއިޑް ކަސްޓަމަރުންނަށް ކޮންމެ ހަފުތާ ބަންދެއްގައި އިތުރު ދެ ޖީބީ ޑޭޓާ.
- އަމިއްލަ ޕޯސްޓްޕެއިޑް ކަސްޓަމަރުންނަށް، އަމިއްލަ ވޮއިސް ޕްލަސް ޕްލޭނުން 50 ޕަސެންޓް ޑިސްކައުންޓް.
ދިރާގުން ބުނީ ރޯދަ މަހަކީ އެހެން މަސްތަކާ އަޅާ ބަލާއިރު އެ ކުންފުނީގެ އައިޕީ ޓީވީ، ދިރާގު ޓީވީ ބަލާ މީހުންގެ އަދަދު އިތުރު މަހެއް ކަމަށެވެ. އެހެންވެ ރޯދަ މަހު، ދިރާގު ޓީވީގެ ހުރިހާ ޕެކޭޖަކުންވެސް އެ ޓީވީން ފޯރުކޮށްދޭ ހުރިހާ ޗެނަލެއް އިތުރު ޗާޖަކާ ނުލައި ބެލޭނެ ގޮތް ވަނީ ހަދައިފަ އެވެ.
ދިރާގު ޓީވީގެ ގޯލްޑް ޕެކޭޖް ނަގާފައިވާ ކަސްޓަމަރުންގެ މެދުގައި ލަކީޑްރޯއެއް ވެސް ނަގާނެ އެވެ. އެ ލަކީޑްރޯއިން ހޮވޭ ފަސް ކަސްޓަމަރަކަށް ރޯދަ ވީއްލުމެއް ލިބޭނެ އެވެ.
މީގެ އިތުރުން އެހެން އަހަރުތަކާ އެއްގޮތަށް ދިރާގު ކަސްޓަމަރުންނަށް ދިރާގު ޕޭ އާއި އެ ކުންފުނީގެ ވެބްސައިޓް (https://bit.ly/3qPogbx) މެދުވެރިކޮށް ފިތުރު ޒަކާތް ދެއްކޭނެ އެވެ. އަދި ޕްރިޕެއިޑް ކަސްޓަމަރުންނަށް *454*5# އަށް ގުޅައިގެން ވެސް ފިތުރު ޒަކާތް ދެއްކޭނެ އެވެ.