30 މާޗް 2022 - 13:08
ކުރީގެ ރައީސް އަބްދުﷲ ޔާމީންގެ ވެރިކަމުގައި ހައްޔަރުކުރި ސިޔާސީ ބޭފުޅުން މިނިވަންކުރުމަށް ސުޕްރީމް ކޯޓުން ނެރުނު "ފެބްރުއަރީ 1 ގެ އަމުރު" ގައި ބައިވެރިވެވަޑައިގެންނެވި ފަނޑިޔާރުން އަދުލު އިންސާފުގެ ދާއިރާއިން މުޅި އުމުރަށް ދުރުކުރަން ޖެހޭ ކަމަށް ޔާމީން ވިދާޅުވެއްޖެ އެވެ.
ފެބުރުއަރީ 1، 2018 ގައި ސުޕްރީމް ކޯޓުން އަމުރު ނެރުނީ، އިދިކޮޅު ސިޔާސީ ލީޑަރުން ހިމެނޭ ގޮތަށް ބަންދުގައި ތިބި ނުވަ ގައިދީއަކު ދޫކޮށްލުމަށެވެ. އޭގެ އިތުރުން، ރައްޔިތުންގެ މަޖިލީހުން ވަކިވެފައިވާ ކަމަށް އިލެކްޝަންސް ކޮމިޝަނުން އޭރު ކަނޑައަޅާފައިވާ 12 މެމްބަރުންގެ އެ މަގާމުން ވަކި ނުވާ ކަމަށް ވެސް ކަނޑައެޅި އެވެ.
ކުރެންދޫ ކައުންސިލްގެ ރައީސްގެ ގޮނޑި ޕީޕީއެމަށް ކާމިޔާބުވުމުގެ އުފަލުގައި އެ ރަށުގައި ރޭ ބޭއްވި ޖަލްސާގައި، ރާއްޖޭގައި މިހާރު މިނިވަން މުވައްސަސާއެއް ނެތް ކަމަށް ވިދާޅުވެ ފަނޑިޔާރުގެތަކަށް ވެސް ފާޑުވިދާޅުވި އެވެ.
ޔާމީން ވިދާޅުވީ ކޯޓުތަކަށް އޭރު އޮތް ސަރުކާރުގެ ނުފޫޒު ފޯރާ ވަރު، އިދިކޮޅުގައި އޮތް ފަރާތްތަކުން ސާބިތުކޮށްދިނީ ފެބްރުއަރީ 1 ގެ އަމުރުން ކަމަށެވެ.
"ޔާމީން ނުފޫޒު ފޯރުވާއިރު ޔާމީން ވައްޓާލުމަށް ކޯޓުތަކުގެ ތެރެއިން ނެރެފައި އޮތް ނިންމުމެއް އެއީ. އެހެންވީމާ ޔާމީންތާ ކޯޓުތަކަށް ބާރު ފޯރުވީ،" ވެރިކަމުގައި ކުރިމަތިވެވަޑައިގަތް އެންމެ ބޮޑު އެއް ގޮންޖެހުމަށް އިޝާރާތްކުރައްވައި ޔާމީން ވިދާޅުވި އެވެ.
ޔާމީން ތުހުމަތުކުރެއްވި ގޮތުގައި ފެބްރުއަރީ 1 ގެ އަމުރަކީ މިވަގުތު ވެރިކަމުގެ ލީޑަޝިޕާ ގުޅޭ ހުރިހާ ބޭފުޅުން ގުޅިގެން ކުރެއްވި ކަމެކެވެ.
"އެ ހުކުމް ނެރުނު މީހުން އެއްވެސް ގޮތަކަށް އަދުލު އިންސާފުގެ ދާއިރާގައި ދުވަހަކު ވެސް ކައިރިކުރާކަށް ނުވާނެ،" ސްޕްރީމް ކޯޓުގެ ހުރިހާ ފަނޑިޔާރުން ސޮއިކުރެއްވި އަމުރާ ބެހޭ ގޮތުން ޔާމީން ވިދާޅުވި އެވެ.
އެ ފަސް ފަނޑިޔާރުން އަދުލުއިންސާފުގެ ދާއިރާގައި ބައިތިއްބަން ހެޔޮނުވާނެ ކަމަށް ވިދާޅުވުމަށް ފަހު ޔާމީން ވަނީ އޭގެ ތެރެއިން ބައެއް ފަނޑިޔާރުން އެ މަނިކުފާނު ސުޕްރީމް ކޯޓުގައި ބޭތިއްބެވީ ކީއްވެތޯ ސުވާލު އުފައްދަވާނެ ކަމަށް ވިދާޅުވެފަ އެވެ.
ޔާމީން ވިދާޅުވި ގޮތުގައި އެ ފަނޑިޔާރުން މަގާމުގައި ބޭތިއްވީ ރަނގަޅު މަސައްކަތްތަކެއް ކުރެއްވީތީކީ ނޫނެވެ. އެންމެ އިސްކޮށް ތިއްބެވި ދެ ފަނޑިޔާރުންގެ މައްޗަށް ރިޝްވަތުގެ ބޮޑެތި ތުހުމަތުތަކެއް ހުރި ކަމަށާއި އެކަން ސާބިތުވާ ވަރަށް ހެކި ހުއްޓަސް، ޔާމީން ވިދާޅުވި ގޮތުގައި ދެން ތިއްބެވި ތިން ބޭފުޅުންނަށް އެ ތުހުމަތެއް ނެތެވެ.
ޔާމީން ވިދާޅުވީ ސްޕްރީމް ކޯޓުގެ ހުރިހާ ފަނޑިޔާރުން އެއްފަހަރާ ދުރުކޮށްފި ނަމަ، އެކަން ވާނީ "މުޅި ދުނިޔެ ފުންމައިގެންދާވަރުގެ" ކަމަކަށެވެ.
ޔާމީން ވިދާޅުވި ގޮތުގައި އަމުރު ނެރުނީ ހަމައެކަނި އިދިކޮޅުގައި އޮތް ފަރާތްތައް ގުޅިގެންނެއް ނޫނެވެ. ޔާމީން ތުހުމަތުކުރެއްވި ގޮތުގައި އެއީ އިންޑިއާ ސަރުކާރާ ވެސް ގުޅިގެން ކުރި ކަމެކެވެ.
ސްޕްރީމް ކޯޓުގެ އަމުރުގައި ސޮއިކުރެއްވީ އޭރުގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އާދަމް މުހައްމަދާއި އަލީ ހަމީދާއި އަހުމަދު އަރީފު އަދި ޑރ. އަހުމަދު އަބްދުﷲ ދީދީ އެވެ. މި ބޭފުޅުންގެ ތެރެއިން އަބްދުﷲ ސައީދާއި އަލީ ހަމީދު ވަނީ އަމުރާ ގުޅިގެން ޔާމީންގެ ވެރިކަމުގައި ހައްޔަރުކޮށް ޖަލަށް ލާން ހުކުމް ކޮށްފަ އެވެ. އަނެއް ތިން ފަނޑިޔާރުންނާ އެކު ސުޕްރީމް ކޯޓް ހިންގެވީ އުއްތަމަ ފަނޑިޔާރުކަމަށް ޑރ. އަހްމަދު އަބްދުﷲ ދީދީ އައްޔަންކުރެއްވުމަށް ފަހުގަ އެވެ.
ޔާމީން ވިދާޅުވީ އަދުލު އިންސާފުގެ ދާއިރާއަކީ އެންމެ ވަރުގަދަ އެއް ދާއިރާކަމުގައި ވިޔަސް މިނިވަނެއް ނޫނެވެ. ފަނޑިޔާރުންގެ ނިންމެވުންތަކުގައި އިންސާފުވެރިކަމާއި ވިސްނުން ބޭނުންކުރައްވާ ކަމަށާއި އެކަމަކު މުޅި ނިޒާމުގައި އެއްވެސް މިންވަރަކަށް މިންވަންކަމެއް ނެތް ކަމަށް ވިދާޅުވި އެވެ.
"އަދުލު އިންސާފުގެ މުޅި ނިޒާމުގައި މިނިވަންކަން ނެތް ވާހަކަ މިދައްކަނީ،" ނިޒާމު ރޭވިފައި އޮތް ގޮތަށް އިޝާރާތްކުރައްވަމުން ޔާމީން ވިދާޅުވި އެވެ.
ޔާމީން ވިދާޅުވީ ކޮންމެ ކޯޓެއްގައި އިދާރީ ގޮތުން އެންމެ ވަރުގަދައީ އެތަނެއްގައި ހުންނަވާ ރަޖިސްޓަރާ ކަމަށާއި މައްސަލަތައް ކަނޑައަޅާނެ ފަނޑިޔާރުން ނިންމުމުގެ ބާރު ވެސް އޮންނަނީ އެ މީހަކަށް ކަމަށެވެ. ޔާމީން އެހެން ވިދާޅުވި ނަމަވެސް ފަނޑިޔާރުންނަށް މައްސަލަތައް ހަވާލުކުރުމުގައި އެކި ކޯޓުތަކުގައި އޮންނަނީ އެކި އިންތިޒާމުތަކެވެ.
ޔާމީން ވިދާޅުވީ ރަޖިސްޓަރާ އަކީ ޖުޑީޝަލް ސާވިސް ކޮމިޝަނަށް ޖަވާބުދާރީވާން ޖެހޭ ބޭފުޅެއް ކަމަށާއި މަޖިލީހުގެ ރައީސް ހިމެނޭ ގޮތަށް އޮންނަ އެ ކޮމިޝަނަކީ އަދުލުވެރިތަނެއް ނޫން ކަމަށެވެ.
"ޖޭއެސްސީގެ ބޮޑު މެޖޯރިޓީ މިއޮތީ އެމްޑީޕީގައި. ރަޖިސްޓަރާއަކީ އިދާރީ ހުރިހާ ކަމެއްކުރާ މީހާ. އިދާރީ މަސައްކަތްކުރާ މީހާގެ ޗާބީ މިއޮތީ އެމްޑީޕީގެ އަތުގައި،" ޖޭއެސްސީއާ މެދު ސުވާލު އުފައްދަމުން ޔާމީން ވިދާޅުވި އެވެ.
ޔާމީން ތުހުމަތުކުރެއްވީ އެ ތަނަކަށް އެ މަނިކުފާނު ކަހަލަ ބޭފުޅެއްގެ މައްސަލައެއް ލައިފި ނަމަ، ފިކުރާ އިދިކޮޅު ފަނޑިޔާރެއް ނޫން ގޮތަށް ބެންޗަށް ނުނަންގަވާނެ ކަމަށެވެ.
އެ ޖަލްސާގައި ޔާމީން ވަނީ ރައީސް އިބްރާހިމް މުހައްމަދު ސޯލިހާއި މަޖިލީހުގެ ރައީސް މުހައްމަދު ނަޝީދަށް ވަރަށް ބޮޑަށް ފާޑުވިދާޅުވެފަ އެވެ.
ޔާމީން ވިދާޅުވީ އެމްޑީޕީގެ ދެ ރައީސުންނަކީ ވެސް "މަކަރުވެރި" ދެ ބޭފުޅުން ކަމަށާއި އެއީ "އެއްގަލުން ފެހިކައި ދެ ރޮނޑުން" ކަމަށެވެ. ރައީސް އާއި ނަޝީދަކީ ހިޔާލާއި މިޒާޖުން ވެސް އެއްގޮތް ދެ ބޭފުޅުން ކަމަށާއި ރައްޔިތުންގެ ގާތު ތެދު ބަހުން އެ ދެ ބޭފުޅުން ވާހަކަފުޅު ނުދައްކަވާނެ ކަމަށް ޔާމީން ވިދާޅުވި އެވެ.
ޔާމީން ވިދާޅުވީ އެމްޑީޕީއަށް ރާއްޖެއިން ތާއީދު ގެއްލިފައިވާ ކަަމަށެވެ. މަޖިލިސް އިންތިހާބުގައި ޕީޕީއެމުން ހުރިހާ ދާއިރާއަކަށް ކުރިމަތިލި ނަމަ އެމްޑީޕީއަށް ސުޕަ މެޖޯރިޓީ ވެސް ގެއްލޭނެ ކަމަށް ޔާމީން ވިދާޅުވި އެވެ.