29 މާޗް 2022 - 22:04
ސަރުކާރުން އިންޑިއާގެ އެންމެ ބޮޑު އެއް ކުންފުނި ރިލަޔަންސްގެ ޖިއޯ ކުންފުންޏާ ހަވާލުކޮށްގެން އަޅާ ސަބްމެރިން ކޭބަލްގެ ސާވޭގެ އަމަލީ މަސައްކަތްތައް ފަށައިފި އެވެ.
އިންޑިއާގެ ބިލިއަނަރު މުކޭޝް އަމްބާނީގެ ކުންފުނިން މި ސަބްމެރިން ކޭބަލް އެޅުމަށް ކުރާ ސާވޭ އެއް މަސް ދުވަހުގެ ތެރޭގައި ނިންމުމަށް ވަނީ އަމާޒު ހިފައިފަ އެވެ. ސަރުކާރު ހިއްސާވާ ކުންފުނި މޯލްޑިވްސް ފަންޑް މެނޭޖްމެންޓް ލިމިޑެޓް (އެމްއެފްއެމްއެލް) ގެ ސަބްސިޑަރީ ކުންފުނި އޯޝަން ކަނެކްޓް މޯލްޑިވްސްގެ ދަށުން ހިންގާ މި ޕްރޮޖެކްޓްގައި ސޮއި ކުރީ މިދިޔަ މަހު އެވެ.
އޯޝަން ކަނެކްޓް މޯލްޑިވްސް އިން ބުނީ ސަބްމެރިން ކޭބަލް ސިސްޓަމެއް ގާއިމް ކުރުމުގެ ސާވޭއެއް ކުރަން އާންމުގޮތެއްގައި ހަތަރު މަހާއި ހަ މަހުގެ މުއްދަތެއް ނެގި ނަމަވެސް ރާއްޖޭގައި ޖިއޯގެ އެހީގައި ހިންގާ މި ޕްރޮޖެކްޓް ވަރަށް އަވަހަށް ނިންމާލެވޭނެ ކަމަށެވެ. "އޯޝަން ސާވެއާ" ބޯޓު މެދުވެރިކޮށް ފެށި މި ސާވޭ އަންނަ މަހުގެ 11 ގައި ނިންމާލެވޭނެ ކަމަށް އެކުންފުނިން ބުންޏެވެ.
މި ސާވޭގައި ކޭބަލް އަޅާނެ މަގުތައް ދެނެ ގަނެ، އެ މަގުތަކުން ކޭބަލް ގެންދާނެ ގޮތްތައް ދެނެގަންނާނެ އެވެ. ކޭބަލް އެޅުމަށް ބޭނުންވާ ޖިއޯފިޒިކަލް އަދި ޖިއޯޓެކްނިކަލް ޑޭޓާ ހޯދާނެ އެވެ. އަދި ކޭބަލް ގެންދާނެ ފުންމިނާއި ފޮޓޯގްރަޕީ މެޕްތައް ވެސް އެކުލަަވައިލާނެ އެވެ.
މި ބޮޑު ޕްރޮޖެކްޓް ފެއްޓުމަށް މިދިޔަ މަހު ބޭއްވި ރަސްމިއްޔާތުގައި އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވީ، މިކަމުން ރާއްޖޭގެ އިގްތިސާދު ފުޅާކުރަން އިތުރު މަގުތައް ތަނަވަސްވާނެ ކަމަށެވެ. އަދި ރާއްޖޭގެ ހުރިހާ ހިސާބަކަށް އަގުހެޔޮ އަދި ހަލުއި ސްޕީޑްގައި އިންޓަނެޓް ލިބޭނެ ކަމަށް އޭނާ ވިދާޅުވި އެވެ.
ސަރުކާރުގެ އަމާޒަކީ އަންނަ އަހަރުގެ ޖޫން މަހުގެ ތެރޭގައި ސަބްމެރިން ކޭބަލް ގުޅާލުމެވެ. އަދި ސަބްމެރިން ކޭބަލް މެދުވެރިކޮށް 2024 ވަނަ އަހަރުގެ މެދުތެރޭގައި ހިދުމަތްތައް ދެވޭނެ ކަމަށް އިކޮނޮމިކް މިނިސްޓްރީން ބުނެފައިވެ އެެވެ.