23 މާޗް 2022 - 12:09
އިންޑިއާގައި ބާއްވާ ސައުތު އޭޝިއަން ކްރޮސް ކަންޓްރީ ޗެމްޕިއަންޝިޕްގައި ވާދަކުރާ ދިވެހި ޓީމުގެ އަމާޒަކީ މެޑައްޔެއް ހޯދުން ކަމަށް ކޯޗު ނަސްރުﷲ އަހްމަދު (ނަސްރު) ބުނެފި އެވެ.
ހުކުރު ދުވަހު ނާގަލޭންޑްގައި ބާއްވާ ކްރޮސް ކަންޓްރީ ދުވުމުގައި ވާދަކުރަން އެތުލެޓިކްސް އެސޯސިއޭޝަނުން އެކުލަވައިލި ދުވުންތެރިންގެ ޓީމަށް ފަހު ވަގުތު ވަނީ ބަދަލު ގެނެސްފަ އެވެ. ކުރިން ޓީމުގައި ހިމެނި ޔޫސުފް އިބްރާހިމް އަށް އަނިޔާވުމުން އޭނާގެ ބަދަލުގައި މުހައްމަދު ރަޝީދު (މޯޑް) ވަނީ ޓީމުގައި ޖަހައިފަ އެވެ.
ޓީމު މިއަދު ވަނީ އިންޑިއާ އަށް ފުރައިފަ އެވެ. ތުރުކީގެ އަނަޓޯލިޔާގައި މިމަހު 6 ގައި ބޭއްވި މެރަތަން، "ރަން ޓޯލިޔާ" ގައި ވާދަކޮށްފަ އެވެ. ހާފް މެރަތަންގައި ވާދަކޮށް ޔޫސުފް ރޭސް ނިންމީ 1:12:31 އިންނެވެ. އޭނާގެ ބަދަލުގައި ކްރޮސް ކަންޓްރީގައި ވާދަ ކުރާ މޯޑް ވަނީ މީގެ ކުރިން ތިން ފަހަރެއްގެ މަތިން ކްރޮސް ކަންޓްރީ ޗެމްޕިއަންޝިޕްގައި ވާދަކޮށްފަ އެވެ. މިއީ ނޮވެމްބަރު މަހު ބޭއްވި ގައުމީ އެތުލެޓިކްސް މުބާރާތަށް ފަހު މޯޑް ބައިވެރިވާ ފުރަތަމަ މުބާރާތެވެ.
އާއިލީ ކަމެއް ދިމާވެގެން، ޑިސެމްބަރުގައި ބޭއްވި ގްރޯން ޕްރީ މުބާރާތުގައި ވެސް މޯޑް ވާދައެއް ނުކުރެ އެވެ. އަދި މެރތަން ރަނާސްގެ ޓީމުން ބައިވެރިވި އަނަޓޯލިޔާ މެރަތަންގައި ވެސް އޭނާ ވާދަކޮށްފަ އެއް ނުވެ އެވެ. ކްރޮސް ކަންޓްރީގައި ސާކްގެ އަށް ގައުމުގެ ތެރެއިން އަފްގާނިސްތާން ފިޔަވައި އަނެއް ހަތް ގައުމުން ބައިވެރި ވެއެވެ.
"މިފަހަރުގެ ކްރޮސް ކަންޓްރީ ވަރަށް ވާދަވެރިވާނެ. އެކަމަކު ދިވެހި ޓީމުގައި ހިމެނޭ ދުވުންތެރިންނަށް ބަލާއިރު މެޑައްޔެއް ހޯދޭނެ ކަމުގެ އުންމީދު އަޅުގަނޑަށް އެބައޮތް،" ކްރޮސް ކަންޓްރީގައި މީގެ ކުރިން ހަތަރު ފަހަރު ދުވި ނަސްރު ބުންޏެވެ.
ޓީމުގެ ކޯޗަކަށް ނަސްރު ހަމަޖައްސާފައި ވަނީ ކްރޮސް ކަންޓްރީ އަށް އެކުލަވާލި ޓީމުގައި އޭނާ ކޯޗު ކޮށްދޭ ދުވުންތެރިން ގިނަ ވުމުންނެވެ. މި ޓީމުގެ ހަތަރު ދުވުންތެރިންނަކީ މެރަތަން ރަނާސްގެ ޓީމުގައި ނަސްރު އާއެކު ޓްރޭނިން ހަދަމުން އަންނަ ދުވުންތެރިންނެވެ.
ޙުސައިން ފަޒީލް ހާރޫން - ނަސީރު ސްޕޯޓްސް
އިރުފާން މުޙައްމަދު - މެރަތަން ރަނާސް
މުހައްމަދު ރަޝީދު - މެރަތަން ރަނާސް
އާއިޝަތު ރާނިޔާ - މެރަތަން ރަނާސް
އާއިޝަތު ރިޝްމީ - މެރަތަން ރަނާސް
މަރްޔަމް ޢަބްދުލް ކަރީމް - ކުޑަހުސައިން ސްޕޯޓްސް
މިދިޔަ މަހު ބާއްވަން އޮތް ކްރޮސް ކަންޓްރީ މިމަހަށް ފަސްކުރީ އިންޑިއާގައި ކޮވިޑްގެ ހާލަތު އޮތް ގޮތުންނެވެ. ކްރޮސް ކަންޓްރީގައި ދުވާނީ ހުސް ބިންތަކުގަޔާއި ވިނަގަނޑާއި ފަސްމަޑު ހިސާބުތަކުގަ އެވެ.