19 މާޗް 2022 - 06:17
ބޮލީވުޑްގެ ތަރި، ސަލްމާން ހާނަކީ އޭނާގެ އެކުވެރިންނަށްޓަކައި ކޮންމެ ފަދަ ގުރުބާނީއެއް ވެސް ވާން ތައްޔާރަށް ހުންނަ ތަރިއެކެވެ. ގާތް އެކުވެރިންނަށް އޭނާ ކޮށްދޭ ކަންކަމަކީ އެކަމުގެ ހެއްކެކެވެ.
ސަލްމާންގެ ޅަ ދުވަހުން ފެށިގެން އޭނާގެ އެކުވެރިޔާ އަދި ތެލުގޫ ސުޕަސްޓާރު، ޗިރަންޖީވީއާ އެކު ހާއްސަ ގުޅުމެއް އޮވެ އެވެ. އެ އެކުވެރިކަމުގައި ސަލްމާން ވަނީ ޗިރަންޖީވީގެ ދަރިފުޅުގެ ރާމް ޗަރަން ބޮލީވުޑަށް ނުކުތް ފިލްމު، "ޒަންޖީރު" ގެ ސޫޓިންތައް މުމްބާއީގައި ކުރިއަށް ދިޔައިރު އެ ސެޓަށް ކޮންމެ ދުވަހަކު ކެއުން ގެންގޮސްދީފަ އެވެ.
އަނެއްކާ ވެސް ސަލްމާން ވަނީ ޗިރަންޖީވީ އަށްޓަކާ ބޮޑު ގުރުބާނީއެއް ވެފަ އެވެ. އޭނާގެ ކުރިއަށް އޮތް ތެލުގޫ ފިލްމު "ގޮޑްފާދާ" ގައި ހާއްސަ ފެނިލުމަކުން ފެނިލަން، ސަލްމާނަށް ހުށަހެޅީ 15-20 ކްރޯޑް ރުޕީސްގެ އަދަދެކެވެ. އެކަމަކު އެއިން އެންމެ ފައިސާއެއް ވެސް ނަގަން ސަލްމާން ބޭނުމެއް ނުވި އެވެ.
ބޮލީވުޑްގެ ރިޕޯޓްތައް ބުނާ ގޮތުގައި ސަލްމާން ވަނީ އޭނާ އަށް ފައިސާ ދޭ ނަމަ އެ ފިލްމުގައި މަސައްކަތްކުރަން ބޭނުން ނުވާ ކަމަށް ބުނެފަ އެވެ. އަދި ޗިރަންޖީވީއާ ސަލްމާން ސުވާލުކޮށްފައި ވަނީ އޭނާގެ ފިލްމެއްގައި މަސައްކަތްކުރަން ދިން ނަމަ، ޗިރަންޖީވީ އެއްވެސް ޗާޖެއް ނަގާނެތޯ އެވެ.
އެހެންވެ، ފިލްމުގައި ހިލޭ މަސައްކަތް ކުރަން އޭނާ ނިންމީ އެވެ. އެ ފިލްމުގައި ސަލްމާން ފެންނާނީ 20 މިނެޓްގެ ރޯލަކުންނެވެ. އޭނާގެ ޝޫޓިންތައް ދެމިގެންދާނީ ހަފުތާއަކަށެވެ.
ސަލްމާންގެ ކުރިއަށް ގިނަ ފިލްމުތަކެއް އެބަހުއްޓެވެ. އޭގެ ތެރެއިން އެންމެ އަވަހަށް ސިނަމާތަކަށް އަންނާނެ ކަމަށް ބެލެވެނީ "ޓައިގާ 3" އެވެ.