17 މާޗް 2022 - 08:17
ސ. މީދު އަކީ ދިވެހި ބޭސްވެރިކަމުގެ ކިއްލާއެކޭ ބުނެވިދާނެ އެވެ. އެކަން ނޭނގޭ ނަމަ މިއީ ދިވެއްސަކަށް ވީތީ ކޮންމެހެން އެނގެން ޖެހޭ 'ޖެނެރަލް ނޮލެޖެއް' ކަހަލަ މައުލޫމާތެކެވެ. މި ހަގީގަތަށް ބަލާއިރު ތަފާތު ތިން އާއިލާއެއް ތަފާތު ތިން ވައްތަރެއްގެ ދިވެހި ބޭސްވެރިކަމުގައި ފާހަގަކޮށްލެވެ އެވެ.
މީދޫގެ މަޝްހޫރު "އައިސާދަރި" އާއިލާ އަކީ ރުއްގަލު ބޭސް ނުވަތަ ކަށި އަދި އެތެރެހަށީގެ ދިވެހި ބޭސްވެރިކަމަށް އެފަދަ ދެ ވަނައެއް ނެތް ތަޖުރިބާކާރުންގެ އާއިލާއެކެވެ. 'އިންޓާނަލް މެޑިސިންގެ ސްޕެޝަލިސްޓުން'ނެވެ.
މި ރަށުގެ "ދެށެނާގެ" އާއިލާ އަކީ ދަތުގެ ތަފާތު އެކި ވައްތަރުގެ ފަރުވާތަކަށް ހާއްސަ "ސްޕެޝަލިސްޓުން" ނުވަތަ ދިވެހި ބޭހުގެ މާހިރުން ތިބި އާއިލާއެކެވެ. އެ އަށް ފަހު ދެން މި އަންނަނީ އަހަރެމެންގެ މި ފަހަރުގެ 'މި ރަށުން މި މީހާ' ސްޓޯރީ އެވެ. – އެއީ ލޮލުގެ ބޭހަށް އެފަދަ ދެ ވަނައެއް ނެތް މީދޫގެ އާއިލާއެއް ކަމަށްވާ 'ދޮންމަނިކު'ގެ އާއިލާ އެވެ.
މިއަދުގެ ހާއްސަ މެހެމާނަކީ އުމުރުން 60 އަހަރުގެ އައިމިނަތު ރަހުމާ އެވެ. އޭނާ އަކީ 11 ކުދިން ތިބި މި އާއިލާގައި މި ވަގުތު ދުނިޔޭގައި ހުރި ހަމައެކަނި އަންހެން 'ބޫނެވެ'. އަދި އޭނާގެ އާއިލާގައި ތިން ޖީލަށް ދިގުދެމިގެންގޮސްފައިވާ 'ލޮލަށް ހާއްސަ ދިވެހި ބޭސްވެރިކަމުގައި' ދެމިހުރި ހަމައެކަނި ބޭސްވެރިޔާ ވެސް މެއެވެ.
އެކަމަކު ރަހުމާގެ މި އާއިލާ އަކީ އެއްގޮތަށް ވުރެ ގިނަ ގޮތްގޮތުން ފާހަގަކޮށްލެވޭ އާއިލާއެކެވެ. އަދި ހަމައެކަނި ދިވެހި ބޭސްވެރިކަމުގައި އެކަންޏެއް ވެސް ނޫނެވެ. އޭނާގެ މަންމަ ފަރާތު އާއިލާ އިން ކިޔައިދޭ ނަމަ، މަންމަ ނިސްބަތްވާ "އެޅެގޭ" އާއިލާ އަކީ އަދި މުޅިން އެހެން ފަރުވާ އަކާއި ހައްލެއްގެ ތަޖުރިބާކާރުންނާއި މޭސްތިރިންގެ އާއިލާއެކެވެ. --ފަނޑިޔާރުންނާއި އުއްތަމަ ފަނޑިޔާރުންނެވެ.
އެކަމަކު މީދު އާއި ގާނޫނީ ތަހަރައާ ދެމެދު އޮތް ހިތާއިހިތުގެ މި ގުޅުމަކީ އޭގެ އެއްވެސް ތައާރަފެއް މި ގޮތަށް ލިޔާވަރުގެ ވާހަކައެއް ނޫނެވެ. ޒަމާނުއްސުރެން މީދޫ މީހުންނާ އެންމެ ރައްޓެހި އެއް ދާއިރާއަކީ މިއަދު ވެސް ގާނޫނީ އެ ތަރަހައްދެވެ. އެހެންވީމާ އެ ވާހަކައެއް ގާނޫނީ އިމަށް ކޮއްޕާލާފައި ބޭސްވެރިކަމުގެ ވަނާއި ވަހާއި ދޮންމަނިކުގެ މި އާދާޔާ ހިލާފު އެކްސްޕީރިއަންސަށް ގޮސް ވަދެގަންނަމާ ހިނގާށެވެ.
އެއީ މުސްކުޅި ބޮޑު ގޮވައްޗެކެވެ. މި ރަށު މީހުން، އައްޑޫ އަތޮޅު މީހުން ނުވަތަ ފުވައްމުލަކުގެ ގިނަ މީހުން ވެސް މި ގެއެއް ދަންނަ ގޮތަކީ 'ދޮންމަނިކު' ގެ ނަމުންނެވެ. ރަސްމީ ނަމަކުން ނަމަ މިއީ ހުވަނދުމާވިލާ އެވެ. އެކަމަކު ނަން ބޯޑެއް ނެތެވެ. ގޯތީގެ ވަރަށް އެތެރޭގައި ހުރި އާދައިގެ މި ގެއަށް ވަދެ ބޯދިއްކޮށްލިއިރު ފާޑުފާޑުގެ ދިވެހިބޭހާއި ފުޅިފުޅީގައި ބަންދުކޮށްފައި ހުރި ބޭސްތައް ކުޑަ މޭޒެއްގެ މަތީގައި ނަލަގޮތަކަށް އަތުރާލައިގެން ސޯފާގައި އިށީނދެ ހަމަޖެހިލައިގެން އެ އިނީ ރަހުމާ އެވެ.
ހުރިހާ ބޭހެއްގެ ފޮޓޯ ނަގަން އެބަ އަންނަމޭ ބުނީމާ އެ އިނީ ފޮޓޯއަށް ތައްޔާރުވެ ހެވިދިއްލިފަ އެވެ. އޭނާގެ މޫނުމަތިން ފައުޅުވަމުން ދިޔަ އަލި ކަމަކީ އުމުރުން 16 އަހަރުން ފެށިގެން މެދުކެނޑުމެއް ނެތި މިއަދު ވެސް، ކޮންމެ ދުވަހަކު އޭނާ ކުރާ މި މަސައްކަތުގެ ހިތްހަމަޖެހުން ވަރަށް ސާފުކޮށް ބުނެ، ތަމްސީލު ކޮށްދެމުން ދިޔަ އަލިކަމެކެވެ.
މީހުންގެ ލޮލަށް ފަރުވާކުރުމާއި އެ މީހުންގެ ލޮލުގެ ފެނުމަށް ސާފުކަމާއި އަލިކަން ހޯދައިދިނުން ނޫން އިތުރު އެއްވެސް ކަމެއް ރަހުމާ ނުކުރެ އެވެ. ނަމަވެސް ރަހުމާގެ ހަޔާތުގައި ދިއްލާފައި އޮތީ އަދި މުޅިން އެހެން ބޮއްކެކެވެ. އޭނާ އަކީ އިރުއޮއްސުމުން، ލޮލަށް އަނދިރިވެ ފެނުން ގެއްލުމަށް މެދުވެރިވާ 'ލޮލުގެ ބައްޔަކާ' އެކު ދިރިއުޅެމުން އަންނަ މީހެކެވެ.
"މިއީ އަޅުގަނޑުގެ އިތުރުން ފެމިލީގެ ބައެއް މީހުންގެ ވެސް ހުންނަ ކޮންޑިޝަނެއް. އަޅުގަނޑާއި އަޅުގަނޑުގެ ފިރިހެން ކޮއްކޮއަކާއި އަދި މިހާރު ނިޔާވެފައިވީ ދެ ދައްތައެއްގެ ލޮލުގައި ވެސް މި ކޮންޑިޝަން ހުރި،" ފުރާވަރުން ފެށިގެން ކޮންމެ ރެއަކު ވެސް ތަޖުރިބާކުރަމުން އަންނަ ހާލަތު ކިޔައިދެމުން ރަހުމާ ބުންޏެވެ.
"އަޅުގަނޑަށް ފެންނާނީ އިރުގެ އަލީގައި. އަދި ރޭގަނޑު ނަމަ، ބޮއްކެއްގެ އަލީގައި ހަމަ ރަނގަޅަށް މީހެއްގެ އެހީތެރިކަމެއް ނެތި ކަންކަން ކޮށްލަކޮށްލަ އުޅެލެވޭނެ. ރޭގަނޑު އެކަނި އަޅުގަނޑު ފިހާރަ އަށް ވެސް ދަން. ކައްކައި ވެސް ހަދަން."
މި ހާލަތު ތަޖުރިބާކުރެވެން ފެށި ދުވަސްވަރަކީ ރަހުމާގެ ބައްޕަގެ ބޭސްވެރިކަމުގައި އޭނާ އެންމެ އަވަދިނެތި އުޅުނު ދުވަސްވަރެވެ. އެ ދުވަސްވަރުގައި އޭނާގެ ބައްޕަ، މަޝްހޫރު ނަމުން ނަމަ 'ދޮންމަނިކުގެ މުހާއްމާއްދީ" އަކީ މުޅި އައްޑު އާއި ފުވައްމުލަކަށް މަޝްހޫރު އަދި ޑިމާންޑް އެ ވަރަށް ބޮޑު ހަކީމެކެވެ. މުހައްމާއްދީގެ މަންމަ އަދި ރަހުމާގެ މާމަ (އައްޑޫ ބަހުރުވައިން މުންނާ) އަކީ ވެސް ކުޅަދާނަ ބޭސްވެރިއެކެވެ. ވަކިން ހާއްސަކޮށް ފޫޅުމައެކެވެ.
އެހެންކަމުން ރަހުމާ އުޅެ ބޮޑުވަމުން ދިޔަ 'ދޮންމަނިކުގެ' އަކީ ހަގީގަތުގައި ދިވެހި ބޭސްވެރިކަމުގެ އެއް ކިއްލާއެވެ. ނަމަވެސް ޔޫނާނީ ބޭސްވެރިކަމުގެ ތެރެއަށް ވަނުމުގެ އެއްވެސް ޝައުގުވެރިކަމެއް އޭނާގެ ކިބައިގައި އޭރަކު ނެތެވެ. އޭރު އައްޑު އަތޮޅުގައި އެންމެ ސަޅި އެއް ކަމަކީ ގަމުގައި ހިންގި ގާމެންޓް ފެކްޓަރީތަކެވެ.
"ކުޑައިރު އަޅުގަނޑަށް ލިބުނު ފޫޅުމާކަމުގެ ތަމްރީން ހަދަން ވެސް. އެކަމަކު އެ ދުވަސްވަރު އަޅުގަނޑު ވެސް ބޭނުންވީ ގަމުގައި ހިންގި ގާމަންޓް ފެކްޓަރީއަކަށް މަސައްކަތު ދާން،" ރަހުމާ ބުންޏެވެ.
"އެކަމަކު އޭރު އަދި އުމުރުން 18 އަހަރެއް ނުފުރޭ. 17 އަހަރު. އެހެންވީމާ ބޭބެ ހެދި ގޮތަކީ އަހަރެންނަށް އެ ފެކްޓަރީން ވަޒީފާ ހޯދައިދޭން އުމުރަށް އެއް އަހަރު އިތުރުކޮށްލީ. އެހެންވީމާ މިހާރު އައިޑީކާޑުގައި 60 އަހަރު ކަމަށް ދެއްކިޔަސް އަދި ވާނީ 59 އަހަރު."
އެހެންވީމާ މި ޖެހުނީ އެއް އަހަރު ފަހަތަށް ދާށެވެ.
ނޫނެކެވެ. މިހައި ހިސާބުން އަހަރެމެން ދާނީ މީގެ 52 އަހަރު ފަހަތަށެވެ. އެގާރަވަނަ ވަނަ ދަރިފުޅު ވިހެއުމަށް ފަހު ރަހުމާގެ މަންމަ 36 އަހަރުގައި ނިޔާވި ދުވަހާ ހަމައަށެވެ. ރަހުމާ އަށް އޭރު އެންމެ ހަތް އަހަރެވެ.
އެއީ ބޭސްވެރިކަމުގެ ދަތުރުތަކުގައި އުޅުއްވިއިރު ބައްޕަގެ "އެސިސްޓެންޓަކަށް" ރަހުމާ ހަދައިގެން އަބަދުވެސް އެކުގައި ގޮވައިގެން ގެންދިޔަ ދުވަސްތަކެވެ. ބައްޕަގެ ފިޔަވަޅުމަތިން އެ ގޮތަށް ކުރިއަށް ދަނިކޮށް އުމުރުން 16 އަހަރުގައި ބައްޕަ ނިޔާވުމުން ހަމަ ރަނގަޅަށް ވެސް ބައްޕަގެ ފިޔަވަޅުމަތިން ކުރިއަށް ދާން އޭނާ އަށް އެންމެ ފަހުން މަޖުބޫރުވީ އެވެ. ސަބަބަކީ ބޭސްވެރިކަމުގެ މަގުންނާއި މީހުންނަށް ހެޔޮކޮށް ހިތައި، އެހީތެރިވެދިނުމުގެ މަގަމުން އަބަދުވެސް ކުރިއަށް ދިއުމަށް އެ ބައްޕަ އޭނާ އަށް ތަކުރާރުކޮށް ދިން ނަސޭހަތެވެ.
"ބައްޕަ ނެތް ދުނިޔެއެއްގައި ވެސް ރަނގަޅު ގޮތުގައި، ބޭސްވެރިކަން މީހުންނަށް ކޮށްދީގެން ރަނގަޅު ގޮތުގައި ދިރިއުޅުމަށް ބައްޕަ އަބަދުވެސް ނަސޭހަތް ދިނީ. ކުރިން ޝައުގެއް ނެތަސް ބައްޕަ ބުނި ބުނުމަކަށް ކިޔަމަންވުމުގެ ގޮތުން ފެށުނީ،" ރަހުމާ ބުންޏެވެ.
"އެކަމަކު މިއީ ކިފާޔަތުގެ ފަރުޟެއް ކަމަށް އަޅުގަނޑު ގަބޫލުކުރަނީ. އެ ގޮތަށް އަޅުގަނޑު މިކަން ބަލައިގަންނާތީ އަޅުގަނޑު ދުނިޔޭގައި ހުރިހާ ދުވަހަކު މިކަން މިގޮތަށް ކޮށް އަޅުގަނޑަށް ވެވުނު މިންވަރަކުން ވީހާ ވެސް ގިނަ ބަޔަކަށް އެހީތެރިކަން ފޯރުކޮށްދޭން ބޭނުންވަނީ."
"އިތުރު ހަމަ އެއްވެސް ކަމެއް އަޅުގަނޑު ބޭނުންވަނީކީއެއް ނޫން."
ބައްޕަ ނިޔާވުމާ ގުޅިގެން އުމުރުން 16 އަހަރުގައި ރަހުމާ "ބަލި މީހުން" ބަލަން ފަށައިފި އެވެ.
"އަޅުގަނޑުގެ ބޭސްވެރިކަމުގެ އެންމެ ދުރު ހަނދާނަކީ ބޯޅައަކުން ޖެހިގެން ލޯ ދުޅަވެގެން އަޅުގަނޑަށް ދައްކަން އައި މީހެއް. އޭރު އަޅުގަނޑަށް 16 އަހަރު. ބޭރަށް ގޮސްގެން ވެސް އޭނާގެ އެ ލޮލަކަށް ނުފެނި އެ ލޯ ފުސްވެ، ފާރުވެގެން އެންމެފަހުން ދައްކަން އައީ މި ގެ އަށް،" ރަހުމާ ކިޔައިދިނެވެ.
"އައީމާ އަޅުގަނޑު ދެން ބޭސްކުރީ އެ މީހާ އަށް. ފަހަކުން އިރާދަކުރެއްވިޔާމު އެ ލޮލުގެ މައްސަލަ އިތުރަކަށް ގޯހެއް ނުވޭ."
އެ އަށް ފަހު ލޯ އަނދިރި ކުޑަކުއްޖެއްގެ ވާހަކަ ވެސް ވަރަށް ހާއްސަ ހަނދާނެއްގެ ގޮތުގައި ކިޔައިދިނެވެ.
"އެއް ލޮލުން އެއްވެސް ވަރަކަށް ނުފެންނަ ކުއްޖެއް. ދެން އެ ކުއްޖާގެ އާއިލާ އިން ސުވާލު މި ކުރަނީ އޭނާ އަށް ދުވަހަކުވެސް ލޮލު ފެނިދާނެ ހެއްޔޭ. ދެން އަޅުގަނޑު ބަލާފައި ބުނިން އަޅުގަނޑަކަށް ހިއެއް ނުވެއޭ ފެންނާނެހެނެއް. ލޮލުގެ ކަޅު ކަޅީގައި ހުރީ ދޮސްމޮހޮރެކޭ،" ރަހުމާ ކިޔައިދިނެވެ.
މިހެން ބުނެފައި ދޮސްމޮހޮރަކީ ކޯޗެއްކަން އޭނާ ވަރަށް ރީއްޗަށް ކިޔާލަދިނެވެ.
"އިނގިލީގެ ބޭރުގައި، ހަންގަނޑުގައި ނަގާނީ ފޮޅެއް. އުކުޅުގައި ނެގީމާ މިކިޔަނީ މުލިހި. ލޮލުގައި ނެގީމާ އެ އަށް މިކިޔަނީ އަނދުންހުއްޔެކޭ. އެއީ ލޮލުގެ ބޭރުގައި ނުކުތީމާ. ލޮލުގެ ދެ ކަޅި ދޭތެރޭގައި ނުކުތީމާ އެ އަށް މިކިޔަނީ ދޮސްމޮހޮރެކޭ."
މިހައި ހިސާބުން، ދިވެހި ބޭސްވެރިކަން ހިނދުކޮޅަކަށް ޕޯޒްކޮށްލާފައި ދިވެހި ބަސްކޮށާރުގެ މުއްސަނދިކަން އަގުވަޒަންނުކޮށް ކުރިއަށް ދިއުން ވާނީ އިލްމަށް ކަނުވެ ނަސީބުގައި ކޮޅުފައިން ޖެހުނު ކަހަލަ ކަމަކަށެވެ.
އޯކޭ، އަނެއްކާވެސް ބެކް ޓު ބޭސްވެރިކަމަށެވެ. ދޮސްމޮހޮރަކާއި ރަހުމާގެ ތަޖުރިބާއެވެ.
"އެހެންވީމާ އެ ދޮސްމޮހޮރު ފަޅައިގެން ބޭރަށް ނުފައިބައިފި ނަމަ ވަރަށް ގޯސްވާނެ. އެ ދޮސްމޮހޮރު ލޮލު ތެރެއަށް ފަޅައިގެން އެތެރެއަށް އޭގެ ދޮސްތައް ފައިބައިފި ނަމަ އެ ލޮލަކަށް ދެނެއް ނުފެންނާނެ."
ލޮލުގެ މޮޅެތި ޑޮކްޓަރުންނަށް ދައްކައިގެން އެ ކުއްޖާގެ އާއިލާ އަށް ލިބުނީ ރަހުމާ ވެސް ދިން ސިއްހީ ލަފާ އެވެ.
އޭނާ އާމްދަނީ ހޯދަން ވަޒީފާ އަދާކުރަން ދިޔައީ ގަމުގެ ގާމެންޓް ފެކްޓަރީ އަށް އެކަންޏެވެ. ބައްޕަގެ ބޭސް ފަތްފޮތްތަކުން ކިޔަވަމުން ދަސްކުރަމުން ދިޔައިރު ގަމަށް ގޮސް އޭނާ ފެހީ އަތުކުރި އެވެ.
"އޭރު ދުވާލަކަށް 300 ޑަޒަނުގެ އަތުކުރި ފަހަން ޖެހޭނެ މީހަކު. މުޅި ފެކްޓަރީގައި އޭރު އަތުކުރި ފެހީ އަޅުގަނޑާއި އިތުރު އެހެން ކުއްޖެއް. މަހު މުސާރައަކީ 300ރ،" ފެހުމުގެ އިތުރުން ވަރަށް ފޯރީގައި ކޭކު ވެސް ފިހުނު ކަމަށް ރަހުމާ ބުންޏެވެ.
ނަމަވެސް މިއަދު އޭނާ އެންމެ ލޯބިން އަދި އެންމެ ޝައުގުވެރިކަމުގައި ކުރާ ކަމަކީ ދިވެހި ބޭސްވެރިކަމެވެ. ލޯ ބަލާނެ ގޮތާއި ލޮލަށް ބޭސްކުރާނެ ގޮތް ބައްޕަ ގެންގުޅުއްވި ފޮތަކުން ދަސްކުރިޔަސް ރަހުމާގެ އަމިއްލަ އުފެއްދުންތައް ވެސް މިހާރު ވަނީ މި ސިލްސިލާ އަށް އިތުރުކޮށްފަ އެވެ. "ނާރު ތެލާއި" ބޮލުން އިސްތަށި އަލުން ފަޅާ މިންވަރަށް ކައްކައި މިކްސްކޮށްފައިވާ ތެޔޮ ފުޅިއެއްގެ ވާހަކަ ވެސް ކިޔައިދިނެވެ.
"ބޮލުން އިސްތަށި ވެއްޓި ތަލަވެ އޮމާންވެފައި ނެތް ބޮލަކުން ނަމަ މި ތެޔޮ ލައިގެން އިސްތަށި ފަޅާނެ. މުޅިން ތަލަނުވާ ނަމަ ފައިބާ އިސްތަށި ވެސް ފަޅާނެ،" ރަހުމާ ބުންޏެވެ.
"މިއީ އަޅުގަނޑު އަމިއްލަ އަށް ދަސްކުރި ކަމެއް. ބައްޕަމެންގެ ޒަމާނަކު ބޮލުން އިސްތަށި ފޭބުން ހިއެއް ނުވޭ މާ ބޮޑު ކަމެއްހެނެއް. މި ޒަމާނުގެ ކުދިންނަށްތާ ބޮލުން އިސްތަށި ފޭބުން ވެސް ބައްޔަކަށް ވަނީ."
ރަހުމާ ބުނީ ލޮލާއި ބޮލުގެ އިތުރުން ރުއްގަލު ބޭސް ވެސް އޭނާ މީހުންނަށް ކޮށްދޭ ކަމަށެވެ. އަދި ބަލިން ފަސޭހަވެ، ހިތްހަމަޖެހިގެން ނޫން ގޮތަކަށް މީހަކު އެނބުރިނުދާނެ ކަމަށެވެ.
"އަޅުގަނޑު ކައިރިއަށް، މި ގެއަށް ބޭސްކުރަން އަންނަ އެންމެން ވެސް އިރާދަކުރެއްވިއްޔާމު އެނބުރި ދަނީ އެ ބައްޔަކުން ފަސޭހަވެ ރަނގަޅުވެގެން."
ދެން މި އާދެވުނީ މި ބޭހާއި ދަތުރުގެ އެންމެ މުހިންމު ހިސާބަށެވެ. ރަހުމާގެ މަންމަ އާއި ބައްޕަގެ ކުދިންގެ ތެރެއިން ބޭސްވެރިކަމުގައި މި ވަރުގެ ޝައުގުވެރިކަމެއް ހުރި އިތުރު އެހެން މީހަކު ދޮންމަނިކުގެއަކު ނެތެވެ. ބޭސްވެރިކަމަށް މި ވަރަށް ވަގުތު ހުސްކޮށްލައިގެން ހުރި މީހަކު ވެސް ނެތެވެ. އަނެއްކޮޅުން އާއިލާގެ މި ލެގަސީ ކުރިއަށް ގެންދަން ބަލާއިރު ބޭސްވެރިކަމުގެ އެ ފަތްކޮޅު ހަވާލުކުރާނެ އަމިއްލަ ދަރިއަކު ވެސް ރަހުމާގެ ނެތެވެ.
"އަޅުގަނޑު ދުވަހަކު ވެސް ކައިވެންޏެއް ނުކުރަން. އަޅުގަނޑުގެ ދައްތަ ކައިވެނިކޮށް، އެ ކައިވެނި ރޫޅި ދަރިއަކު ގޮވައިގެން އުޅެން ޖެހުނީ ވަރަށް ހާލުގައި. އެއީ އަޅުގަނޑުގެ އާއިލާ އަށް ވަރަށް ބޮޑު ހިތްދަތިކަމެއް ގެނުވި ތަޖުރިބާއެއް،" އެ ހިތްދަތިކަމުން އަރައިނުގަނެވުމަކީ ޒަވާޖީ ހަޔާތަށް ފޫހިވި ސަބަބު ކަމަށް ބުނެ ވަރަށް ކުރުކޮށް އޭނާ ކިޔައިދިނެވެ.
އެހެންވީމާ މީދޫގެ އެންމެ މަޝްހޫރު އެއް ބޭސްވެރި އާއިލާގެ ހުންގާނާ ހަވާލުވާން ދެން ތައްޔާރަށް ތިބީ ކޮން ބައެއް ހެއްޔެވެ؟
"މި ގޭގެ އެންމެންނަށް ވެސް އެނގޭނެ ހަމަ އަޅުގަނޑު މި ހަދާހެން ބޭސް ހަދައި ބޭސްކުރަން. އެކަމަކު އެންމެންގެ ނުހުރެދާނެ މި ޝައުގުވެރިކަން. އެހެންވީމާ އަމިއްލަ ދަރިއެއް އަޅުގަނޑުގެ ނެތަސް އާއިލާގައި ދެން ތިބި މީހުންގެ ކުދިންނަށް ދަސްކޮށްދެން ވީ ވަރަކުން،" ރަހުމާ ބުނެލި އެވެ.
އިއްޔެ ވެސް މިއަދުގެ ރުހުމުގެ ހިތެކެވެ. ރަހުމުވެރި ދެ އަތެވެ. އިއްޔެ ވެސް މިއަދު ވެސް ބޭސްވެރިކަމެވެ. ލޮލާއި ބޮލާއި އަތާއި ފަޔަށެވެ. ހިތަށެވެ. އަދި ރަހުމާގެ އަމިއްލަ ނަފުސަށެވެ.