16 މާޗް 2022 - 06:10
ތެލޫގޫ ތަރި އައްލޫ އަރްޖުން، ބޮލީވުޑްގެ ކާމިޔާބު ޑައިރެކްޓަރު ސަންޖޭ ލީލާ ބަންސާލީގެ އޮފީހުން ނުކުތްތަން ފެނުމުން އޭނާ އަށް ބަންސާލީގެ ފިލްމެއް ލިބެއް އުޅޭ ކަމަށް ރިޕޯޓްތައް ބުނެފި އެވެ.
އައްލޫ އެންމެ ފަހުން ފެނުނު "ޕުޝްޕާ: ދަ ރައިޒް" ހިޓުވުމާ އެކު އޭނާ އަށް ބޮލީވުޑުން ވަރަށް ގިނަ ފުރުސަތުތައް ލިބޭ ކަމުގެ އަޑުތައް ގަދަވި އެވެ. އެކަމަކު ބޮލީވުޑަށް ނުކުންނަން ލިބިއްޖެ ނަމަ، އެކަން ކުރާނީ ސީދާ ލީޑް ރޯލުން ފުރުސަތު ލިބިގެން ކަމަށް އޭނާ ބުނެފައިވެ އެވެ.
އަނެއްކާ ވެސް އެ އަޑުތައް ގަދަވީ މުމްބާއީގައި ހުންނަ ބަންސާލީގެ އޮފީހުން އޭނާ ނުކުމެގެންދާ މަންޒަރު ފެންނަ ފޮޓޯތަކެއް އާންމުވުމުންނެވެ.
ސަންޖޭ އާއި އައްލޫގެ މަސައްކަތެއް ބަލަން ސަޕޯޓަރުން ކެތްމަދުވެފައި ތިބި ނަމަވެސް އެކަން އަދި ރަސްމީކޮށް އިއުލާނެއް ނުކުރެ އެވެ. އަދި ސަންޖޭ އޭނާގެ ކުރިއަށް އޮތް މަސައްކަތް ވެސް އިއުލާނެއް ނުކުރެ އެވެ.
ބޮލީވުޑްގެ އެންމެ ވަރުގަދަ އެއް ޑައިރެކްޓަރުގެ ފިލްމަކުން އައްލޫ ބޮލީވުޑަށް ނުކުންނަން އުޅޭ ކަމަށް ވާހަކަ ދެކެވޭއިރު ތެލޫގޫ ފިލްމު އިންޑަސްޓްރީގައި ވިދަމުން އަންނަ އައްލޫ އަކީ އެ ދާއިރާއިން އެންމެ ބޮޑު އާމްދަނީއެއް ލިބޭ އެއް ތަރިއެވެ.