14 މާޗް 2022 - 05:59
ހިޓުވި ތެލުގޫ ފިލްމު "ޕުޝްޕާ" ގެ ދެވަނަ ބައެއް އުފައްދަން އެ ފިލްމުގެ ޑައިރެކްޓަރު މަސައްކަތް ފަށައިފި އެވެ.
ތެލުގޫ ތަރި، އައްލޫ އަރްޖުން އާއި ރަޝްމިކާ މަންޑަންނާ ލީޑު ރޯލުން ފެންނަ އެ ފިލްމަށް މުޅި ދުނިޔެއިން ވެސް ތަރުހީބު ބޮޑެވެ. ފިލްމުގެ ޑައިލޮގްތަކާއި އެ ފިލްމުގެ ނެށުންތައް އެކި ގައުމުތަކުގައި ވައިގައިހިފުމުގެ ސަބަބުން ފިލްމުގެ ދެވަނަ ބައެއް އުފެއްދުމަށް ސްކްރިޕްޓް ތައްޔާރުކުރަމުން އަންނަ ކަމަށްވެ އެވެ.
"ފުޝްޕާ: ދަ ރައިޒް" ގެ ނަމުގައި ފިލްމުގެ ފުރަތަމަ ބައި ނެރުނުއިރު ޑައިރެކްޓަރު ސުކުމާރުގެ ބޮލަށް ފިލްމުގެ ދެވަނަ ބައެެއް އުފެއްދުމުގެ ހިޔާލު ވެސް ނާދެ އެވެ. އެކަމަކު ފިލްމަށް ލިބުނު ތަރުހީބު ފެނި ދެވަނަ ބައެއް އުފެއްދުމުގެ މަސައްކަތް ކުރަމުން އަންނައިރު ދެވަނަ ބައިގެ ސްކްރިޕްޓް ތައްޔާރުކުރާނީ ވަރަށް ފުޅާ އޯޑިއަންސްއަކަށް ކަމަށް އޭނާ ބުންޏެވެ.
ރިޕޯޓްތައް ބުނާ ގޮތުގައި އެ ފިލްމުގެ ޝޫޓިން ވަރަށް އަވަހަށް ފަށާނެ އެވެ. އަދި އެ ފިލްމުގައި ވެސް ފެންނާނީ ފުރަތަމަ ބައިން ފެނުނު އައްލޫ އާއި ރަޝްމިކާ އެވެ.
ޕުޝްޕާއަކީ އިންޑިއާގެ ވަކި ހިސާބަކުން ނޫނީ ނުލިބޭ ލަކުޑިއެއް ވަގަށް ވިއްކުމުގެ ވިޔަފާރިކުރާ ބަޔަކު އުޅޭ ގޮތް ދައްކާ ފިލްމެކެވެ.
ފިލްމުގެ ފުރަތަމަ ބައިން އައްލޫ "ޕުޝްޕަރާޖް" ގެ ރޯލު ކުޅޭއިރު ރަޝްމިކާ ފެންނަނީ ސްރިވައްލީގެ ރޯލުންނެވެ. އަދި އެ ވަގު ވިޔަފާރީގައި އުޅެނިކޮށް ޕުޝްޕަރާޖަށް ސްރިވައްލީ ފެނި، އޭނާއާ ހިތާވެގެން ލޯބި ހޯދަން ކުރާ މަސައްކަތްތައް ވެސް އެ ފިލްމުން ފެނެ އެވެ.
ސުކުމާރު، ލިޔެ، ޑައިރެކްޓްކޮށް ނެރުނު ޕުޝްޕާއަކީ މީތްރީ މޫވީ މޭކާސް އިން ޕްރޮޑިއުސްކޮށް މިދިޔަ ޑިސެމްބަރު 17 ގައި ނެރުނު ފިލްމެކެވެ. ސިނަމާތަކުގައި ވެސް އެޅުވި އެ ފިލްމު، އެމެޒޮނުން ހިންދީ ބަހުންނާއި ތަމަޅަ، ތެލުގޫ އަދި މަލަޔާލަމް އާއި ކަންނަޑާ ބަހުން ވެސް ބެލޭނެ އެވެ.