13 މާޗް 2022 - 20:38
ޔުކްރޭން ހަނގުރާމަ އިން ރާއްޖެ އަށް ލިބޭ ގެއްލުންތައް ކުޑަކުރުމަށް އަޅަން ޖެހޭ ފިޔަވަޅުތައް އަޅުއްވަމުން ގެންދަވާ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ގައުމާ މުޚާތަބް ކުރައްވައި ރައީސް ދެއްވި ޚިތާބުގައި ވިދާޅުވީ ޔުކްރޭން ހަނގުރާމައިގެ އަސަރުކުރާނެ ސަރަހައްދުތަކުގައި ދިރިއުޅޭ ދިވެހިންގެ ތެރޭން ރާއްޖެ އަންނަން ބޭނުންވާ މީހުން ރާއްޖެ ގެނައުމުގެ މަސައްކަތް ކުރިއަށް ގެންދަވާނެ ކަމަށެވެ. އަދި ޔުކްރޭނުން އައި ދިވެހި ދަރިވަރުން އަލުން އެ ގައުމަށް ދެވޭނެ ދުވަހެއް ޔަގީން ނުވާތީ އެ ދަރިވަރުންގެ ކިޔެވުން ކުރިއަށް ގެންދެވޭނެ ގޮތެއް ހޯދައިދެއްވާނެ ކަމަށް ރައީސް ވިދާޅުވި އެވެ.
"އެ މަސައްކަތް ފޮރިން މިނިސްޓްރީ އާއި ހަޔަ އެޑިއުކޭޝަން މިނިސްޓްރީ ގުޅިގެން އަންނަނީ ކުރަމުން،" ރައީސް ވިދާޅުވި އެވެ.
ހނގުރާމަ ދިގުލައިގެން ގޮސް އެންމެ ގޯސް ހާލަތުގައި ރާއްޖޭގެ އިގްތިސާދަށް ލިބިދާނެ ގެއްލުމުގެ އަންދާޒާއެއް ތައްޔާރުކޮށް ފިނޭންސް މިނިސްޓްރީން މިހާރު އަންނަނީ ފިޔަވަޅުތައް އަޅަމުން ކަމަށް ވެސް ރައީސް ވިދާޅުވި އެވެ. އަދި މީގެ އިތުރުން ޔުކްރޭން ހަނގުރާމައާ ގުޅިގެން ރާއްޖޭގެ ޓޫރިޒަމަށް އަންނާނެ ގެއްލުންތައް ދިރާސާކޮށް އާ މާކެޓްތައް ހޯދުމުގެ މަސައްކަތް ޓޫރިޒަމް މިނިސްޓްރީ އާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން ގުޅިގެން ކުރަމުން އަންނަ ކަމަށް ވެސް ވިދާޅުވި އެވެ.
ރައީސް ވިދާޅުވީ ކޮވިޑުގެ އަޑިގުޑަނުން އަރައިގަނެ ހިންދެމިލާ އިރު ވަރަށް ނުރައްކާތެރި ބޯވިލާނގަނޑެއް ބޯމައްޗަށް އަރަމުން އަންނަ ކަމަށެވެ.
"އާދެ، ރަޝިޔާއިން ޔުކްރޭނުގައި ކުރަމުން އަންނަ ހަނގުރާމަ. އެ ހަނގުރާމައިގެ ލޮޅުންތަކުން އެ ދަނީ މުޅި ދުނިޔެ އަށް ގުޑުން އަރުވަމުން. ހަނގުރާމަ ހިނގަނީ ރާއްޖެއާ އެތައް މޭލެއް ދުރުގައި ކަމަށްވިޔަސް ހނަގުރާމައިން އުފެދޭ އިގްތިސާދީ ލޮޅުންތައް ދުރާއި ގާތުގައިވާ ހުރިހާ ގައުމަކަށް އެބަކުރޭ،" ރައީސް ވިދާޅުވި އެވެ. "އކަމުގެ ލޮޅުންތައް ރާއްޖެ އަށް ވެސް ފޯރަން ފަށައިފި."
ރަޝިޔާ އާއި ޔުކްރޭނަކީ ރާއްޖެ އަށް އެންމެ އެންމެ ގިނަ ޓޫރިސްޓުން އަންނަ ގައުމުތަކުގެ ތެރޭގައި ހިމެނޭ ދެ ގައުމުކަން ފާހަގަ ކުރައްވައި ރައީސް ވިދާޅުވީ ހަނގުރާމައިގެ ސަބަބުން ރާއްޖޭގެ އިގްތިސާދަށް ވެސް ނުރަނގަޅު އަސަރުތަކެއް ކުރާނެ ކަމަށެވެ.
ރާއްޖޭގެ ޚާރިޖީ ސިޔާސަތު ބިނާވެފައި ވަނީ ކޮންމެ ގައުމެއްގެ ވެސް ސިޔާދަތާއި މިނިވަން ކަމަށް ހުރުމަތްތެރިކޮށް ހިތުމުގެ މައްޗަށް ކަމަށް ރައީސް ވިދާޅުވި އެވެ.
"މިއީ އދ.ގެ ޗާޓަރުގައި ކަޅާއި ހުދުން ކަނޑާ ނެގިފައިވާ ބައިނަލްއަގުވާމީ ގުޅުންތަކުގެ ބިންގާ. ކުޑަ ޖަޒީޒާ ގައުމެއްގެ ގޮތުގައި އޮވެ ޒަމާނުއްސުރެ އަޅުގަނޑުމެން ވަކާލާތު ކުރަމުން މި އަންނަނީ ބައިނަކްއަގުވާމީ ގުޅުންތައް ދަމަހައްޓަން. މިއީ އަޅުގަނޑުމެން ގަބޫލްކުރާ ހަމަ،" ރައީސް ވިދާޅުވި އެވެ.
ރަޝިޔާ އިން ޔުކްރޭނަށް އަރައިގަތުން ކުށްވެރިކޮށް ހަނގުރާމަ ވަގުތުން ހުއްޓާލުމަށް މި މަހު 2 ވަނަ ދުވަހު އދ. ގެ އާއްމު މަޖިލީހުގައި 141 ގައުމުން ގޮވާލި ގޮވާލުމުގައި ބައިވެރިވެ ރާއްޖެ އިން ވަނީ ކުދި އަދި ނިސްބަތުން ބާރުގަދަ ގައުމުތަކުގެ މިނިވަން ކަމާއި ސިޔާސަތު ރައްކާތެރިކޮށް ދެމެހެއްޓުމަށް ރާއްޖެ އިން އުފުލަމުން އަންނަ އަޑު އަނެއްކާވެސް ތަކުރާރުކޮށްފައި ކަމަށް ރައީސް ވިދާޅުވި އެވެ.
"މިއީ ޔުކްރޭނުގެ ރައްޔިޔތުންނަށް ވަރަށް ހިތްދަތި ވަގުތެއް. އެ މީހުންނަށް ލިބެނުން އަންނަ އަނިޔާތަކަށް ހަމްދަރުދީވަން. ދެ ފަރާތުގެ މެދުގައި ހުރި ދެބަސްވުންތަކަށް ހައްލެއް ހޯދުމަށް މަޝްވަރާގެ މޭޒުގެ ދޮށަށް އެނބުރި އައުމަށް ބައިނަލްއަގުވާމީ މުޖްތަމައުން ގޮވާލާ ގޮވާލުން ރާއްޖެ އިން ވެސް ތަކުރާރުކުރަން. ހަނގުރާމަ ކޮންމެ ދުވަހަކުން ކޮންމެ ގޮތަކަށް ނިމުނު ކަމަށް ވިޔަސް ޔުކްރޭން މިހާރު އޮތް ހާލަތުން އަރައިގަތުމަށް އަހަރުތަކެއް ނަގާނެ. އަދި މި ހަނގުރާމަ އިން ދުނިޔޭގެ އިގްތިސާދަށް ލިބޭ ގެއްލުންތަކުން އަރައިގަތުމަށް ވެސް އަހަރުތަކެއް ނަގާނެ،" ރައީސް ވިދާޅުވި އެވެ.