07 މާޗް 2022 - 06:23
ބޮލީވުޑްގެ ބަތަލާ ކަންގަނާ ރަނައުތުގެ ހަޔާތުގައި ހުށަހަޅާ ފުރަތަމަ ޝޯ "ލޮކް އަޕް" އިންޑިއާގެ ރިއަލިޓީ ޝޯތަކުގެ ރިކޯޑު މުގުރާލައިފި އެވެ.
ކަންގަނާ ހުށަހަޅާ އެ ޝޯއަކީ އެކްތާ ކަޕޫރުގެ ޝޯއެކެވެ. އެ ދެ މީހުންގެ މެދުގައި އޮންނަ ގާތް އެކުވެރިކަމުގެ ސަބަބުން ކަންގަނާ އަށް ޝޯ ހުށަހަޅަން ދީފައިވާއިރު އެ ޝޯ ސްޓްރީމްކުރަނީ އެކްތާގެ އަމިއްލަ ސްޓްރީމިން ޕްލެޓްފޯމް އެލްޓް ބަލާޖީންނެވެ.
ރިޕޯޓްތައް ބުނާ ގޮތުގައި މިދިޔަ ހަފުތާގައި ޝޯ ފަށާފައިވާއިރު އެންމެ 48 ގަޑިއިރުގެ ތެރޭގައި 15 މިލިއަން ވިއުސް އެ ޝޯ އަށް ލިބުނެވެ. އެއީ އިންޑިއާގެ ރިއަލިޓީ ޝޯއެއްގެ ފެށުމަށް އެހާ ބޮޑު ތަރުހީބެއް ލިބުނު ފުރަތަމަ ފަހަރު ކަމަށްވެ އެވެ.
ލޮކް އަޕަކީ ވެސް ކަލާސް ޓީވީ އިން ގެނެސްދޭ ބިގް ބޮސް ކަހަލަ ޝޯއެކެވެ. ޖުމްލަ 13 ބައިވެރިންނާ އެކު ޝޯ ފެށިއިރު އެ ޝޯގައި އެކި ޓާސްކްތައް ކުރިއަށް ގެންދިޔަސް ފެންނަނީ ގައިދީންތަކެއްގެ ގޮތުގަ އެވެ. އެ ބައިވެރިންނަށް ޝޯގެ ތެރެއިން ކަންގަނާގެ ވަރަށް ވަރުގަދަ ބަހުގެ ހަމަލާތައް ރައްދުވެ އެވެ.
އެ ޝޯގެ އެއް ވަނަ ހޮވުމުގެ ބާރު ވެސް އޮންނަނީ ކަންގަނާ އަށެވެ. ކަންގަނާ ބުނީ ފުރަތަމަ ސީޒަން ކާމިޔާބުކުރާ މީހާ ވާނީ ދިރިއުޅުމުގެ ކަންކަމާ ޑީލްކުރަން އެނގޭ، މަޖާ އަދި މައުސޫމު މީހަކަށް ކަމަށެވެ. އެފަދަ ބައިވެރިންނަށް އޭނާ ފޭވާކުރާނެ ކަމަށާއި މޮޅުވާނީ އޭނާ އަށް އެންމެ ކަމުދާ މީހާ ކަމަށް ވެސް ބުންޏެވެ.
ބޮލީވުޑްގައި ވެސް ބައެއް ތަރިންނާ ޖެހިގަނެގެން އުޅޭ ކަންގަނާ މި ޝޯގައި ވެސް ފެންނަނީ އެ ކަހަލަ ގޮތަކަށެވެ. އޭނާގެ ހިތަށް އައިހާ އެއްޗެއް މީހުންނާ ދިމާލަށް ގޮވާލާތަން ފެނެ އެވެ.