04 މާޗް 2022 - 09:48
ކިއޭވް (މާޗް 4) - ޔުކްރޭނުގެ ނިއުކްލިއާ ޕަވަ ޕްލާންޓަށް ރަޝިޔާ ސިފައިން ވައިގެ ހަމަލާދީ އެ ތަނުގައި ރޭ ރޯކޮށްލައިފި އެވެ.
މުޅި ޔޫރަޕުގައި ވެސް ހުރި އެންމެ ބޮޑު ނިއުކްލިއާ ޕްލާންޓަށް ހަމަލާދީ ރޯކޮށްލި ނަމަވެސް ރޭޑިއޭޝަން އަދި މިހާތަނަށް ބޭރުވެފައި ނުވާ ކަމަށް އޮފިޝަލުން ބުނެ އެވެ. އަދި އެ ތަނުގެ މުހިންމު ސާމާނު ސަލާމަތް ކުރެވިފައިވާ ކަމަށް ވެސް ބުނެފައިވެ އެވެ.
ޒަޕޮރިއްޒިއާ ނިއުކްލިއާ ޕްލާންޓުގައި ރޯވެ ގޮވުންތައް ގޮވަމުންދާ ލައިވް މަންޒަރުތައް ވަނީ ދައްކައިފަ އެވެ. ކޮންމެ ގޮވުމެއްގެ އައްޔާ އެކު ޖައްވު ދިއްލާލަ އެވެ.
ޔުކްރޭނުގެ ރައީސް ވޮލޮޑިމީރް ޒެލެންސްކީ ދެއްވި މީޑިއޯ މެސެޖެއްގައި ވިދާޅުވީ ރަޝިޔާ ފިޔަވައި އެހެން އެއްވެސް ގައުމަކުން ނިއުކްލިއާ ޕަވާ ޔުނިޓަކަށް މިހާތަނަށް ހަމަލާދީފައި ނުވާ ކަމަށެވެ.
"މިއީ އަޅުގަނޑުމެންގެ ހަޔާތުގައި، މުޅި އިންސާނީ ހަޔާތުގައި ވެސް، ޓެރަރިސްޓް ގައުމުން ނިއުކްލިއާ ބިރުވެރިކަން އުފެއްދި ފުރަތަމަ ފަހަރު،" ވަރަށް ކޯފާވެވަޑައިގެން ހުންނަވައި ޒެލެންސްކީ ދެއްވި ބަޔާނުގައި ވިދާޅުވި އެވެ. "ޕްލާންޓް އެއްކޮށް ގޮވައިފި ނަމަ ހުރިހާ އެއްޗެއްގެ ނިމުން އެއީ. ޔޫރަޕުގެ ނިމުން އެއީ. ރަޝިޔާ ސިފައިން ހުއްޓުވޭނީ ޔޫރަޕުން ވަގުތުން ފިޔަވަޅު އަޅައިގެން."
ޔުކްރޭނުގެ މިލިޓަރީ އެޑްމިނިސްޓްރޭޝަނުގެ ވެރިޔާ ވިދާޅުވީ ނިއުކްލިއާ ސޭފްޓީގެ ޔަގީންކަން ޕްލާންޓުގެ ޑިރެކްޓަރު ދެއްވާފައިވާ ކަމަށެވެ.
ބައިނަލްއަގުވާމީ އެޓޮމިކް ހަކަތައާ ބެހޭ އެޖެންސީން ބުނީ އެ ސައިޓުގައި ރޭޑިއޭޝަން ލެވެލް އަށް ބަދަލެއް އައިސްފައި ނުވާ ކަމަށް ޔުކްރޭނުގެ ކަމާބެހޭ ފަރާތްތަކުން އަންގާފައިވާ ކަމަށެވެ.
ޔުކްރޭނުގެ އިމަޖެންސީ ސާވިސް އިން ބުނީ ޕަވަ ޕްލާންޓުގެ އަލިފާންގަނޑު މިއަދު ހެނދުނު ނިއްވާލާފައިވާ ކަމަށެވެ.