04 މާޗް 2022 - 06:47
އެޕަލްގެ އާ އުފެއްދުންތައް ދައްކާލުމަށް މި އަންނަ އަންގާރަ ދުވަހު، އަހަރުގެ ފުރަތަމަ އިވެންޓް ބާއްވަން ނިންމައިފި އެވެ.
އާ ހާޑްވެއާތައް ދައްކާލުމަށް ބާއްވާ އިވެންޓަށް މި އަހަރު ދީފައިވާ ނަމަކީ ޕީކް ޕަފޯމެންސް އެވެ. އަދި އެ އިވެންޓުން އެ ޓެގްލައިނަށް ބާރުދޭ ޑިވައިސްތައް ދައްކާނެ ކަމަށް ރިޕޯޓްތައް ބުނެ އެވެ.
ރިޕޯޓްތައް ބުނާ ގޮތުގައި އެ އިވެންޓުގައި ހަތަރު ޑިވައިސް އެއް ދައްކާލުމަށް ވަނީ ހަމަޖެހިފަ އެވެ. އޭގެ ތެރޭގައި އައިފޯން ލައިންގެ އެންމެ އަގުހެޔޮ "އެސްއީ" ލައިންގެ އެންމެ ފަހުގެ ފޯނު ވެސް ހިމެނެ އެވެ. ކުރީގެ އައިފޯން އެސްއީގެ ޑިޒައިނާ މި އަހަރު ނެރޭ އެސްއީ ޑިޒައިނާ އެއްގޮތް ވާނެ އެވެ. ހަމައެކަނި ތަފާތު ވާނީ އޭ15 ޗިޕްސެޓާއި 5ޖީގެ ހިދުމަތެވެ.
އާ އައިޕެޑް އެއާ އާއި މެކް މިނީ ވެސް އެ އިވެންޓުގައި ދައްކާލުމަށް ވަނީ ހަމަޖެހިފަ އެވެ. އައިޕެޑްގެ ޑިޒައިނަށް ވެސް ބަދަލުތަކެއް ގެންނާނެ ކަމަށްވެ އެވެ. އެ ޑިވައިސް އަށް ވެސް ފަހުގެ ޗިޕް އަދި 5ޖީ ހިދުމަތް ލިބޭނެ އެވެ. މެކް މިނީގެ ޑިޒައިނަށް ބޮޑު ބަދަލެއް އަންނާނެ އިރު، މެކް މިނީގެ ޑިޒައިން ކުރިއަށް ވުރެ ތުނި ވާނެ ކަމަށް ލަފާކޮށްފައިވެ އެވެ. އަދި އެޕަލްގެ އެންމެ ފަހުގެ ޕްރޮސެސިން ޗިޕްތައް އެ ޑިވައިސްގައި ބޭނުންކުރުމަށް ހަމަޖެހިފައިވާ ކަމަށްވެ އެވެ.
އެ އިވެންޓް ދައްކާލާނެ އެންމެ ފަހު ޑިވައިސަކީ މިދިޔަ އަހަރު ނެރުނު މެކްބުކް ޕްރޯ އަށް އަޕްޑޭޓު ގެންނަ އާ ޗިޕާ އެކު ދައްކާލާ ޑިވައިސް އެވެ. މިދިޔަ އަހަރުގެ މެކްބުކް ޑިޒައިނަށް ބަދަލު ނުގެނަޔަސް، އެ ޑިވައިސްގައި "އެމް2" ޗިޕް ބޭނުންކުރުމަށް ވަނީ ހަމަޖެހިފަ އެވެ. އެއީ ވަރަށް ވަރުގަދަވާނެ ކަމަށް ބެލެވޭ އެޕަލްގެ އާ ޕްރޮސެސިން ޗިޕެވެ.