02 މާޗް 2022 - 14:03
ބޭނުން ނުކޮށް ބަހައްޓާފައި ހުންނަ ކޮންޓެއިނަރުތައް ބޭނުންކޮށްގެން ހުޅުމާލޭގައި ތަރައްގީކުރާ "ކޮންޓެއިނަ ޕާކް'' މިއަހަރު ހުޅުވަން ނިންމައިފި އެވެ.
އެ ޕާކުގެ މަސައްކަތް އެޗްޑީސީން އަންނަނީ މިހާރު ވެސް ކުރަމުން އަންނައިރު އަންނަ ރޯދަ މަހުގެ ކުރިން މަސައްކަތް ނިންމާލެވޭނެ ކަމަށް އެ ކުންފުނިން ލަފާކުރެ އެވެ.
ކޮންޓެއިނަ ޕާކަކީ ކެފޭ އާއި އެގްޒަބިޝަން ސްޕޭސް ފަދަ ތަފާތު މަސައްކަތްތައް ކުރަން ކޯ ވޯކިން ސްޕޭސްގެ ގޮތުގައި ދޫކުރަން ހަމަޖެހިފައިވާ ތަނެކެވެ. އެ ޕާކަށް އާއްމުންނަށް ވެސް ވަދެވޭނެ އެވެ.
އެ ޕާކުގައި ހިމަނާ އެގްޒިބިޝަން ސްޕޭސްގައި ދިވެހި ފަންނުވެރިންގެ މަސައްކަތްތައް ދައްކާލަން މައުރަޒުތައް ބޭއްވޭނެ ކަމަށް އެޗްޑީސީން ބުންޏެވެ. ކުދި އަދި މެދު ފަންތީގެ ވިޔަފާރިތަކަށް ވެސް ގިނަ ފުރުސަތުތަކެއް އެ ޕާކާ އެކު ހުޅުވާލެވޭނެ ކަމަށް ވެސް އެ ކުންފުނިން ބުންޏެވެ.
މިއީ ރާއްޖޭގައި މުޅިން އާ ކޮންސެޕްޓަކަށް ތަރައްގީކުރާ ޕާކެކެވެ. އެ ޕާކުގެ މިހާރު ކުރަމުން އަންނަނީ ހުޅުވުމަށް ކުރަން ޖެހޭ އެންމެ ފަހުގެ ތައްޔާރީތަކުގެ މަސައްކަތެވެ.
އެ ޕާކު ތަރައްގީކުރަނީ ހުޅުމާލެ ރެޑްވޭވް މެގަ މޯލްގެ ފަހަތުގަ އެވެ.