23 ފެބުރުއަރީ 2022 - 06:36
ޓިކްޓޮކްގައި މަޝްހޫރުވި "ކައްޗާ ބަދާމް" ލަވަކީ އިންޑިއާގެ ބެންގޯލްގައި ބަދަނުގެ ވިޔަފާރީކުރާ މީހާ، އޭނާ މާ ބޮޑަށް މަޝްހޫރުވުމުން އެ ވިޔަފާރީ ހުއްޓާލައިފި އެވެ.
ބުބަން ބަޑޭކަރު ކިޔާ 50 އަހަރުގެ އެ މީހާ އަކީ ބަދަން ވިއްކައިގެން އޭނާގެ އާއިލާގެ 10 މެމްބަރުންގެ ކަންކަން ބަލަހައްޓަމުން އައި، ވަރަށް ހާލުގައި އުޅުނު މީހެކެވެ. އޭނާ ކިޔާފައިވާ "ކައްޗާ ބަދާމް" ލަވަ ސޯޝަލް މީޑިއާގައި ވަރަށް ވައިރަލްވި އެވެ. އޭގެ ފަހުން އޭނާ އަށް ގިނަ ފުރުސަތުތައް ލިބޭއިރު، މިހާރު އޭނާ ނައިޓް ކްލަބުތަކުގައި ވެސް ޕާފޯމްކުރެ އެވެ.
މިދިޔަ ހުކުރު ދުވަހުގެ ރޭ ނައިޓް ކްލަބެއްގައި އޭނާ ދިން ޝޯއެއްގައި ބުނީ، މީގެ ތިން މަސް ދުވަސް ކުރިން ބަދަން ވިއްކައިގެން އޭނާ އާއިލާގެ ހަރަދުތައް ބަލަހައްޓަމުން އައީ ކިރިޔާ ކަމަށެވެ. އެކަމަކު، މިދިޔަ ހަފުތާގައި މިއުޒިކް އުފައްދާ ކުންފުންޏަކުން އޭނާގެ "ކައްޗާ ބަދާމް" ލަވައިގެ ރޯޔަލްޓީ ގަނެ، 1.5 ލައްކަ ރުޕީސް ދީފައިވާ ކަމަށެވެ.
އުމުރު އެހާ މަތިވެފައި ވަނިކޮށް، އެހާ ބޮޑު މަޝްހޫރުކަމެއް ލިބުމުން އޭނާ ހުރީ ހައިރާންވެފަ އެވެ.
"އަހަރެން މާ ބޮޑަށް މަޝްހޫރުވިމާ، ރަށު މީހުން ބުނީ ކަލޭ ބަދަން ވިއްކަން ނިކުމެ އުޅެނިކޮށް ކިޑްނެޕް ކޮށްފާނެއޭ. އެހެންވެ، ބަދަން ވިއްކަން ދިއުން ހުއްޓާލީ،" އޭނާ ބުންޏެވެ.
"އަހަރެން އަބަދު ވެސް ބޭނުންވީ އާޓިސްޓަކަށް ވާން. އަހަންނަކީ މިހާރު ސެލެބްރިޓީއެއް. އަހަރެން ސެލެބްރިޓީއަކަށް ވެ ހުރެ، ބަދަން ވިއްކަން ނިކުމެއްޖެއްޔާ މީހުން ކުރާނީ މަލާމާތް."
މިފަހުން ބުބަން ވަނީ ބެންގޯލްއެއް އެންމެ މަޝްހޫރު ރިއަލިޓީ ޝޯ "ދާދާގިރީ އަންލިމިޓެޑް" އަށް ވެސް ގޮސްފަ އެވެ. ބެންގޯލްގެ އާޓިސްޓުންތަކެއް ވަނީ އޭނާއާ އެކު އެ ލަވައިގެ ރިމިކްސް ވީޑިއޯއެއް ވެސް ހަދައިފަ އެވެ. އެ ލަވަ އަށް ވަނީ ޔޫޓިއުބްގައި 53 މިލިއަނަށް ވުރެ ގިނަ ވިއުސް ލިބިފަ އެވެ.