19 ޑިސެމްބަރ 2016 - 08:38
މެންޗެސްޓާ (ޑިސެމްބަރު 19) – ޕްރިމިއާ ލީގުގެ ކުރީގައި އޮތް ޗެލްސީ ފޯމުން ކަޓައިފި ނަމަ، އެއް ވަނަ އަށް އަރަން މެންޗެސްޓާ ސިޓީ އޮތީ ތައްޔާރަށް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
ސިޓީން ވަނީ ރޭ ވާދަވެރި އާސެނަލް އަތުން ފަހަތުން އަރައި 2-1 އިން މޮޅުވެ 36 ޕޮއިންޓާ އެކު އަލުން ދެ ވަނަ މަގާމަށް އަރައިފަ އެވެ. ޗެލްސީ އެއް ވަނައިގައި އޮތީ ހަތް ޕޮއިންޓުގެ ލީޑަކާ އެކު 43 ޕޮއިންޓް ހަމަކޮށްގެންނެވެ. ސިޓީ އަށް ދެ ވަނައިގައި ދެމި އޮވެވޭނީ މިރޭ އެވަޓަން އަތުން ލިވަޕޫލް މޮޅުނުވެއްޖެ ނަމަ އެވެ. ތިން ވަނައިގައި 34 ޕޮޮއިންޓާ އެކު ލިވަޕޫލް މޮޅުވެއްޖެ ނަމަ އެ ޓީމު ދެ ވަނަ އަށް އަަރާނެ އެވެ. އަނެއްކޮޅުން 34 ޕޮއިންޓާ އެކު އާސެނަލް ހަތަރު ވަނަ އަށް ވެއްޓިފައިވާއިރު މިރޭ ދެ ލަނޑުގެ ތަފާތަކުން ލިވަޕޫލް ބަލިވެއްޖެ ނަމަ އެ ޓީމު ހަތަރަކަށް ވެއްޓި އާސެނަލް ތިން ވަނަ އަށް އަރާނެ އެވެ.
ސިޓީގެ އިއްތިހާދު ސްޓޭޑިއަމުގައި ރޭ ކުޅުނު މެޗުގެ ފަސް ވަނަ މިނެޓުގައި ތިއޯ ވޮލްކޮޓް ވަނީ އާސެނަލަށް ލީޑު ނަގައިދީފަ އެވެ. ސިޓީ އަށް އެއްވަރުކޮށްދިނީ ދެ ވަނަ ހާފު ފަށައިގެން ދެ ވަނަ މިނެޓުގައި ލެރޯއީ ސާނޭ އެވެ. އެ ޓީމު މޮޅުކޮށްދިނީ 71 ވަނަ މިނެޓުގައި ރަހީމް ސްޓާލިން އެވެ.
ސީޒަނުގެ ކުރީކޮޅު މޮޅު ކުޅުމެއް ދެއްކި ނަމަވެސް ފަހަކަށް އައިސް ސިޓީގެ ނަތީޖާތައް ދަށްވެފައިވާއިރު ގާޑިއޯލާ ބުނީ ރޭގެ މޮޅާ އެކު ކުޅުންތެރިންގެ ހިތްވަރު ވަރަށް ބޮޑަށް އާވާނެ ކަމަށެވެ.
"ހަތް ޕޮއިންޓުގެ ފަރަގަކީ ވަރަށް ބޮޑު ތަފާތެއް. އެކަމަކު އަހަރެމެން ތިބޭނަން ޗެލްސީ ގޯހެއް ހަދާތޯ ބަލަބަލައި، ސީޒަނުގެ ފަހު ވަގުތާ ހަމަޔަށް ވެސް. ސިޓީ އޮންނާނީ އެއް ވަނަ އަށް އަރަން ތައްޔާރުގައި،" ގާޑިއޯލާ ބުންޏެވެ.
ގާޑިއޯލާ ބުނީ ރޭގެ މެޗުގެ ފުރަތަމަ ހާފުގައި އާސެނަލްގެ ނަސީބު ރަނގަޅު ކަމަށާއި ދެ ވަނަ ހާފުގައި ސިޓީން މޮޅަށް ކުޅެ މެޗު ކާމިޔާބުކުރީ ކަމަށެވެ. އަދި ޗެލްސީ އަތުން 3-1 އިން ބަލިވި މެޗުގައި ވެސް ސިޓީން ރޭ ދެއްކި ކުޅުން ދެއްކި ކަމަށާއި ތަފާތަކީ އެރޭ ބަލިވުން ކަމަށެވެ.
"އާސެނަލްގެ ވަރުގަދަ ޕްރެސިން ގޭމުގެ ސަބަބުންނާއި ޑިފެންސް ވަރުގަދަ ވީމާ ކުޅެން އުދަނގޫވި. އެކަމަކު އަހަރެމެންގެ މުހިއްމު ބައެއް ކުޅުންތެރިން އަނިޔާއަށް ފަހު އެނބުރި އައުމުން ގިނަ ގޯލް ޖެހޭނެ،" ގާޑިއޯލާ ބުންޏެވެ.