21 ޑިސެމްބަރ 2016 - 06:31
ފުރަތަމަ ނަޒަރުން މިއީ ފެން ކުލައިން ކުރުހާފައިވާ ތަސްވީރެއް ގޮތަށް ފެނިދާނެ އެވެ. ނަމަވެސް ކައިރިން ބަލާލުމުން މި ތަސްވީރުގެ ތަފާތު ކަން އިނގޭނެ އެވެ.
އިނގިރޭސިވިލާތުގައި މަސައްކަތް ކުރާ ފަންނުވެރިއެއް ކަމަށްވާ އިއޭން ބެރީ އޭނާގެ ހުނަރު ހުށަހަޅައިދެނީ ވަރަށް ތަފާތު ގޮތަކަށެވެ. ކުލަ އާއި ފިއްސެއްގެ ބަދަލުގައި ބޭނުންކުރަނީ ޑެނިމް ޖިންސު ފޮއްޗެވެ. އެކި ވަރު ވަރަށް ޑެނިމް ފޮތިކޮޅު ކަނޑައިގެން ބޮޑެތި ތަސްވީރު ތައްޔާރުކުރެ އެވެ.
"އަހަރެންގެ މަސައްކަތުން ފެންނާނީ ހަމައެކަނި ޑެނިމް. ބްލީޗް ނުވަތަ ކުލައެއް ވެސް ނޫން. އިތުރު އެއްޗެއް ނުފެންނާނެ،" އިއޭން ބުންޏެވެ.
ޑެނިމް ފޮތި މަތީ ކުލަ ޖައްސާ، ބްލީޗުކޮށް ނުވަތަ ފެހުމުގެ ބަދަލުގައި ކަތުރަކުން ކޮންމެ ފޮތިކޮޅެއް ބޭނުންވާ ސައިޒަކަށް ކަނޑައިގެން ތަސްވީރު ފުރިހަމަ ކުރަނީ އެވެ. ތަސްވީރުގައި ފެންނަ މަންޒަރުތަކާއި ފެންނަ އެއްޗެހީގެ ބައްޓަން ސިފަކޮށްދޭން އެކި ކުލައިގެ ޑެނިމް ފޮތިން މަތިި މައްޗަށް ތެރަހުން ތައްކުރަނީ އެވެ. އަލި ޖެހޭ ތަންތަން އަދި ހިޔަނި އެޅިފައިވާ ތަންތަން ވެސް 'ފޮޓޯ ރިއަލިސްޓިކް' ސިފައަކަށް ދައްކާލަދެ އެވެ.
އިއޭންގެ އެންމެ ފަހުގެ ސީރީޒް އަކީ 'މައި ބިއުޓިފުލް ލޯންޑްރެޓް' އެވެ. ލޯންޑްރެޓް ނުވަތަ އާއްމުންނަށް ދޮންނަ މެޝިނު ބޭނުންކުރެވޭ ތަންތަނުގެ އަސްލު މަންޒަރުތައް ޑެނިމް ބޭނުންކޮށްގެން ދައްކާލި އެވެ. އިއޭން ބުނި ގޮތުގައި އިނގިރޭސިވިލާތުގެ ލަންޑަނުން ލޯންޑްރެޓްތައް މަދުވާން ފެށުމުން، އެތަންތަނުގެ އުފާވެރި ހަނދާންތައް އައުކޮށްދޭން ބޭނުންވީ އެވެ. ލޯންޑްރެޓްތަކުން އެކި މީހުންނާ ދިމާވެ، އެ ހިސާބެއްގައި ދިރިއުޅޭ މީހުންގެ ތެރޭގައި އޮންނަ ގުޅުން ބަދަހިވެ އެވެ.
ލަންޑަންގެ ގެލެރީއެއްގައިި އޭނާ މި ސީރީޒް ދައްކާލި އިރު އޭގެ ތެރޭގައި ޑެނިމް ފޮތި ބޭނުންކޮށްގެން އަސްލު ލޯންޑްރެޓެއްގެ ސައިޒަށް؛ ހެދި ތަސްވީރު ހިމެނެ އެވެ.