06 ފެބުރުއަރީ 2022 - 05:58
ދުނިޔެއިން ނެތިގެން ހިނގައިދާނެ ކަމުގެ ބިރުހީވެފައިވާތީ، ހިމާޔަތްކޮށްފައިވާ ގުރާގެ ވައްތަރެއް ކަމަށްވާ، އެފްރިކަން ގްރޭ ވިއްކާ މީހަކު ބީބީސީން ބޭޒާރުކޮށްލައިފި އެވެ.
ބީބީސީގެ އަންޑަކަވާ ނޫސްވެރިން ކުރި ތަހުގީގެއްގައި ފަޅާއަރުވާލައިފައި ވަނީ ބަގުލަދޭޝްގައި އެފްރިކަން ގްރޭގެ ވިޔަފާރީކުރާ ފައިޒް އަހުމަދު ކިޔާ މީހެކެވެ. މި ގުރާ އެ ގައުމަށް އެތެރެކޮށް، އޭގެ ވިޔަފާރީ ކުރާ ގޮތް، އޭނާ ވަނީ ވަރަށް ތަފުސީލުކޮށް އެ ނޫސްވެރިންނަށް ކިޔައިދީފަ އެވެ.
ބައިނަލްއަގުވާމީ ގާނޫނާއި އިންޓަނޭޝަނަލް ޔޫނިއަން ފޯ ދި ކޮންސަވޭޝަން އޮފް ނޭޗާ ރެޑް ލިސްޓުގައި ބުނާ ގޮތުން، "ވައިލްޑް ކޯޓް" ނުވަތަ އަސްލު ދިރިއުޅޭ މާހައުލުން ހިފައިގެން ގެންނަ އެފްރިކަން ގްރޭ ވިއްކުމަކީ މަނާ ކަމެކެވެ.
އެފްރިކަން ގްރޭ ދުނިޔެއިން ނެތިގެން ހިނގައިދާނެ ކަމުގެ ބިރު ހީވެފައި ވާތީ، އދ. ގެ ހިމާޔަތްކޮށްފައިވާ އެއްޗެހީގެ ލިސްޓުގައި ވެސް މި ދޫނި ހިމަނާފައިވެ އެވެ.
ފާއިޒް ބުނި ގޮތުގައި، ބަގުލަދޭޝްގެ ކަސްޓަމްސްގެ ތެރެއިން އެފްރިކް ގްރޭ ކްލިއާ ކޮށްގެން ނެރުމަކީ އޭނާ އަށް އެއްވެސް ކަމެއް ނޫނެވެ.
"އެފްރިކަން ގްރޭ އެތެރެކުރަން ހުއްދަ ހޯދުމަކީ ވަރަށް އުނދަގޫކަމެއް. ދެން އުޅޭނެ އެއާ ވައްތަރު އެހެން ގުރައެއް، ޓިމްނެއް ޕެރޮޓް. އެ ވައްތަރުގެ ގުރައަށް ވަރަށް ފަސޭހައިން ހުއްދަ ލިބޭތީ، އެ ނަމުގައި އެފްރިކަން ގްރޭ އެތެރެ ކުރަނީ،" އޭނާ ބުންޏެވެ.
މި އެފްރިކަން ގްރޭތައް ވިއްކުމަށް އޭނާ ވަރަށް ހާމަކަން ބޮޑު ގޮތެއްގައި، ސޯޝަލް މީޑިއާގައި ވެސް އިޝްތިހާރުކުރެ އެވެ. ބީބީސީން އެ ވާހަކަ ރިޕޯޓްކުރުމާ އެކު، ފޭސްބުކް އާއި އިންސްޓަގްރާމްގައި އޭނާ ކޮށްފައި ހުރި ޕޯސްޓުތައް ވަނީ ދުއްވާލައިފަ އެވެ.
ފަހުން ބީބީސީގެ ޕްރޮޑިއުސަރަކު އޭނާ ގާތުގައި އެފްރިކަން ގްރޭ ވަގުވިޔަފާރީ ކުރޭތޯ އެހުމުން އޭނާ އެކަމަށް އިންކާރު ކުރިޔަސް، ފަހުން އެކަމަށް އެއްބަސްވެ، އޭނާ ބުނީ އެއީ މަނާ ވިޔަފާރީއެއް ކަމެއް ނޭނގޭ ކަމަށާއި ބަންގުލަދޭޝްގައި އެ ވައްތަރުގެ ދޫނި ވިއްކާ ވަރަށް ބައިވަރު އެހެން މީހުން ވެސް އުޅޭ ކަމަށެވެ.
ބީބީސީގެ ރިޕޯޓުގައި ބުނެފައި ވަނީ، އެމީހުން ބެލިބެލުމުން އެނގިފައިވާ ގޮތުގައި، އެފްރިކާ އާއި އޭޝީއާގެ އެކި ގައުމުތަކުގައި އެފްރިކަން ގްރޭ ވިއްކުމަށް އިންޓަނެޓްގެ އެކި ވަސީލަތައް ބޭނުންކޮށްގެން 4،500 އަށް ވުރެ ގިނަ އިޝްތިހާރު ކޮށްފައިވާ ކަމަށާއި އަދި ހިމާޔަތްކޮށްފައިވާ ޖަނަވާރާއި ގަސް ވިއްކުމަށް 10،000 ވުރެ ގިނަ އިޝްތިހާރު ކޮށްފައިވާ ކަމަށެވެ.