29 ޖެނުއަރީ 2022 - 22:51
ފާއިތުވި 24 ގަޑިއިރުގެ ތެރޭގައި 7،013 ސާމްޕަލް ކޮވިޑަށް ޓެސްޓް ކުރިއިރު އޭގެ ތެރެއިން 2،689 މީހަކު އެ ބައްޔަށް ޕޮޒިޓިވްވެފައިވާ ކަމަށް އެޗްޕީއޭ އިން މިރޭ ބުނެފި އެވެ.
އެ އިދާރާ އިން އާންމުކުރި، އިއްޔެގެ ހަވީރު 6 އިން މިއަދުގެ ހަވީރު 6 އާ ހަމައަށް ތައްޔާރު ކޮށްފައިވާ ތަފާސްހިސާބުތައް ދައްކާ ގޮތުން 7،013 ސާމްޕަލްގެ ތެރެއިން 3،445 ސާމްޕަލް ނެގީ މާލެ ސަރަހައްދުންނެވެ. އޭގެ ތެރެއިން 1،296 މީހަކު ކޮވިޑަށް ޕޮޒިޓިވް އެވެ. އަދި ރަށްރަށުން 994 މީހަކާއި ރިސޯޓުތަކުން 20 މީހަކު ޕޮޒިޓިވްވި އެވެ.
ރާއްޖެއިން ކޮވިޑް ޖެހުނު މީހުންގެ ޖުމުލަ އަދަދަކީ މިހާރު 133،288 އެކެވެ. އަދި 115،269 މީހަކު ބަލިން ރަނގަޅުވެފައި ވާތީ، މިހާރު ކޮވިޑް ޖެހިފައވާ މީހުންގެ އަދަދަކީ 17،732 އެކެެެވެ.
އެޗްޕީއޭ އިން ބުނިގޮތުގައި ހޮސްޕިޓަލުގައި އެޑްމިޓްކޮށްގެން ފަރުވާދޭ މީހުންގެ އަދަދު ރެ އަށް ވުރެ މިރޭ އިތުރެވެ. އިއްޔެ 49 މީހަކަށް ހޮސްޕިޓަލުގައި ފަރުވާދިން ނަމަވެސް މިހާރު އެ އަދަދަކީ 53 ކަމަށް އެޗްޕީއޭ އިން ބުންޏެވެ.
ކޮވިޑް ޖެހިގެން ރާއްޖެ އިން މަރުވި މީހުންގެ އަދަދަކަށް ފާއިތުވި 24 ގަޑިއިރު ބަދަލެއް ނާދެ އެވެ. މިހާތަނަށް އެ ބަލީގައި މަރުވީ 274 މީހެކެވެ.