23 ޖެނުއަރީ 2022 - 17:29
ހޭންވޭރު ދަނޑުގައި ކޮވިޑަށް ޓެސްޓުކުރާ ސާމްޕަލް ނަގާ ސެންޓަރެއް މިއަދު ހުޅުވައިފި އެވެ.
އެޗްޕީއޭ އިން ބުނީ މިއަދު މެންދުރު ފަހު 3 އިން ފެށިގެން އެ ސެންޓަރުގެ ހިދުމަތް ދެމުން އަންނަ ކަމަށެވެ. އަދި ކޮންމެ ދުވަހަކު ވެސް މެންދުރު ފަހު 3 އިން އިރުއޮއްސި 6 އަށް މި ސެންޓަރުން ސާމްޕަލްތައް ނަގާނެ ކަމަށެވެ.
ހެންވޭރު ދަނޑާ އެކު މިހާރު މާލެ ސަރަހައްދުގައި ހަ ތަނަކުން ކޮވިޑަށް ޓެސްޓުކުރާ ސާމްޕަލް ނަގައިދެ އެވެ. އެއީ ސޯޝަލް ސެންޓަރުންނާއި އެފްއޭމް ބިލްޑިންގައި ހަދާފައިވާ ސެންޓަރުންނާއި ވިލިމާލެ ފްލޫ ކުލިނިކާއި އަދި ހުޅުމާލެ ރުއްގަނޑު 1 ގައި ހަދާފައިވާ ސެންޓަރުންނެވެ. މީގެ އިތުރުން ސެނަހިޔާ އިން ވެސް ސާމްޕަލް ނަގައިދެ އެވެ.
ރާއްޖޭގައި މި ދުވަސްވަރު ކޮވިޑަށް ޕޮޒިޓީވްވާ މީހުންގެ އަދަދު ވަރަށް ބޮޑަށް އިތުރުވެފައިވާއިރު، ސާމްޕަލް ނަގާ ސެންޓަރުތަކަށް ވަނީ ވަރަށް ބާރުބޮޑުވެފަ އެވެ. އެޗްޕީއޭ އިން ހަދާފައިވާ ސެންޓަރުތަކުގެ އިތުރުން، ޕީސީއާރު ހަދައިދޭ އެހެން ސެންޓަރުތަކުގައި ވެސް ކިއުގައި ޖެހިގެން ގިނަ ބަޔަކު ޓެސްޓުކުރެ އެވެ.
ކޮވިޑް ބައްޔަށް މިހާރު ރާއްޖޭގައި 13،000 އަށް ވުރެ ގިނަ މީހުން އަންނަނީ ފަރުވާ ހޯދަމުންނެވެ.
އެޗްޕީއޭ އިން ރޭ އާންމުކުރި ތަފާސްހިސާބުތަކަށް ބަލާއިރު، ކޮވިޑް ޖެހިގެން 48 މީހަކު އެޑްމިޓް ކޮށްގެން މިހާރު ގެންދަނީ ފަރުވާ ދެމުންނެވެ. އޭގެ ތެރެއިން 37 މީހަކަށް ހުޅުމާލޭގެ ކޮވިޑް ފެސިލިޓީގައި ފަރުވާ ދެމުން އަންނައިރު، ހަތް މީހަކު ބާއްވާފައި ވަނީ އައިސީޔޫގަ އެވެ. އަދި ވެންޓިލޭޓަރުގައި ހަތަރު މީހަކަށް އަންނަނީ ފަރުވާ ދެމުންނެވެ.
ކޮވިޑުން ދިފާއުވުމަށް މިހާރު ރާއްޖޭގައި ބޫސްޓަ ޑޯޒް ޖަހަން ވެސް ވަނީ ފަށައިފަ އެވެ. އަދި ކޮވިޑް ވެކްސިންގެ ފުރަތަމަ ޑޯޒާއި ދެ ވަނަ ޑޯޒް ޖެހި މީހުންގެ އަދަދު މިހާރު 400،000 އާ ގާތްކުރެ އެވެ.