04 ޖެނުއަރީ 2022 - 13:57
މީގެ ދެ އަހަރު ކުރިން އީރާންގެ އަސްކަރިއްޔާގެ އިސް ޖެނެރަލް ގާސިމް ސުލައިމާނީ އަވަހާރަކޮށްލި މައްސަލައިގައި، އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ މައްޗަށް ދައުވާކޮށް ޝަރީއަތަށް ހާޒިރުކުރަންޖެހޭނެ ކަމަށް، އީރާންގެ ރައީސް އިބްރާހީމް ރައީސީ އިއްޔެ ވިދާޅުވެއްޖެ އެވެ.
އީރާންގެ އިންގިލާބީ ލަޝްކަރުގެ ކޮމާންޑަރު ޖެނެރަލް ސުލައިމާނީ އަވަހާރަކޮށްލީ، ޖެނުއަރީ 3، 2020 ގައި އިރާގުގެ ވެރިރަށް ބަގުދާދަށް ވަޑައިގެން، ކާރުގައި އެއާޕޯޓުން ނުކުމެވަޑައިގެންނެވި ތަނާ، އެމެރިކާގެ ޑްރޯން މަތިންދާބޯޓުތަކުން ދިން މިސައިލް ހަމަލާތަކެއްގަ އެވެ. އޭރު އެމެރިކާ އިން ބުނި ގޮތުގައި ސުލައިމާނީ އަވަހާރަކޮށްލުމަށް ހަމަލާ ދިނީ ސީދާ ރައީސް ޓްރަމްޕުގެ އަމުރަށެވެ.
ޖެނެރަލް ސުލައިމާނީ އަވަހާރަކޮށްލި ހާދިސާ އަށް ދެ އަހަރު ފުރުން ފާހަގަކުރުމުގެ ގޮތުން، ޓީވީ މެދުވެރިކުރައްވައި އީރާންގެ ރައީސް ދެއްވި ތަގުރީރެއްގައި ވިދާޅުވީ، އެމެރިކާ އިން ޓްރަމްޕުގެ މައްޗަށް ޝަރީއަތް ނުހިންގާ ނަމަ، ސުލައިމާނީގެ މަރުގެ ބަދަލު އީރާނުން ހިފަންޖެހޭނެ ކަމަށެވެ.
ރައީސީ ވިދާޅުވި ގޮތުގައި ޖެނެރަލް ސުލައިމާނީ ދަތުރުކުރެއްވި މޮޓޯކޭޑަށް ހަމަލާދިނުމަށް އަމުރު ކުރެއްވި ހަގީގީ ގާތިލަކީ އަދި މުޖުރިމަކީ ޓްރަމްޕު ކަމަށްވާއިރު، އޭނާގެ މައްޗަށް ﷲގެ ހުކުމްފުޅު ތަންފީޒުކުރަންޖެހޭނެ އެވެ. އަދި އެކަމަށް އޮތް އިސްލާމީ ޙުކުމަކީ ގިސާސް ހިފުން ކަމަށް ވެސް ރައީސީ ވިދާޅުވި އެވެ.
ޖެނެރަލް ސުލައިމާނީ އަވަހާރަކޮށްލުމުގެ ޒިންމާ އުފުލަންޖެހޭ ފަރާތްތަކުގެ މައްޗަށް އިންސާފުވެރި ޝަރީއަތެއް ހިންގުމަށްޓަކައި، ވަކި ފަރާތަކަށް ނުޖެހޭ މިނިވަން ކޯޓެއް އުފެއްދުމަށް ވެސް ރައީސީ ގޮވައިލެއްވި އެވެ. އެ ކޯޓަށް ހާޒިރުކޮށް ޝަރީއަތް ހިންގުމަށް ފަހު އަދަބު ދޭންޖެހޭނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ އިތުރުން އެމެރިކާގެ އޭރުގެ ދިފާއީ ވަޒީރު މައިކް ޕޮމްޕެއޯ އާއި އެމެރިކާގެ އޭރުގެ އިސް ވެރިންނަށް ކަމަށް ވެސް ރައީސީ ވިދާޅުވި އެވެ.
"އެފަދަ ކޯޓެއް އުފައްދައިގެން އެ މައްސަލައިގައި ޝަރީއަތް ނުހިންގާ ނަމަ، ފަހަރެއްގައި ވެސް ޝައްކު ނުކުރާތި، އެމެރިކާގެ ހުރިހާ ވެރިންނަށް އަހަރެން މި ބުނަނީ، ބަދަލު ހިފާނެ އަތްތަކެއް އިސްލާމީ އުންމަތުގެ ކޮނޑުހުޅުން ނުކުމެގެން އަންނާނެކަން ހަނދާން ކުރާތީ،" ރައީސީ ވިދާޅުވި އެވެ.
އެމެރިކާގެ އަސްކަރީ ޑްރޯންތަކުން ދިން މިސައިލް ހަމަލާތަކެއްގައި ޖެނެރަލް ސުލައިމާނީ އަވަހާރަކޮށްލީ، އިރާގުގެ ރައީސް ދައުވަތަކަށް ކުރެއްވި ރަސްމީ ދަތުރުފުޅެއްގައި އިރާގަށް ވަޑައިގެންނެވި ތަނުންނެވެ.