04 ޖެނުއަރީ 2022 - 11:08
ބާސެލޯނާ (ޑިސެމްބަރު 4) – ދާދި ފަހުން މެންޗެސްޓާ ސިޓީ ދޫކޮށް ބާސެލޯނާ އަށް ބަދަލުވި ސްޕެއިންގެ ފޯވާޑް ފެރާން ޓޮރޭޒް ބާސެލޯނާ ކުޅުންތެރިއެއް ގޮތުގައި ދައްކާލި ދުވަހު އޭނާއަށް ކޮވިޑް ޖެހިފައިވާކަން އެ ކުލަބުން ހާމަކޮށްފި އެވެ.
މިދިޔަ ޑިސެމްބަރު ފަހު ކޮޅު ޓޮރޭޒް ބާސެލޯނާ އަށް ބަދަލުވާން އެއްބަސްވެ، ފަސް އަހަރުގެ އެއްބަސްވުމެއްގައި ސޮއިކުރީ 65 މިލިއަން ޔޫރޯގެ ފީއަކަށެވެ. އަދި ބާސެލޯނާ އިން ވަނީ އޭނާގެ ރިލީޒް ކްލޯސް އަކީ އެއް ބިލިއަން ޔޫރޯ ކަމަށް ހަމަޖައްސައިފަ އެވެ.
މިދިޔަ މަހު ބާސެލޯނާ އަށް ސޮއިކުރި ނަމަވެސް ރަސްމީކޮށް ބާސެލޯނާ ކުޅުންތެރިއެއްގެ ގޮތުގައި ޓޮރޭޒް މީޑިއާ އަށް ދައްކާލީ އިއްޔެ އެވެ. އޭނާ ވަނީ ބާސެލޯނާ އެކު ޓީމުގެ ފަރިތަކުރުންތަކުގައި ވެސް ބައިވެރިވާން ފަށައިފަ އެވެ. ރަސްމީކޮށް ޓޮރޭޒް ދައްކާލިތާ ނުވަގަޑިއިރެއްހާއިރު ފަހުން ބާސެލޯނާ އިން ކުރި ޓްވީޓެއްގައި ބުނެފައި ވަނީ އެ ޓީމުގެ ޕެޑްރީ އާއި ފެރާން ޓޮރޭޒް ކޮވިޑް-19 އަށް ޕޮޒިޓިވްވެފައިވާ ކަމަށެވެ.
"ޕެޑްރީ އާއި ފެރާން ޓޮރޭޒް ވަނީ ކޮވިޑް-19 އަށް ޕޮޒިޓިވްވެފައި. ދެ ކުޅުންތެރިންގެ ހާލު ވެސް ރަނގަޅު. އަދި އެ މީހުން ތިބީ ގޭގައި އައިސޮލޭޓް ވެގެން،" ބާސެލޯނާގެ ޓްވީޓްގައިވެ އެވެ.
ބާސާ އިން މިދިޔަ އާދިއްތަ ދުވަހުގެ ރޭ ލީގުގައި މަޔޯކާއާ ދެކޮޅަށް ކުޅުނު މެޗަށް ނުކުތީ ކޮވިޑަށް ޕޮޒިޓިވް ވެގެން އެ ޓީމުގެ 10 ކުޅުންތެރިން ސްކޮޑުގައި ނުހިމަނަ އެވެ. އޭގެ ސަބަބުން ގިނަ ޒުވާން ކުޅުންތެރިންނާ އެކު ވެސް ބާސެލޯނާ ވަނީ ރަށުން ބޭރުގައި ކުޅުނު އެ މެޗް 1-0 އިން ކާމިޔާބު ކޮށްފަ އެވެ. އެ ޓީމު ވަނީ ހަތަރުވަނައިގައި އޮތް، އެންމެ ފަހުގެ ޗެމްޕިއަން އެތުލެޓިކޯ މެޑްރިޑާ އެއް ޕޮއިންޓަށް ކައިރިކޮށްފަ އެވެ.
ބާސާ ދެން އެންމެ އަވަހަށް ކުޅޭނީ ކޮޕަ ޑެލްރޭގައި، އަންނަ ބުދަ ދުވަހުގެ ރޭ ރަށުން ބޭރުގައި، ތިންވަނަ ޑިވިޝަނުގެ ލިނަރެސް ޑިޕޯޓިވޯއާ ދެކޮޅަށެވެ. އެއަށް ފަހު ހޮނިހިރު ދުވަހުގެ ރޭ ލީގުގައި، ރަށުން ބޭރުގައި ގްރަނާޑާއާ ދެކޮޅަށް ކުޅެ، އޭގެ ތިން ދުވަސް ފަހުން ސްޕެނިޝް ސުޕަ ކަޕް ސެމީ ފައިނަލުގައި ރެއާލް މެޑްރިޑާ ދެކޮޅަށް ކުޅޭނެ އެވެ.