13 ޑިސެމްބަރ 2016 - 19:30
ހުޅުމާލޭގައި ހުންނަ ކުޑަކުދިންގެ ހިޔާ، "ފިޔަވަތި" ގައި ދިރިއުޅޭ ކުދިންނަށް، 50،000 އަށް ވުރެ ގިނަ ރުފިޔާގެ ތަކެތި މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ މުވައްޒަފުން ހަދިޔާކޮށްފި އެވެ.
މީރާ އިން މިއަދު ނެރުނު ބަޔާނެއްގައި ބުނެފައި ވަނީ ފިޔަވަތީގައި ދިރިއުޅޭ ކުދިންނަށް މި ތަކެތި ހަވާލުކުރުމަށް މިދިޔަ ހޮނިހިރު ދުވަހު ކުޑަކުދިންގެ ހަވީރެއް ބާއްވާފައިވާ ކަމަށެވެ. އެ ހަވީރުގައި ކޮމިޝަނާ ޖެނެރަލް އޮފް ޓެކްސޭޝަން ޔަޒީދު މުހައްމަދާއި ޑެޕިއުޓީ ކޮމިޝަނާ ޖެނެރަލް ހަސަން ޒައީދުގެ އިތުރުން ގިނަ އަދަދެއްގެ މުވައްޒަފުން ބައިވެރިވި އެވެ.
މީގެ އިތުރުން، ޖެންޑާ އެންޑް ފެމިލީގެ ޑެޕިއުޓީ މިނިސްޓަރު މުހައްމަދު ޒާހިދާއި އެގްޒެކެޓިވް ކޯޑިނޭޓަރު މުންޒިރު އިސްމާއީލާއި ފިޔަވަތީގެ ސީއީއޯ ފާތިމަތު ޝިޔާމާ އާއި އެ ތަނުގެ އިސްވެރިންނާއި މުވައްޒަފުން ވެސް މި ހަވީރުގައި ބައިވެރިވި އެވެ.
އެ ކުޑަކުދިންގެ ހަވީރުގައި ވާހަކަ ދައްކަވަމުން ފިޔަވަތީގެ ސީއީއޯ ފާތިމަތު ޝިޔާމާ ވިދާޅުވީ މީރާ އަކީ މުޖުތަމައަށް އެހީތެރިވުމުގައިި ނަމޫނާ މުއައްސަސާއެއް ކަމަށާއި އެ އޮތޯރިޓީގެ މުވައްޒަފުންގެ ފަރާތުން ކޮންމެ އަހަރަކު ވެސް ލިބެމުންދާ އެހީތެރިކަމަކީ ފިޔަވަތި ފަދަ ތަނެއް ހިންގުމަށް ލިބޭ ވަރަށް ބޮޑު އެހީތެރިކަމެއް ކަމަށެވެ.
މިއީ މީރާގެ އިޖްތިމާއީ ޒިންމާގެ ދަށުން ކޮންމެ އަހަރަކު ވެސް ހިންގާ ހަރަކާތެކެވެ.