14 ޑިސެމްބަރ 2016 - 06:29
ގޮތް ނޭނގޭ ވަރަށް ބޮޑު އެއްޗެއް ނިއު ޒިލެންޑްގެ ގޮނޑުދޮށަށް ލައްގައިފި އެވެ. އޭގެ ފޮޓޯއެއް ސޯޝަލް މީޑިއާގައި ޝެއާކުރުމާ އެކު ތަފާތު ޚިޔާލުތައް ފާޅުކުރަމުން އެބަ ދެ އެވެ.
މި އެތިގަނޑު ލެއްވީ އޯކްލެންޑްގެ މުރިވާއީ ބީޗަށެވެ. މީގެ ފޮޓޯ ނެގީ އެ ހިސާބުގައި ދިރިއުޅޭ މެލީސާ ޑަބަލްޑޭ ކިޔާ މީހެކެވެ. އެ އަންހެން މީހާއަށް ވެސް އެއީ ކޯޗެއްކަން ނޭނގިގެން ސުވާލުކުރި އެވެ.
މުޅި އެތީގައި ރިނދަލިތައް ދަތްލާފައި ހުއްޓެވެ. އޭގެ އިތުރުން ފަނިތަކެއް ކަހަލަ ދިގު އެއްޗެހިތަކެއް ހުއްޓެވެ. މިއީ ދުވަހަކު ވެސް ދެކެފައިނުވާ ވައްތަރުގެ އެއްޗެއް ކަމަށް އޭނާ ބުނެ އެވެ.
"އަހަރެން ހީކުރީ އެއީ މަރުވެގެން ލެއްގި ބޮޑު މަހެއް ކަމަށް،" ޑަބަލްޑޭ ބުންޏެވެ.
ސޯޝަލް މީޑިއާގައި މިއާ ބެހޭ ގޮތުން އެކި މީހުންގެ ޚިޔާލު ތަފާތެވެ. އެކަކު ބުނީ އެއީ ހަލާކުވެފައިވާ ބޯޓެއްގެ ބައެއް ކަމަށެވެ. އެއީ ކަނޑު ފުރޭތައެއް ކަމަށާއި އޭގައި އެލިފައިވާ ވަރުގަދަ "ފަނިތަކަކީ" އޭގެ އިސްތަށި ކަމަށް ބުނެ، އެހެން މީހަކު މަޖަލަށް ޚިޔާލު ފާޅުކުރި އެވެ.
ޓައިމް ކެޕްސޫލެއް ކަމަށް އެއް ބަޔަކު ސިފަކުރި އިރު އެހެން މީހަކު ބުނީ އޮޔާ ދިޔަ ލަކުޑިގަނޑެއްގައި ރިނދަލި ފާޑުގެ އެއްޗެތި ހަރުލާފައި ހުރީ ކަމަށެވެ.
ނަމަވެސް ހަރުފައިގެ ހަންގަނޑެއް ގޮތަށް ބޭރު ފަށަލަ ފެންނަ މި އެތީގެ ހަގީގަތެއް ރަސްމީ ފަރާތްތަކުން އަދި ނުބުނެ އެވެ.