23 ޑިސެމްބަރ 2021 - 21:16
ވައިގެ މަގުން ރާއްޖެ އައި ޕާކިސްތާނު ތިން މީހެއްގެ ހަށިގަނޑުގެ އެކި ތަންތަނުގައި ފޮރުވައިގެން ގެނައި ދެ ކިލޯއަށްވުރެ ގިނަ މަސްތުވާތަކެއްޗާ ހަވާލުވި ދިވެއްސަކު ހައްޔަރުކޮށްފި އެވެ.
މަސްތުވާތަކެތި އެތެރެކޮށްފައިވަނީ ޕާކިސްތާނު ދެ ފިރިހެނެއްގެ ބޫޓު ތެރޭގައި ފޮރުވައިގެންނާއި މި މީހުންނާ އެކު އައި ޕާކިސްތާނު އަންހެނެއްގެ ޖަނގިޔާ ތެރޭގައި ފޮރުވައިގެންނެވެ.
މި ތިން މީހުންނަކީ ބުސްރާ އަނީސް، 51، މުހައްމަދު ޔަސީން، 49، އަދި މުނީރް އަޒީޒް، 41، އެވެ. މި ތިން މީހުންގެ އަތުން ފެނުނު މަސްތުވާތަކެތީގެ ބަރުދަނުގައި 2.485 ކިލޯގްރާމް ހުއްޓެވެ.
މި މީހުންގެ ތެރެއިން ބުސްރާގެ ޖަނގިޔާ ތެރެއިން 852 ގްރާމްގެ ހެރޮއިން ފެނިފައިވެ އެވެ. އަދި މުހައްމަދު ޔަސީންގެ ބޫޓު ތެރެއިން 738 ގްރާމް ހެރޮއިން އަދި މުނީރްގެ ބޫޓު ތެރެއިން 895 ގްރާމްގެ ހެރޮއިން، ފެނިފައިވެ އެވެ.
ރާއްޖެއަށް މަސްތުވާތަކެތި އެތެރެކުރަނިކޮށް މި ތިން މީހުން ފަޅާއެރުމުން އެ މީހުން ވަނީ މިއީ ދިވެއްސަކު ބުނެގެން ގެނައި އެއްޗެހި ކަމަށް ބުނެފަ އެވެ. އެހެންވެ މި ތަކެއްޗާ ހަވާލުވަނީ ކާކުތޯ ބެލުމަށް ފުލުހުން ކޮންޓްރޯލްޑް ޑެލިވަރީ އޮޕަރޭޝަނެއް ހިންގި އެވެ.
މި އޮޕަރޭޝަން ހިންގައި ހައްޔަރުކޮށްފައިވަނީ އުމުރުން 31 އަހަރުގެ ދިވެއްސެކެވެ. އެއީ އަބްދުﷲ އާމިރު، 31، އެވެ. އޭނާގެ އެޑްރެހަކީ ފުވައްމުލަކު ބީޗްވޭ އެވެ.
އަބްދުﷲ އާމިރު ވަނީ މަސްތުވާތަކެތި އޭނާއާ ހަވާލުކުރުމުން، ޕާކިސްތާނުން މަސްތުވާތަކެތި ގެނައި ތިން މީހުންގެ ތެރޭގައި ހިމެނޭ މުނީރުއަށް 3،000 ޑޮލަރު ވެސް ދީފަ އެވެ.
މަސްތުވާތަކެތި އެތެރެކުރި ތިން މީހުންނާއި އެ ތަކެއްޗާ ހަވާލުވި ދިވެހި މީހާ ވެސް މިއަދު ވަނީ ކްރިމިނަލް ކޯޓަށް ހާޒިރުކޮށް ތަހުގީގަށް ބަންދުގައި ބައިތިއްބަން، ބަންދަށް 15 ދުވަސް އިތުރުކޮށްފަ އެވެ. މި އެންމެންނަށް ވެސް ކުރަނީ ރާއްޖެއަށް މަސްތުވާތަކެތި އެތެރެކޮށް ޓްރެފިކްކުރުމުގެ ތުހުމަތެވެ.
ރާއްޖެ އެތެރެކުރަން އުޅެނިކޮށް އަތުލާ މަސްތުވާތަކެތީގެ އަދަދު މިހާރު ވަނީ ވަރަށް ބޮޑަށް އިތުރުވެފަ އެވެ. ވައިގެ މަގުން ރާއްޖެ އަންނަ މީހުންގެ އަތުން ފެންނަ ތަކެތީގެ އިތުރުން އެތައް ސަތޭކަ ކިލޯއަކުން ކަނޑުމަގުން ގެންނަ ގިނަ އަދަދެއްގެ މަސްތުވާތަކެތި ވެސް ވަނީ އަތުލައިގެންފަ އެވެ.