23 ޑިސެމްބަރ 2021 - 15:27
އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދި މޯލްޑިވްސް (ސީއޭ މޯލްޑިވްސް) ގައި ރަޖިސްޓްރީ ކުރި ޕަބްލިކް އިންޓްރެސްޓް އެންޓިޓީ އޮޑިޓަރުންނާ ސެޓްފިކެޓް ހަވާލުކުރުމުގެ ރަސްމިއްޔާތު މިއަދު ބާއްވައިފި އެވެ.
ސެޓްފިކެޓް ހަވާލުކުރި ޕަބްލިކް އިންޓްރެސްޓް އެންޓިޓީ އޮޑިޓަރުންނަކީ، ދާދި ފަހުން ސީއޭ މޯލްޑިވްސްގެ ފަރާތުން ނެރުނު ޕަބްލިކް އިންޓްރެސްޓް އެންޓިޓީ އޮޑިޓަރުން ރަޖިސްޓްރީ ވުމުގެ ގަވައިދުގެ ދަށުން ފުރަތަމަ ފަހަރަށް ލައިސަންސް ދޫކުރި މީހުންނެވެ.
ޕަބްލިކް އިންޓްރެސްޓް އެންޓިޓީސް ނުވަތަ ސަރުކާރުގެ ކުންފުނިތައް އޮޑިޓް ކުރުމުގެ ހުއްދަ އޮންނަނީ ތިން އޮޑިޓް ފާމަކަށެވެ. ރަޖިސްޓްރީކުރި މީހުންނާ އެކު ޖުމްލަ ހަތް އޮޑިޓް ފާމަކަށް ސެޓްފިކެޓް ލިބިފައިވެ އެވެ. މި ހަތް އޮޑިޓް ފާމްގެ ތެރޭގައި ލޯކަލް ދެ އޮޑިޓް ފާމާއި އިންޓަނޭޝަނަލް ފަސް އޮޑިޓް ފާމް ހިމެނެ އެވެ.
މި ލައިސަންސާ އެކު މި އޮޑިޓަރުންނާއި ފާމްތަކަށް މިއަހަރު ސަރުކާރުގެ މުއައްސަސާތަކާއި ކުންފުނިތަކުގެ މާލީ ބަޔާންތައް އޮޓިޓްކުރުމުގެ ހުއްދަ ލިބޭނެ އެވެ.
ސީއޭ މޯލްޑިވްސް ރައީސް، އޮޑިޓާ ޖެނެރަލް، ހުސައިން ނިޔާޒީ ވިދާޅުވީ، ޕައި އޮޑިޓާސްގެ ގޮތުގައި ރަޖިސްޓްރީކުރާ އޮޑިޓް ފާމްތައް، ރާއްޖޭގެ ގާނޫނުތަކާއި ގަވާއިދުތަކުގެ ތެރެއިން އޮޑިޓިންގެ ބައިނަލްއަގްވާމީ ހަމަތަކާއި އުސޫލްތައް ހިފަހައްޓަން ޖެހޭނެ ކަމަށެވެ.
މިލައިސަންސްގެ ސަބަބުން އޮޑިޓް ފާމްތަކުން ކުރާ އޮޑިޓްތަކުގެ ފެންވަރު ރަނގަޅު މިންގަނޑެއްގައި ހިފަހައްޓާނެކަމަށް ގަބޫލު ކުރާކަމަށް އޭނާ ވިދާޅުވި އެވެ.