22 ޑިސެމްބަރ 2021 - 08:37
ފައިސާގެ މައްސަލައެއްގައި ބިދޭސީންތަކެއް ބައިވެރިވެގެން އެހެން ބިދޭސީއަކަށް ހަމަލާދީ މަރާލަން އުޅުނު ކަމުގެ ތުހުމަތުވާ މީހަކު ބަންދުން ދޫކޮށްލާފައި ވަނިކޮށް އޭނާ އަލުން ބަންދުކުރަން ހައި ކޯޓުން އިއްޔެ އަމުރުކޮށްފި އެވެ.
މިދިޔަ މަހު އިންޑިއާގެ ދެ ބިދޭސީއަކު ހުޅުމާލެއިން ހައްޔަރުކުރީ އެ ދެ މީހުން ގުޅިގެން އިންޑިއާގެ އެހެން ބިދޭސީއަކަށް ހަމަލާދީ، އޭނާ މަރާލަން އުޅުމުގެ ތުހުމަތުގަ އެވެ. އަނިޔާލިބުނު ބިދޭސީ މީހާއަކީ ޓޫރިސްޓް ވިސާގައި ރާއްޖެ އައިސް ދިވެހިންތަކަކާ ގުޅިގެން ކުންފުންޏެއް ރަޖިސްޓްރީކޮށްފައިވާ މީހެކެވެ. އޭނާއަށް ހަމަލާދިނުމުގެ ތުހުމަތުވާ ދެ ބިދޭސީންނަކީ ވެސް ޓޫރިސްޓް ވިސާގައި ރާއްޖެ އައުމަށްފަހު އެ ކުންފުނީގެ މުވައްޒަފުންގެ ގޮތުގައި ރާއްޖޭގައި މަސައްކަތްކުރާ ބައެކެވެ.
އަނިޔާލިބުނު މީހާގެ ބަޔާންތަކުން އެނގޭ ގޮތުގައި ކުންފުނީގެ އޮފީހެއްގެ ގޮތުގައި ބޭނުން ކުރަމުން ދިޔައީ ވެސް އޭނާ އާއި މުވައްޒަފުން ދިރިއުޅެން ކުއްޔަށް ހިފާފައި ހުރި އެޕާޓްމެންޓެކެވެ. އޭނާ އާއި މުވައްޒަފުންނާ މައްސަލަ ޖެހުނީ އޭގެ ތެރެއިން ބައެއް މީހުންނަށް މުސާރަ ނުލިބުމުންނެވެ. އެންމެ ފުރަތަމަ އޭނާގެ ލޯމަތީގައި އެކަކު ޖެހި އެވެ. އަދި ޖެހިގެން އައި ދުވަހު އޭނާ އެޕާޓްމެންޓްގައި ބަންދުކޮށް، ގަދަކަމުން އޭނާ ލައްވައި އެ މީހުންގެ އެކައުންޓަށް ފައިސާ ޓްރާންސްފް ކުރުވި ކަމަށް އަނިޔާލިބުނު މީހާ ބުނެފައިވެ އެވެ.
އޭގެފަހުން އޭނާއަށް ގަދަކަމުން އެއްޗެއް ބޯންދިނުމުން އޭނާއަށް ނިދިފައި އޮއްވާ އެ މީހުން އައިސް އެރޭ ވަޅިން ހަމަލާދިން ކަމަށް އަނިޔާލިބުނު މީހާ ބުނެ އެވެ. އެޕާޓްމެންޓްގައި ހަމަނުޖެހުން ހިނގަން ފެށުމުން ފުލުހުން ވަގުތުން އެ ދެ މީހުން ހައްޔަރުކުރީ މީހަކު މަރާލަން އުޅުމުގެ ތުހުމަތުގަ އެވެ. އެ މީހުން ބަންދުގައި ބޭތިއްބުމަށްފަހު އޭގެ ތެރެއިން އެކަކު މިދިޔަ މަހުގެ ފަހުކޮޅު ދޫކޮށްލީ އިތުރަށް ބަންދުކުރަން ނުފެންނަ ކަމަށް ބުނެ އެވެ.
އެ މައްސަލަ ދައުލަތުން އިސްތިއުނާފް ކުރުމުން ހައި ކޯޓުން ކުރި ހުކުމުގައިވަނީ އެ މައްސަލާގައި ކަން ހިނގާފައިވާ ގޮތަށާއި އެ މީހުން ކަންކަން ކުރަމުންދާ ގޮތަށް ބަލާއިރު މުޖްތަމައުގެ ސަލާމަތަށް ބޮޑު ނުރައްކަލެއް އެބައޮތް ކަމަށެވެ. އެގޮތުން ގާނޫނުތަކާ ޚިލާފަށް ނިދާ އެނދު މަތީގައި އޮފީސް ހަދައިގެން ފަސޭހައިން ވިޔަފާރި ކުރުމުގެ އިތުރުން އެކަމަށްޓަކައި ރާއްޖެއަށް މީހުން އެތެރެކޮށް އަދި ބޮޑެތި ޖަރީމާތައް ހިންގަމުންދާ ކަމަށާއި އެއީ ދައުލަތެއްގެ ގޮތުން ބަލައިގަނެވޭނެ ކަމެއް ނޫން ކަމަށް ހުކުމުގައިވެ އެވެ.
"ފެންނަނީ ދިވެހިރާއްޖޭގެ ޤާނޫނުތަކާ ޚިލާފަށް ބޭރުގެ ކުންފުންޏަކުން އިންވެސްޓް ކުރުމުގެ ނަމުގައި ނިދާ އެނދުމަތީގައި އޮފީސް ހަދައިގެން ފަސޭހަކަމާ އެކު ދިވެހިރާއްޖޭގެ ވިޔަފާރިކުރާ ތަނެވެ. އެކަމަށްޓަކައި ޤާނޫނާ ޚިލާފަށް މީހުން އެތެރެކޮށްފައިވާ މަންޒަރެވެ. ވިޔަފާރީގެ ނަމުގައި ބިދޭސީން ރާއްޖެ އެތެރެކޮށް، މުވައްޒަފުންގެ ގޮތުގައި ޝާމިލްކޮށް، ހިތަށް އެރިގޮތަކަށް އުޅެމުންދިޔަ ތަނެވެ. ދައުލަތެއްގެ ގޮތުން މިއީ ބަލައިގަނެވޭ އަދި ކަންވެގެންވާނެ ގޮތެއް ނޫނެވެ." ހުކުމުގައިވެ އެވެ.
ހުކުމުގައިވަނީ ތުހުމަތު ކުރެވުނު ދެ ބިދޭސީންނަކީ ޓޫރިސްޓް ވިސާގައި ރާއްޖެ އައި ބަޔަކަށް ވާތީ އެ މީހުން ރާއްޖޭގައި ވަޒީފާ އަދާކުރަމުން ދިޔައީ ގަވާއިދާ ޚިލާފަށް ކަމަށެވެ. އެހެންވީއިރު، އޭގެ ތެރެއިން އެކަކު ދޫކޮށްލަން ކޯޓަކުން އެންގުމަކީ ގަވާއިދާ ޚިލާފަށް އުޅުމަށް އިތުރަށް ދެވޭ ހުއްދައެއް ކަމަށާއި އެކަމަކު ގާނޫނީ ގޮތުން އެއީ ކުރެވޭނެ ކަމެއް ނޫން ކަމަށް އެ ހުކުމުގައިވެ އެވެ. އަދި އެ މީހާގެ މައްޗަށް ތުހުމަތު ކުރެވޭ މިންވަރުގެ ހެކި ހުރުމުން އޭނާ ހުންނަން ޖެހޭނީ ބަންދުގައި ކަމަށް އެ ހުކުމުގައިވެ އެވެ.
މީގެ އިތުރުން އަނިޔާ ލިބުނު ބިދޭސީ މީހާ ވެސް ގާނޫނާ ޚިލާފް ކަންތައްތަކެއް ހިންގާފައިވާ ކަމަށް ތުހުމަތު ކުރެވޭއިރު ވާއިރު، ފުލުހުންގެ އޭނާގެ މައްޗަށް އެއްވެސް ތުހުމަތެއް ކޮށްފައި ނެތުމުން ސުވާލު އުފެދޭ ކަމަށް އެ ހުކުމުގައިވެ އެވެ. އޭނާ މިހާރު ރާއްޖެއިން ބޭރަށް ގޮސްފައިވާ ކަމަށް ވެސް ހުކުމުގައިވެ އެވެ.
އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވަނީ ތުހުމަތުވާ ބިދޭސީ މީހާ ދޫކޮޮށްލަން ހުޅުމާލޭ ކޯޓުން ނެރުނު އަމުރު ބާތިލް ކުރުމާ އެކު އޭނާ 15 ދުވަހަށް ބަންދުކުރަން އަންގާ ކަމަށެވެ.
ހައި ކޯޓުން އެ މައްސަލަ ބެއްލެވީ ފަނޑިޔާރު މުހައްމަދު ނިޔާޒާއި ފަނޑިޔާރު ފާތިމަތު ފަރުހީޒާގެ އިތުރުން ފަނޑިޔާރު މުހައްމަދު ފައިސަލެވެ. އެ ބެންޗުގެ ރިޔާސަތު ބެލެހެއްޓެވީ ފަނޑިޔާރު ނިޔާޒެވެ.