21 ޑިސެމްބަރ 2021 - 13:35
މިއަހަރުގެ މިހާތަނަށް އެއް ދުވަހެއްގައި އެންމެ ގިނަ ކައިވެނި ކުރާ ތާރީހަކަށް މިއަދު ވެއްޖެ އެވެ.
އާންމުކޮށް ރީތި ތާރީހުތަކަށް ބަލައި ގިނަ ބަޔަކު ކައިވެނީގެ ދުވަސް ކަނޑައަޅާއިރު މިއަދުގެ ތާރީހު، 21/12/2021 އަކީ މިއަހަރު މިގޮތަށް އައި އެންމެ ރީތި އެއް ތާރީހެވެ. މިއަދު ފެމެލީ ކޯޓުން އެކަނިވެސް 57 ކައިވެންޏެއް ކޮށްދޭން ނިންމާފައިވާއިރު މީގެ ތެރެއިން 28 ކައިވެނިކުރާނީ ކޯޓުގަ އެވެ. ބާކީ 29 ކައިވެންޏަކީ ކޯޓުން ބޭރުގައި ކުރަން ހަމަޖެހިފައިވާ ކައިވެނިތަކެވެ.
މި ރީތި ތާރީހުގައި ރާއްޖޭގެ އެކި ހިސާބުތަކުގައި ވެސް ގިނަ ކައިވެނިތަކެއް އޮންނާނެ ކަމަށް ބެލެވެ އެވެ.
އެކަމަކު މުޅި ރާއްޖޭގައި މިއަދު ކުރާ ކައިވެނީގެ އަދަދު އެނގޭ ގޮތެއް ނުވި އެވެ.
މިއަހަރު ދެވަނައަށް އެންމެ ގިނަ ބަޔަކު ކައިވެނިކުރީ 21/01/21 ގަ އެވެ. އެ ދުވަހު 50 ކައިވެންޏެއް ކޮށްފައިވެ އެވެ. އޭގެ ފަހުން ދެން އެންމެ ގިނަ ބަޔަކު ކައިވެނިކުރި ތާރީހުތަކަކީ 21/02/2021 އާއި 21/10/2021 އަދި 21/06/2021 އެވެ.
ފެމެލީ ކޯޓުން މިއަހަރުގެ މިހާތަނަށް ކުރި ކައިވެނިތަކުގެ އަދަދަކީ 2،308 އެވެ.
މިދިޔަ އަހަރު އެންމެ ގިނަ ބަޔަކު ކައިވެނިކުރީ 20/02/2020 ގަ އެވެ. އެ ދުވަހު 66 ކައިވެންޏެއް ކޮށްފައިވާއިރު މިއީ މިހާތަނަށް އައި ތާރީހުތަކުގެ ތެރެއިން އެއް ދުވަހެއްގައި އެންމެ ގިނަ ބަޔަކު ކައިވެނި ކުރި ދުވަހެވެ.
އެވްރެޖް ގޮތެއްގައި މާލޭގައި އާންމުކޮށް ކުރަނީ ދިހަ ވަރަކަށް ކައިވެންޏެވެ.