20 ޑިސެމްބަރ 2021 - 09:34
އެމްޓީސީސީއޭ ބުނުމުން މިހާރު އޮތް ޔަގީން ކަމަކީ، ހަވާލުކުރާ ކޮންމެ މަޝްރޫއެއް އޭގެ އެންމެ ރަނގަޅު ފެންވަރުގައި ވަގުތަށް ނިންމައިދޭނެ ކަމުގެ ޔަގީން ކަން ކަމަށް ވިދާޅުވެ، އެ ކުންފުންޏަށް ރައީސް އިބްރާހިމް މުހަންމަދު ސޯލިހު ރޭ ތައުރީފު ކުރައްވައިފި އެވެ.
"ރައްޔިތުންގެ ހިތްތަކުން އެމްޓީސީސީ ވަނީ އިތުބާރާ އެކު ޖާގަ ހޯދައިފައި،" އެމްޓީސީސީގެ 41 ވަނަ އަހަރީ ޖަލްސާގައި ރައީސް، ރޭ ހެންވޭރު ދަނޑުގައި ވިދާޅުވި އެވެ.
"މިރޭ މި ފާހަގަ ކުރެވެނީ މި ވޭތުވެދިޔަ ދެ އަހަރުގެ ތެރޭގައި މި ކުންފުނި ހޯދާފައިވާ ކާމިޔާބީ ކަމާމެދަކު އަޅުގަނޑުގެ ޝައްކެއްނެތް. އެމްޓީސީސީގެ ހަޔާތުގައި ވެސް އައި އެންމެ ހަރަކާތްތެރި އަދި އެންމެ ކާމިޔާބު ދުވަސްތަކަކީ މިދިޔަ ދެ އަހަރު."
ރައީސް ވިދާޅުވީ އެ ކުންފުނި، މިހާރުގެ ސީއީއޯ އާދަމް އާޒިމާ ހަވާލު ކުރެއްވި އިރު ދެއްކެވި ވާހަކަފުޅާ އެއްގޮތަށް އޭނާ އަމަލީ ގޮތުން ވެސް އެކަން ދައްކަވާ ކަމަށެވެ.
"އަޅުގަނޑު އާދަމްއާ ކުންފުނި ހިންގުމާ ހަވާލުކުރީ ޔަގީންކަމާއި އިތުބާރާއެކު. އެބޭފުޅާ އެ ގެންދަވަނީ އެ ކަންތައްތައް އަމަލީ ގޮތުން ދައްކަވަމުން،" ރައީސް ވިދާޅުވި އެވެ.
އެމްޓީސީސީއަކީ ރާއްޖޭގެ އުމްރާނީ ތަރައްގީގެ އެންމެ މުހިންމު ބައިވެރިޔާ ކަމަށް ރައީސް ވިދާޅުވި އެވެ. އެމަނިކުފާނު ވިދާޅުވީ އެމްޓީސީސީއޭ ބުނުމުން، އެއީ ހަމައެކަނި އިމާރާތްކޮށް، ދަތުރުފަތުރާއި، ކަނޑު އުޅަނދުފަހަރުގެ އިންޖީނު ވިއްކާ ކުންފުންޏެއް ކަމަށް ހީވެފައި އޮތް އޮތުން މިހާރު ބަދަލުވެފައިވާ ކަމަށެވެ.
"ނަމަވެސް ހަގީގަތުގައި މި ކުންފުންޏަކީ، ރާއްޖޭގެ އުމްރާނީ ތަރައްގީގެ ވަރަށް މުހިންމު ބައިވެރިއެއް. ހާއްސަކޮށް ރަށްރަށުގެ އުމްރާނީ ތަރައްގީގެ އެންމެ މުހިންމު ބައިވެރިޔާއޭ ދެންނެވިދާނެ،" ރައީސް ވިދާޅުވި އެވެ.
"ބަނދަރު ހެދުން، ބިން ހިއްކުން، ގޮނޑުދޮށް ހިމާޔަތްކުރުން، ޝީޓް ޕައިލްކުރުން، މިއީ މި ކުންފުނީގެ އެންމެ ޒަމާންވީ މަސައްކަތްތައް. މިއީ ރަށްރަށުގެ ރައްޔިތުން އެންމެ ބޭނުންވާ ލަފާފުރުމުގެ ހިދުމަތާ ގުޅިފައި ހުރި މަޝްރޫއުތައް. އެއާޕޯޓް ހެދުމާއި، މަގު ހެދުމާއި، ފެނާއި ނަރުދަމާ ނިޒާމު ގާއިމުކުރުމަކީ ވެސް، ރަށްރަށާއި މާލެއާ ދެމެދު ހުރި އަސާސީ ހިދުމަތުގެ ތަރައްގީގެ ފަރަގު ނައްތައިލުމަށްޓަކައި ހިންގާ ވަރަށް މުހިންމު މަޝްރޫއުތަކެއް."
ރައީސް ވިދާޅުވީ ކޮވިޑާ ގުޅިގެން ތަރައްގީގެ ބައެއް ސިޔާސަތުތަކަށް ބަދަލުތަކެއް ގެންނަން ޖެހުނު ކަމަށެވެ. އެކަމަކު އަސާސީ ހިދުމަތްތަކާ ގުޅިފައިވާ ތަރައްގީގެ މަޝްރޫއުތައް މެދުކަނޑާނުލައި ކުރިއަށް ގެންދިއުމަށް ވަރަށް ބޮޑު ސަމާލުކަމެއް ސަރުކާރުން ދިން ކަމަށް އެމަނިކުފާނު ވިދާޅުވި އެވެ. އަދި އެކަމުގައި އެމްޓީސީސީގެ ދައުރު އެމަނިކުފާނު ފާހަގަކުރެއްވި އެވެ.
ރައީސް ވިދާޅުވީ އެމްޓީސީސީ އަކީ ވަޒީފާ ދިނުމުގައި ވެސް ވަރަށް ބޮޑު ކުރިއެރުމެއް ހޯދައިފައިވާ ކުންފުންޏެއް ކަމަށެވެ.
"އެފަދަ އެއް ކަމަކީ ނުކުޅެދުންތެރިކަން ހުންނަ މީހުންނަށް ވަޒީފާ ދިނުމުގައި މި ކުންފުނިން ހޯދާފައިވާ ކުރިއެރުން. އެފަދަ 31 މީހަކު މިހާރު ވެސް އެމްޓީސީސީގެ ވަޒީފާތަކުގައި އެބަ ތިއްބެވި. މިއީ އަޅުގަނޑު ދަންނަވާނީ، ހަގީގަތުގައި ވެސް މުޖުތަމައު ވަރަށް ބޮޑަށް ބޭނުންވާ ކަމެކޭ،" ރައީސް ވިދާޅުވި އެވެ.