16 ޑިސެމްބަރ 2021 - 08:21
ސެލެބްރަލް ޕަލްސީގެ ސަބަބުން ނުހިނގެ އެވެ. ވާހަކައެއް ނުދެއްކެ އެވެ. ފިޓް ޖެހެ އެވެ. އެކަންކަމަށް އަނާލް އަބްދުﷲ ޝިޔާމް އެތައް ފަހަރަކު ރާއްޖެއިން ބޭރުން ފަރުވާ ހޯދައިފި އެވެ. އިތުރު ކުރިއެރުމެއް ނުލިބި ހުއްޓާ، ތ. ހިރިލަންދު އަށް އުފަން، ނުވަ އަހަރުގެ އެ ކުއްޖާގެ ހާލަތު ގޯސްވި ގޮހޮރުގައި ފާރު ހެދި، ނުކެވެން ފެށި އެވެ.
އަނާލްގެ މަންމަ، މަރިޔަމް ނިޝާމާ ބުނީ އޭނާގެ ހަގު ދަރިފުޅު ރޯގާ ޖެހި ހޮޑުލާތީ މިދިޔަ މަހު އެންމެ ފުރަތަމަ ދެއްކީ ވޭމަންޑުގައި ހުންނަ އަތޮޅު ހޮސްޕިޓަލަށް ކަމަށެވެ. އެ ތަނުން ވެސް ދެވޭނެ އިތުރު ފަރުވާއެއް ނެތުމުން މިދިޔަ މަހުގެ 14 ގައި މާލެ އައިސް، އައިޖީއެމްއެޗްގެ އިމަޖެންސީ ރޫމުގައި ހަތް ދުވަހު އަދި ވޯޑުގައި 12 ދުވަހު ބާއްވައިގެން ފަރުވާ ދިނެވެ.
ތަދުވާ ވާހަކަ އަމިއްލަ އަނގައިން ނުބުންޏަސް، ކުއްޖާ ރޯ ކޮންމެ ފަހަރަކު ނިޝާމާގެ ހިތަށް ތަދުވެ އެވެ. ކުއްޖާގެ ވޭނަށް ލުއެއް ނުލިބޭކަން ޔަގީންވެ އެވެ.
"އެކި ކަހަލަ ފަރުވާ ދެމުން ދަނިކޮށް އެތެރެހަށީގެ ކަމެއް ކަމަށް ބަލައި ޓެސްޓުކޮށްދިނުމަށް އެދުނީ ކޮފީ ގްރައުންޑު ކުލައިގެ ހޮޑުލާތީ. އިންފެކްޝަނެއް ކަމަށް ބުނަނީ. އެންޑޮސްކޮޕީ ހަދައިދޭކަށް ނޫޅޭ. ދަރިފުޅު އާދަޔާ ހިލާފަށް ގިނައިން ރޮނީ،" 12 އަހަރުގެ އަންހެން ދަރިޔަކު ވެސް ހުންނަ ނިޝާމާ ބުންޏެވެ.
ހޮސްޕިޓަލުން ދޫކޮށްލިތާ ޖެހިގެން އައި ދުވަހު އަނާލް ގަދައަށް ހޮޑުލައި، ރޯތީ ދެއްކީ އޭޑީކޭ ހޮސްޕިޓަލަށެވެ. އޭރު ކުއްޖާގެ ވިންދާއި އޮކްސިޖަން ލެވެލް ވަރަށް ދަށްކަމަށް އެ ހޮސްޕިޓަލާ ހަވާލާދީ އާއިލާއިން ބުންޏެވެ. އެޑްމިޓުކޮށްގެން ފަރުވާ ހޯދަން ބުނި ނަމަވެސް އާއިލާއިން އެދިގެން އަނެއްކާ ވެސް އައިޖީއެމްއެޗަށް ބަދަލުކުރީ އެވެ.
އެ ފަހަރު ގޮހޮރުގެ ޓެސްޓެއް ހަދައިދިނުމަށް އެދުމުން އެ ޓެސްޓު ހެދިއިރު ގޮހޮރުގައި ފާރު ހުރިކަން އެނގުނެވެ.
"ދެ ވަނަ ފަހަރަށް އެޑްމިޓުކޮށްގެން ޓެސްޓު ހެެދިއިރު މި އެނގުނީ ދަރިފުޅަށް ވާ އުނދަގޫ،" ނިޝާމާ ބުންޏެވެ.
އޭނާ ބުނީ އެޑްމިޓުކޮށްގެން ފަރުވާ ދިން ނަމަވެސް ހާލަތަކަށް ބަދަލެއް ނާންނަ ކަމަށެވެ.
"ކުރިއަށްވުރެ ގޯސްހެން ހީވަނީ. ވޭން އަޅާފައި އަނާލް އޮންނަނީ އަބަދު ރޯލަރޯލަ."
ހަރު އެއްޗެހި ނުކެވޭތީ އަނާލަށް ކާންދިނުމަށް ނޭފަތަށް ހުރީ ހޮޅި ގުޅައިފަ އެވެ.
"ވަރަށް ހިތަށް ތަދުވޭ ދަރިފުޅު އެ ހާލަތުގައި އޮންނަތަން ދެކެން. އެކަމަކު ކެތްތެރިކަން ދެއްވުމަށް މި ދުއާކުރަނީ،" އޭނާ ބުންޏެވެ.
އަނާލް ބަލިވީ، ފިރިމީހާ، އަބްދުﷲ ޝިޔާމްގެ މައިބަދައިގެ ޑިސްކުގެ މައްސަލައެއް ޖެހި އާމްދަނީ ހޯދަން މަސައްކަތެއް ނުކުރެވި ތިން މަސް ދުވަހު ގޭގައި ހުއްޓަ އެވެ. މަހަށް ގޮސްގެން ލިބޭ އެއްޗަކުން މީގެ ކުރިން ދިރިއުޅެމުން ދިޔަ ނަމަވެސް އަނާލް ބަލިވުމުން އާއިލާގެ އެންމެންގެ އެހީތެރިކަން ލިބުނެވެ. ފުރަތަމަ މާލެ އައިސް އުޅެނީ ވެސް ދުވަހު ކުއްޔަށް ދޭ ކޮޓަރިއެއްގަ އެވެ. އެކަމަކު، ހަރަދުބޮޑުވެ އަދި މާލޭގައި ހޭދަވާނެ ދުވަހެއް ނޭނގޭތީ މާލޭގައި އުޅޭ ފިރިމީހާގެ އާއިލާ ބައެއް ކައިރިއަށް ބަދަލުވި އެވެ.
އެ އާއިލާއިން މިހާރު މަސައްކަތް ކުރަނީ އަނާލަށް ފަރުވާ ދިނުމަށް ބޭރަށް ދިއުމުގެ މަސައްކަތް ކުރަމުންނެވެ. އެކަމަކު ރާއްޖެއިން ލިބޭ ފަރުވާއަކަށް ވާތީ އާސަންދައިގެ އެހީއެއް ނުލިބުނެވެ. އެހެންވެ އާއްމުންގެ އެހީއާއެކު އެ އާއިލާއިން އަންނަނީ ދަރިފުޅަށް ލުއެއް ލިބޭތޯ ވީހާ ވެސް އަވަހަކަށް ބޭރަށް ދާން ނިންމައިގެންނެވެ.
އެއާއެކު، ނިޝާމާގެ ޝަކުވާއެއް އެބައޮތެވެ.
"ހާއްސަ އެހީއަށް ބޭނުންވާ ކުދިންނަށް ދޭ 2،000ރ. ގެ އެލަވަންސް އިން ދެކޮޅެއް ނުޖެހޭ. ކާންދޭ އެއްޗިއްސާއި ނެޕީ މިއީ އަބަދު ވެސް މި ކަހަލަ ކުދިންނަށް ބޭނުންވާ އެއްޗެހި. އެ އެލެވަންސް ބޮޑުކުރުން އެއީ ވަރަށް ބޭނުންކަމެއް."
އަނާލަށް އެހީ ދިނުމަށް: މަންމަ މަރިޔަމް ނިޝާމާ (9640466)