12 ޑިސެމްބަރ 2021 - 09:52
މިއުނިކް (ޑިސެމްބަރު 12) - ޖަރުމަން ބުންޑެސްލިގާގައި އެއްވަނައިގައި އޮތް ބެޔާން މިއުނިކުން ފަހަތުން އަރައި މެއިންޒް ބަލިކުރިއިރު، މި ސީޒަނުގައި އަލަށް ޕްރޮމޯޓްވި ވީއެފްއެލް ބޯކަމް އަތުން ފަހު ވަގުތު ޑޯޓްމަންޓް ސަލާމަތް ވެއްޖެ އެވެ.
މި ނަތީޖާތަކާ އެކު ބެޔާނަށް ވަނީ ލީގުގެ އެއްވަނައިގައި ހަ ޕޮއިންޓުގެ ލީޑެއް ލިބިފަ އެވެ. މިހާތަނަށް ކުޅުނު 15 މެޗުން ބެޔާން މިއުނިކުން 37 ޕޮއިންޓް ހޯދާފައިވާއިރު، ޑޯޓްމަންޑަށް ވަނީ 31 ޕޮއިންޓް ލިބިފަ އެވެ.
ބެޔާންގެ ދަނޑުގައި ކުޅުނު މެޗު އެ ޓީމުން ކާމިޔާބުކުރީ ފަހަތުން އަރައި 2-1 އިންނެވެ. މެޗުގައި މެއިންޒް އިން ލީޑް ނެގީ، 22 ވަނަ މިނިޓުގައި ކަރީމް އޮނިސީވޯ ޖެހި ލަނޑުންނެވެ. ބެޔާނުން އެއްވަރުކުރީ 53 ވަނަ މިނިޓުގައި ކިންގްސްލީ ކޯމަން ޖެހި ލަނޑުންނެވެ. އަދި އެ ޓީމު މޮޅުވި ލަނޑު 74 ވަނަ މިނިޓުގައި ޖެހީ، 18 އަހަރުގެ ޖަމާލް މުސިއާލާ އެވެ.
ބެޔާންގެ މޮޅަކީ، މީގެ ކުރިން ހޮފެއިންހެމް އާއި އާރުބީ ލައިޕްޒިގަށް ވެސް ކޯޗު ކޮށްދިން ހޫލިއަން ނާގެލްސްމަން، 34، ޖަރުުމަނު ފުރަތަމަ ޑިވިޝަނުގައި ހޯދި 100 ވަނަ މޮޅެވެ.
ބެޔާންގެ ދަނޑުގައި ރޭ ކުޅުނު މެޗުގައި ވެސް ރޮބާޓް ލެވަންޑީށްކީ ގޯލެއް ޖަހާފައި ނުވާއިރު، ވޭތުވެދިޔަ ތިން އަހަރު ތެރޭ މިއީ އޭނާ އަމިއްލަ ދަނޑުގައި ޖެހިޖެހިގެން ކުޅުނު ތިން މެޗެއްގައި ގޯލެއް ނުޖެހުނު ފުރަތަމަ ފަހަރެވެ.
ލީގުގެ ދެވަނައިގައި އޮތް ޑޯޓްމަންޑް ރަށުން ބޭރުގައި ބޯކަމްއާ ދެކޮޅަށް ކުޅުނު މެޗުން ބަލި ނުވެ ސަލާމަތްވީ 85 ވަނަ މިނިޓުގައި އާލިން ބަރައުޓް ހާލަންޑް ނަގައިދިން ހުރަހަކުން ހޫލިއަން ބްރަންޓް ޖަހައިދިން ލަނޑުންނެވެ. ބްރަންޓުގެ ލަނޑާ އެކު 1-1 އިން އެއްވަރުވި މި މެޗުގައި ބޯކަމް ލީޑު ނެގީ، ފުރަތަމަ ހާފު ނިމެން ފަސް މިނިޓަށްވެފައި ވަނިކޮށް ލިބުނު ޕެނަލްޓީއަކުން ސަބަސްޓިއެން ޕޯލްޓާ އެވެ.
ބޯކަމް އިން ލީޑު ނެގުމުގެ ކުރިން ޑޯޓްމަންޑުގެ ޖޫޑް ބެލިންހަމް އަށް ވަނީ މެޗުގައި ފުރަތަމަ ލީޑު ނަގަން ހުސް ފުރުސަތެއް ލިބި ބޭކާރުވެފަ އެވެ. ކެޕްޓަން މާކޯ ރޮއިސް ހުސް ކޮށްލާފައި ބެލިންހަމަށް ޖައްސާލުމުން އޭނާ ބޯޅަ ފޮނުވާލީ ސީދާ މެއިންޒްގެ ކީޕަރު މެނުއަލް ރީމަންއާ ދިމާލަށެވެ.