10 ޑިސެމްބަރ 2021 - 10:23
ސޯފިއާ، ބަލްގޭރިއާ (ޑިސެމްބަރު 10) - އިޓަލީގެ އޭއެސް ރޯމާއަށް ކުޅޭ އިނގިރޭސި ވިލާތުގެ ޒުވާން ފޯވަޑް ޓެމީ އަބްރަހަމްގެ ކުލަބު ކެރިއަރުގައި ޖެހި 100 ވަނަ ލަނޑާ އެކު، ޔޫއެފާ ޔޫރޮޕާ ކޮންފަރެންސް ލީގު ގުރޫޕުގެ އެއްވަނަ ރޯމާ ހޯދައިފި އެވެ.
ޕޯޗުގަލްގެ ހޯސޭ މޮރީނިއޯގެ އިރުޝާދުގެ ދަށުން ކުޅުނު ރޯމާ، ރޭ ސީއެސްކޭއޭ ސޯފިއާއާ ވާދަކޮށް މެޗު ކާމިޔާބުކުރީ 3-2 އިންނެވެ. މި ނަތީޖާއާ އެކު ރޯމާ އަށް ގުރޫޕުގެ އެއްވަނަ ލިބުނީ، މި ގުރޫޕުގެ އަނެއް މެޗުގައި، ބޯޑޯ/ގިލްމްޓް އަށް ޔޫކްރޭންގެ ޒޯރްޔާ ލުހަންސްކާ ބަލި ނުކުރެވުމުންނެވެ. ބޯޑޯ/ގްލިމްޓް އާއި ޒޯރްޔާ ބައްދަލުކުރި މެޗް ނިމުނީ 1-1 އިންނެވެ.
މި ނަތީޖާއާ އެކު ރޯމާއަށް އެއްވަނަ ލިބުނީ 13 ޕޮއިންޓް ހަމަ ކޮށްގެންނެވެ. ދެވަނައަށް ދިޔަ ބޯޑޯ/ގްލިމްޓް އަށް ލިބުނީ 12 ޕޮއިންޓެވެ.
ރޭގެ މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ރޯމާއިންނެވެ. މެޗުގެ 15 ވަނަ މިނިޓުގައި ލީޑު ނަގައިދިން ލަނޑު ޖެހީ ޓެމީ އަބްރަހަމް އެވެ. އެއަށް ފަހު ފުރަތަމަ ހާފު ނިންމާލީ، ބޯޖާ މަޔޮރާލް ޖެހި ލަނޑާ އެކު ދެ ގޯލުގެ ލީޑަކާ އެކުއެވެ. ދެވަނަ ހާފު ފެށިގެން އަށް ވަނަ މިނިޓުގައި އަބްރަހަމް ވަނީ އޭނާގެ ސީނިއާ ކްލަބް ފުޓުބޯޅަ ކެރިއަރުގައި ޖެހި 100 ވަނަ ލަނޑާ އެކު ރޯމާއިން މެޗުގައި ޖެހި ތިންވަނަ ލަނޑު ކާމިޔާބު ކޮށްފަ އެވެ. ސީއެސްކޭއޭ ސޯފިއާ އިން ޖެހި ދެ ލަނޑު ޖެހީ ރޯމާއިން ތިން ލަނޑު ޖަހާފައި ވަނިކޮށެވެ.
އިނގިރޭސި ކްލަބް ޗެލްސީން މި ސީޒަނުގައި އިޓަލީއަށް ބަދަލުވި އަބްރަހަމް، 24، ވަނީ ރޯމާއަށް މި ސީޒަނުގައި 10 ލަނޑު ޖަހައިދީފަ އެވެ. ރޯމާއަށް ބަދަލުވުމުގެ ކުރިން އޭނާ ވަނީ ޗެލްސީ އަށް ދެ ސީޒަނުން 30 ލަނޑު ޖަހައިދީފަ އެވެ. އޭގެ ކުރިން އޭނާ ވަނީ ލޯނު އުސޫލުން އިނގިރޭސި ޓީމް ބްރިސްޓަލް ސިޓީއާއި ސްވަންސީ ސިޓީ އަދި އެސްޓަން ވިލާ އަށް ވެސް ކުޅެފަ އެވެ. ބްރިސްޓަލް ސިޓީއަށް 26 ލަނޑު ޖެހިއިރު، ސްވަންސީ އަށް ވަނީ އަށް ލަނޑު ޖަހައިދީފަ އެވެ. އަދި އަބްރަހަމް ވަނީ އެސްޓަން ވިލާ އަށް ވެސް 26 ލަނޑު ޖަހައިދީފަ އެވެ.
މި ނަތީޖާއާ އެކު ރޯމާ ވަނީ މި ސީޒަނުގައި ޔޫއެފާއިން އަލަށް ފެށި، ޔޫރޮޕާ ކޮންފަރެންސް ލީގުގެ ގަދަ 16 އިން ޖާގަ ހޯދައިފަ އެވެ. ދެވަނައަށް ދިޔަ ބޯޑޯ/ގްލިމްޓް ވާދަކުރާނީ، ޔޫރޮޕާ ލީގު ގުރޫޕް ސްޓޭޖުގެ ތިންވަނައަށް ދިޔަ ޓީމުތަކާ އެކު، ޕްލޭއޮފުގަ އެވެ.
ޔޫރޮޕާ ލީގު ގުރޫޕް ސްޓޭޖުގެ މެޗްތަކުގެ ތެރެއިން މިހާތަނަށް ނުކުޅެނީ އެންމެ މެޗެކެވެ. އެއީ، ފްރާންސްގެ ރެނެސްއާ ދެކޮޅަށް އިނގިރޭސި ކްލަބް ޓޮޓެންހަމް ހޮޓްސްޕާ ރޭ ކުޅެން އޮތް ގުރޫޕް ޖީގެ ފަހު މެޗެވެ. މި މެޗް ފަސްކުރީ، ޓޮޓެންހަމްގެ ގިނަ ކުޅުންތެރިންތަކަކާއި ޓީމުގެ ސްޓާފުންނަށް ކޮވިޑު ޖެހިގެން މެޗު ފަސްކުރަން އެ ކުލަބުން ޔޫއެފާގައި އެދުމުންނެވެ.
ޓޮޓެންހަމް ހިމެނޭ ގުރޫޕުގައި ނެދަލެންޑްސްގެ ވިޓޭސޭ އިން ވަނީ ސްލޮވީނިއާގެ އެންއެސް މޫރާ 3-1 އިން ބަލިކޮށް، ގުރޫޕުގެ ދެވަނައަށް ޖެހިލައިފަ އެވެ. އަދި ޓޮޓެންހަމް މުބާރާތުގައި ކުރިޔަށް ދާން މި މެޗް ކާމިޔާބުކުރަން ވަނީ މަޖުބޫރުވެފަ އެވެ.
ޓޮޓެންހަމުން، ގުރޫޕުގެ އެއްވަނައިގައި އޮތް ރެނެސްއާ ދެކޮޅަށް ކުޅޭ މެޗު ދެން ބާއްވާނެ ތާރީހެއް ޔޫއެފާއިން އަދި ހާމަކޮށްފައެއް ނުވެއެވެ. މި މަސް ނިމުމުގެ ކުރިން މުބާރާތުގެ ގުރޫޕް ސްޓޭޖުގެ މެޗްތައް އެއްކޮށް ނިންމަން ޔޫއެފާއިން ވަނީ ނިންމައިފަ އެވެ.