10 ޑިސެމްބަރ 2021 - 14:02
ސަރުކާރު ބަދަލުވެ، މިފްކޯ އާ މިހާރުގެ މެނޭޖްމަންޓުން ހަވާލުވި އިރު ވަރަށް ބޮޑެތި ގޮންޖެހުންތައް އޮތީ ކުރިމަތިވެފަ އެވެ. އެއް ކަމަކީ، މަސްވެރިންނަށް ދޭން ޖެހިފައިވާ ފައިސާގެ އަދަދު ގިނަ ކަމެވެ. އަނެއް ކަމަކީ، މިފްކޯ އިން ބުނާ ގޮތުން، ހިދުމަތް ދޭން ހުރި އުޅަނދުފަހަރާއި ސާމާނު ޒަމާނަށް ނުފެތުމެވެ. އެކަމަކު ވެސް އެ ގޮންޖެހުންތަކާ އެކު މިފްކޯ އަންނަނީ ހިންދެމިލަމުންނެވެ. އެ ކުންފުނިން ބުނާ ގޮތުން، ވޭތުވެދިޔަ ތިން އަހަރުގެ ތެރޭގައި ހިތްހަމަޖެހޭ ވަރު ވެއްޖެ އެވެ.
މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ "މިހާރު" އަށް ވިދާޅުވީ ފާއިތުވި ތިން އަހަރަކީ ކާމިޔާބު ތިން އަހަރު ކަމަށް ގަބޫލު ކުރައްވާ ކަމަށެވެ. އެގޮތުން، ކުންފުނީގެ ހިދުމަތްތައް ފުޅާ ކުރުމަށް ތަފާތު މަސައްކަތްތައް ކޮށްފައިވާއިރު ހިދުމަތް ދިނުމުގައި ވެސް ބޮޑެތި ކުރިއެރުންތަކެއް ހޯދާފައިވާ ކަމަށް އޭނާ ވިދާޅުވި އެވެ.
ފައުޒީ ވިދާޅުވި ގޮތުގައި އޭނާ ކުންފުންޏާ ހަވާލުވެވަޑައިގެންނެވި އިރު މަސްވެރިންނަށް ދޭން ޖެހޭ 39 މިލިއަން ރުފިޔާ ނުދީ އޮތް ނަމަވެސް ކުޑަ ދުވަސްކޮޅެއްގެ ތެރޭގައި އެކަން ހައްލު ކުރެއްވި އެވެ. އަދި މަރާމާތު ކުރަން ޖެހިފައި ހުރި ބޯޓުތަކާއި ފެސިލިޓީތަކުގެ މަރާމާތުކޮށް ނިމެން ކައިރިވެފައިވާ ކަމަށް ވެސް އޭނާ ވިދާޅުވި އެވެ.
"ފާއިތުވި ތިން އަހަރު ކުންފުނީގައި ހުރި ވަސީލަތްތައް ތަރައްގީ ކުރުމަށް ގިނަ މަސައްކަތްތައް ކުރެވިފައިވާނެ. އަޅުގަނޑުމެން ހަވާލުވި އިރު ބޮޑެތި އަދަދުތަކުން ރިޕެއާ ކުރަން ޖެހުނު. ގިނަ ބޯޓުތައް ވެސް އޮތީ ޑޮކު ކުރަން ޖެހޭ މުއްދަތުގައި ޑޮކު ނުކޮށް. އޭގެ ސަބަބުން ބޯޓުތަކަށް ވަރަށް ބޮޑަށް ގެއްލުންވި. މިހާރު މި ބޯޓުތައް ޑޮކުކޮށް މަރާމާތުތައް ނިންމައި، އެންމެ ފަހު ބޯޓު ވަރަށް އަވަހަށް އޮޕަރޭޝަނަށް ނެރޭނެ،" ފައުޒީ ވިދާޅުވި އެވެ.
"ޖުމްލަކޮށް ބަލާނަމަ އަޅުގަނޑުމެންގެ ކަލެކްޝަން އެންހޭންސް ކުރެވި، މަސްވެރިންގެ ޖީބަށް ވެސް އިތުރު އާމްދަނީއެއް ވަނީ ލިބިފައި."
- 2019 ގައި 48،496 ޓަނުގެ މަސް ކިރާފައިވާއިރު 903 މިލިއަން ރުފިޔާ މަސްވެރިންނަށް ވަނީ ދީފައި.
- 2020 ގައި 49،393 ޓަނުގެ މަސް ކިރާފައިވާއިރު 879 މިލިއަން ރުފިޔާ ވަނީ ދީފައި.
- މި އަހަރުގެ މިހާތަނަށް 49،517 ޓަނުގެ މަސް ކިރާފައިވާއިރު 764 މިލިއަން ރުފިޔާ ވަނީ ދީފައި.
- 2019ވަނަ އަހަރު 39،000 ޓަނުގެ މަސް އެކްސްޕޯޓް ކުރި.
- 2020ވަނަ އަހަރު 33،000 ޓަނުގެ މަސް އެކްސްޕޯޓް ކުރި.
- މިއަހަރުގެ މިހާތަނަށް 40،900 ޓަނުގެ މަސް އެކްސްޕޯޓް ކުރި.
ފާއިތުވި ތިން އަހަރު ދުވަހު މިފްކޯއިން މަސް ކިރާފައިވާ އަދަދު އިތުރުވެފައިވާއިރު މިއަހަރު ނިމޭއިރު 50،000 ޓަނުގެ މަސް ކިރޭނެ ކަމަށް ފައުޒީ ލަފާކުރައްވަ އެވެ.
އޭނާ ވިދާޅުވި ގޮތުގައި މިދިޔަ އަހަރާ މިއަހަރު މަސް ކިރުވާ އަދަދު އިތުރުވިނަމަވެސް މަސްވެރިންނަށް ދޭ ފައިސާގެ އަދަދު ދަށްވީ ކޮވިޑް-19ގެ ސަބަބުން ދުނިޔޭގެ ބާޒާރުގައި މަހުގެ އަގު ދަށްވެފައިވާތީ އެވެ. ނަމަވެސް މަސްވެރިންނަށް ފައިސާ ބަރާބަރަށް ދެވުމަކީ ލިބޭ ހިތްހަމަޖެހުމެއް ކަމަށް އޭނާ ވިދާޅުވި އެވެ.
"މިފްކޯއަށް ލިބޭ އެންމެ ބޮޑު ހިތްހަމަޖެހުމަކީ މަސްވެރިންނަށް ދޭން ޖެހޭ ފައިސާ ބަރާބަރަށް ދެވެމުން އައުން. މަސްވެރިޔާ ކާޑާއެކު ކޮންމެ އާދީއްތަ ދުވަހަކު ފައިސާ ޖަމާވާނެ. މަސްވެރިންނަށް އެބައޮތް ޔަގީން ކަން މިހާރު ފައިސާ ލިބޭނެ ކަމުގެ،" ފައުޒީ ވިދާޅުވި އެވެ.
ފައުޒީ ވިދާޅުވިގޮތުގައި މިވަގުތު އެ ކުންފުނިން އެންމެ ބޮޑު އިސްކަމެއް ދެނީ ކުންފުނީގެ ކެޕޭސިޓީ އިތުރު ކުރުމަށެވެ. ސަރުކާރުގެ އެއްބާރުލުމާއެކު ކުރިއަށް އޮތްތާނގައި މިކަން ހާސިލުވާނެ ކަމަށާއި މި މަސައްކަތް މިހާރު ވެސް ފަށާފައިވާ ކަމަށް އޭނާ ވިދާޅުވި އެވެ.
މިފްކޯގެ ކެޕޭސިޓީ އިތުރު ކުރުމަށް ސައުދީ ފަންޑުގެ ދަށުންނާއި އިންޑިއާ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ގިނަ ޕްރޮޖެކްޓުތަކެއް ހިންގާނެ އެވެ. އެގޮތުން،
- ސައުދީ ފަންޑުގެ ދަށުން ގދ. ތިނަދޫގައި 100 ޓަނުގެ ބްރެއިން ފްރީޒިން ފެސިލިޓީއަކާއި 1000 ޓަނުގެ ކޮލްޑް ސްޓޯރެޖެއް ތަރައްގީ ކުރާނެ.
- ސައުދީ ފަންޑުގެ ދަށުން ގއ. ކޫއްޑޫގެ ބަނދަރު 400 ފޫޓު ބޮޑުކޮށް، އިތުރު 4000 ޓަނުގެ ކޮލްޑް ސްޓޯރެޖެއް ތަރައްގީ ކުރާނެ.
- ސައުދީ ފަންޑުގެ އެހީގައި މ. މުލަކުގައި 100 ޓަނުގެ ބްރެއިން ފްރީޒިން ފެސިލިޓީއަކާއި 500 ޓަނުގެ ކޯލްޑް ސްޓޯރެޖެއް ތަރައްގީ ކުރާނެ.
- ސައުދީ ފަންޑުގެ ދަށުން ކަނޑުއޮއްގިރީގެ ބަނދަރު ތަރައްގީ ކޮށް ރޯމަސް އެކްސްޕޯޓު ކުރަން ފެސިލިޓީއެއް ހަދައި ކޯލްޑް ސްޓޯރެޖް ކެޕޭސިޓީ އިތުރު ކުރާނެ.
- އިންޑިއާ ލައިން އޮފް ކްރެޑިޓް ފެސިލިޓީގެ ދަށުން ފެލިވަރުގައި 4000 ޓަނުގެ ކޯލްޑްސްޓޯރެޖަކާއި 380 ޓަނުގެ ބްރެއިން ފްރީޒިން ފެސިލިޓީއެއް ތަރައްގީކޮށް ބަނދަރަކާއި ބޮޑެތި ބޯޓުފަހަރަށް ގާތް ކުރެވޭ މަގަތު ފާލަމެއް ވެސް ތަރައްގީ ކުރާނެ.
- ސައުދީ ފަންޑުގެ ދަށުން 50 ބޯޓެއްގައި "ރެފްރިޖަރޭޓެޑް ސީ ވޯޓާ" (އާރުއެސްޑަބްލިއު) ސިސްޓަމް ބަހައްޓާނެ.
ކެޕޭސިޓީ އިތުރު ކުރުމުގެ ގޮތުން ފާއިތުވި ތިން އަހަރު ތެރޭގައި މިފްކޯއިން ވަނީ ދެ ބޯޓު ވެސް އެ ކުންފުނީގެ ފްލީޓަށް އިތުރު ކޮށްފަ އެވެ. މިއީ 2400 ޓަނުގެ ރީފާ ކެރިއަރަކާއި 1000 ޓަނުގެ ބްރެއިން ފްރީޒާ ވެސަލްއެކެވެ. މި ދެ ބޯޓުގެ އޮޕަރޭޝަންތައް ފެށުމުން މަސްވެރިންނަށް ހުރި ގިނަ ގޮންޖެހުންތަކަށް ހައްލު ލިބޭނެ ކަމަށް ފައުޒީ ވިދާޅުވި އެވެ.
މަސްވެރިންގެ ދުވަހާ ދިމާކޮށް، މަސްވެރިންނަށް އައިސް ލިބުމުގައި ހުރި ދަތިތަކަށް ލުޔެއް ހޯދައި ދިނުމަށް މިއަދު ހަތަރު ރަށެއްގައި އައިސްޕްލާންޓުތައް ވެސް ހުޅުވަން ވަނީ ނިންމައިފަ އެވެ. އެއީ ފެލިވަރުގައި ހުޅުވާ 50 ޓަނުގެ އައިސްޕްލާންޓާއި ހއ. ހޯރަފުއްޓާއި ރ. މަޑުއްވަރީ އާއި ކ. ގާފަރުގައި 25 ޓަނުގެ އައިސްޕްލާންޓުތެކެވެ. މިހާރު ވެސް ރާއްޖޭގެ އެކި ރަށްތަކުގައި 20 އައިސްޕްލާންޓުން މަސްވެރިންނަށް ހިދުމަތް ދޭ ކަމަށް އޭނާ ވިދާޅުވި އެވެ.
އޭނާ ވިދާޅުވި ގޮތުގައި އަންނަ އަހަރަކީ ވެސް މިފްކޯއަށް ރަނގަޅު އަހަރެކެވެ. އަންނަ އަހަރު އިތުރު 13 އައިސްޕްލާންޓެއްގެ މަސައްކަތް ފަށަން ނިންމާފައިވާއިރު އެ ކުންފުނީގެ ހުރިހާ ފެސިލިޓީތަކާއި ފިހާރަތައް އެއް ވިއުގައަކުން ގުޅުވާލައި ޑިޖިޓަލް ހިދުމަތް ފެށުމުގެ މަސައްކަތް ކުރަން ނިންމާފައިވާ ކަމަށް އޭނާ ވިދާޅުވި އެވެ.
"ކުރިން ފެށިގެން އަތުން ލިޔެގެން ބިލުތައް ދެނީ. އޭގެ ބަދަލުގައި މަސް ކިރުވުމުގެ ނިޒާމު އަޅުގަނޑުމެން ބަދަލު ކުރާނީ ޑިޖިޓަލް ނިޒާމަކަށް. އެޕްލިކޭޝަނުގެ ތެރެއިން ބިލު ހެދުމާއި އައިސް ދޫކުރުމާއި ތެޔޮ ދޫކުރުން ފަދަ މިފްކޯއިން ދޭ ހިދުމަތްތައް ލިބޭ ގޮތް އަޅުގަނޑުމެން ހަދާނަން،" ފައުޒީ ވިދާޅުވި އެވެ.
މަސްވެރިންނާ ގުޅިގެން އެ މީހުންގެ ހުރި ކަންބޮޑުވުންތައް އަހައި، ކުރިއަށް އޮތް އަހަރުތަކުގައި ވެސް ހިދުމަތްތައް ފުޅާ ކުރައްވަމުން ގެންދަވާނެ ކަމަށް އޭނާ ވިދާޅުވި އެވެ. އަދި މިކަމުގައި ސަރުކާރުން ލިބޭ އެއްބާރުލުމަށް އޭނާ ޝުކުރު އަދާ ކުރެއްވި އެވެ.