12 ޑިސެމްބަރ 2016 - 11:40
ވޮޝިންޓަން (ޑިސެމްބަރު 12) - އެޕަލް ކުންފުނިން އެންމެ ފަހުން ޗައިނާގައި ކުރި އިންވެސްޓްމަންޓާ ސްމާޓްފޯނާ ގުޅުމެއް ނެތެވެ.
އެޕަލް ކުންފުނިން މި ފަހަރު މިވަނީ ޗައިނާގެ ވިންޑް ޕަވާ އިންޑަސްޓްރީ އަށް ވަދެފަ އެވެ. ދުނިޔޭގެ އެންމެ އާބާދީ ބޮޑު ގައުމުގައި ވައިން ހަކަތަ އުފެއްދުމުގެ ދާއިރާ އަށް އެޕަލް އިން އިންވެސްޓް ކުރުމުން ބައެއް މީހުން ސުވާލު އުފައްދަފާނެ އެވެ. އެކަމަކު އެ ކުންފުނިން ވަނީ 100 ޕަސެންޓް އިޔާދަކުރަނިވި ހަކަތަ އަށް ބަދަލު ކުރުމުގެ ލަނޑުދަނޑިއެއް ކަނޑައަޅައިފަ އެވެ.
އައިފޯން އުފައްދާ ކުންފުނިން މި ހަފުތާގައި ވަނީ ޗައިނާގައި ވިންޑް ޓާބައިން އުފައްދާ އެންމެ ބޮޑު ކުންފުނި، ގޯލްޑް ވިންޑުގެ 30 ޕަސެންޓް ގަނެފަ އެވެ. މި ވިޔަފާރީގެ އަގު ހާމަކޮށްފައި ނުވި ނަމަވެސް މިއީ އެޕަލްގެ ސާފު ހަކައިގެ އެންމެ ބޮޑު މަޝްރޫއެވެ. އެޕަލްގެ އާ ޕްރޮޖެކްޓުން ޗައިނާގެ ގްރިޑަށް 285 މެގަވޮޓުގެ ސާފު ހަކަތަ އިތުރުވާނެ އެވެ.
އެޕަލްގެ ގިނަ ޕްރޮޑަކްޓްތައް އުފައްދަނީ ޗައިނާގަ އެވެ. ކުންފުނީގެ ވިޔަފާރީގެ ފަސްބައި ކުޅަ އެއްބައި ހިއްސާ ކުރަނީ ޗައިނާ އެވެ.
ތިމާވެއްޓަށް މަސައްކަތްކުރާ ގްރީންޕީސް ފަދަ ޖަމާއަތްތަކުން ވަނީ އިލެކްޓްރޯނިކްސް އުފައްދާ ކުންފުނިތަކުން ޗައިނާގައި ހަކަތަ ގިނަ އަދަދަކަށް ބޭނުން ކުރާ ކަމަށް ބުނެފަ އެވެ. އަދި އެކަމަކުގެ ސަބަބުން ދުނިޔޭގެ ޖައްވު ކިލަނބު ކުރަން ޗައިނާގެ ހިއްސާ އިތުރަށް ބޮޑުވެގެން ދެ އެވެ. އެހެންވެ ތަޖްރިބާކާރުން ބުނާ ގޮތުގައި އެޕަލްގެ މި އިސް ނެގުމަކީ މިކަށް ދޭ ބަދަލެކެވެ. އެޕަލް އިން މިދިޔަ އަހަރު ވަނީ ސޯލާ ހަކަތައިގެ ޕްރޮޖެކްޓްތަކެއް ވެސް އިއުލާންކޮށްފަ އެވެ.
ޗައިނާ އަކީ އިޔަދަކުރަނިވި ހަކަތަ އަށް އެންމެ ބޮޑަށް އިންވެސްޓް ކުރާ ގައުމެވެ. އދ. އިން ބުނެފައިވާ ގޮތުގައި އެ ގައުމުން މިދިޔަ އަހަރު ވަނީ ވަޔާއި އަވި އަދި އިޔާދަކުރަނިވި ހަކަތައިގެ އެހެން ދާއިރާތަކަށް ރެކޯޑް އަދަދެއް ކަމަށްވާ 102.9 ބިލިއަން ޑޮލަރު އިންވެސްޓްކޮށްފަ އެވެ.
ޓެކް ކުންފުނިތައް ކަމަށްވާ ފޭސްބުކް އާއި ގޫގްލް އިން ވެސް ވަނީ 100 ޕަސެންޓް ސާފު ހަކަތަ އަށް ބަދަލު ކުރުމަށް އަމާޒު ހިފައިފަ އެވެ. ގޫގްލް އިން ބުނެފައި ވަނީ އަންނަ އަހަރު މި އަމާޒަށް ވާސިލްވެވޭނެ ކަމަށެވެ. މައިކްރޯސޮފްޓުން ބުނެފައި ވަނީ މީގެ ދެ އަހަރު ކުރިން ފެށިގެން އިޔާދަކުރަނިވި ހަކަތަ އަށް ބަދަލުކޮށްފައިވާ ކަމަށެވެ.