04 ޑިސެމްބަރ 2021 - 20:06
ކްލިކް ކޮލެޖުން ހުޅުމާލޭ ސެންޓްރަލް ޕާކްގައި އިއްޔެ ބޭއްވި ހަރަކާތުގައި ނަސާރާ ދީނުގެ ލަވައެއް ޖެހީ ގަސްދުގައި ނޫން ކަމަށް ބުނެ، ކްލިކް ކޮލެޖުން މާފަށް އެދިއްޖެ އެވެ.
"ކިޑްސް ސްޕޯޓްސް ފެސްޓިވަލް"ގެ ނަމުގައި ކްލިކް ކޮލެޖުން އިއްޔެ ކުރިއަށް ގެންދިޔަ ހަރަކާތުގައި ނަސާރާ ދީނުގެ ލަވައެއް ޖެހިކަން އާއްމުންގެ ސަމާލުކަމަށް އައިސް، އެ ހަރަކާތުގެ ވީޑިއޯތައް، ސޯޝަލް މީޑިއާގައި ވަނީ އާއްމުވެފަ އެވެ. މަދަނީ ޖަމިއްްޔާތަކެއް ގުޅިގެން އުފައްދާފައިވާ "ރައްޔިތުންގެ އިއްތިހާދު"ން މިހާރު ވަނީ ފުލުހުންނަށް ވެސް އެކަން ހުށަހަޅައިފަ އެވެ.
އެ މައްސަލަގައި އާއްމުންގެ ނުރުހުން އަމާޒުވުމުން، ކްލިކް ކޮލެޖުން މިއަދު މެންދުރު ކުރި ޓްވީޓެއްގައި ބުނީ އެއީ ގަސްްދުގައިކުރި ކަމެއް ނޫން ކަމަށާއި، އިވެންޓްގެ ސައުންޑް ކަންތަކާ ހަވާލުވެ ތިބި ފަރާތްކަށްް އެކަން އެނގުމުން (ޖަހާފައި ހުރީ ނަސާރާ ދީނުގެ ލަވައެއްކަން އެނގުމުން) ލަވަ ބަދަލުކޮށްފައިވާ ކަމަށެވެ.
"މިކަމަށް އެންމެހާ ރައްޔިތުންގެ ކިބައިން ނިހާޔަތަށް މާފަށް އެދެމެވެ،" ކްލިކް ކޮލެޖުން ކުރި ޓްވީޓްގައި ބުންޏެވެ.
ކްލިކް ކޮލެޖްގެ އިވެންޓްގައި އެފަދަ ލަވައެއް ޖަހާފައި ވާތީ އެ ކޮލެޖްގެ އިތުރުން، ސަރުކާރަށް ވެސް އާއްމުން ގެންދަނީ ފާޑުކިޔަމުންނެވެ. އެއީ އެކޮލެޖާ ދެކޮޅަށް އަދި ފިޔަވަޅެއް އަޅާފައި ނުވާތީ އެވެ.